Read East Ambae 2 KOREN 12 Bible Online

2 KOREN 12 - East Ambae bible

2 KOREN 12

¹Bataha a gato sagesage vin he vai na gineu garea tea, nge ineu nam rongoe ve nain vei mwerehi tau mosigei, siserigi ngaha ineu nain veve sere na boborea hi u haharaginire laweau ko a gineu lavasigi vage hi sereluara laweau siboku.

²A gineu biti hogosie, nge a higao hangavulu domwagi gaivesi u vano beno, Ineu nau ilo na tangaloi noi Kraes gatagale hogosie i God u leie hage lo ute ta eulu gaitoligi. Ineu nahe ilo tea ve a gineu hi a hogo sige ve a boborea hogosie, nge i God hogosie u iloe.

³Nam veve taligu, ineu nahe ilo tea ve a gineu hi a hogo sige a boborea hogosie, nge ineu nain veve lai ve, mo mwerehi ve i God u leie vano Baradais.

⁴Aiehi, ingeie u rongo na gineu hi he veve laire tea lo noda leo, vage rau gogona, igide dahe tatarise tea ve dain vevera.

⁵Ineu nam gato sagesageau mena gineu ngerehi i God u haharaginire laweau, nge ineu nain he gato sagesageau tea mena gineu hi nam vaie mo huri na noku tarani siboku. Ineu nain sagegieu hogosie huri na gineu ram haharagi ve ineu hatie noku huireana luku.

⁶Tare ineu nam tarani ve na sagegieu siboku, ihine tea vin he veve lai tea ve ineu a lengagi, a havai nam veve a hogo. Nge ineu nain he vaie tea mwerehi, a vevenagi ineu nahe tarani tea ve a sinobu ram lado mavagieu. Ineu nam tarani ve rain leohogosieu lo havagineu hi nam vai ko vage ram rongo na gineu ingere hi nam vevera.

⁷A hogo i God u bete na gineu garigiana u sao laweau, nge mo tugoroau ve rain mese sagesageau lawagi. Siu i God mo bete na gagarasi laweau u mwere na mavusi gei u hogohogora hi mo turu tavano lolo livugei tarabesiku. A gagarasi ngaha mo mwere na gigilegi dein Setan ve na tugoroau ve na mese sagesageau lawagi.

⁸Ineu nau nevu siaga dena Huqe vagatolu vena lai vohogi na gagarasi lawua ngaha denieu.

⁹Nge ingeie mo veve laweau vena, “A noku dom tabetabe lawua hi mo toga lumu u tatarise hurigo ve vin ture hageginigo. Lune gom wiriwiri, a noku huireana vin vei siagaginigo vin liu.” Giniehi, ineu nam rongo garea huri ve nain gato sagesageau huri na gineu ngerehi haharaginie ve ineu hatie noku huireana luku. Lo matahala mwerehi, ineu nam rongo utu vei Kraes mo tabehagegieu gina nona huireana.

¹⁰Ineu nam havuhevu huri a gineu u sao ram vaieu nam wiriwiri. A gineu ngerehi ram vai wiriwirigieu ingere ngaha a tangaloi ram veve gineu vovohoieu, ram vaieu hatie mabuhegi laweau, a gagarasi u sao, ko a gineu esi u sao ram hogosieu huri Kraes, siu a noku wiriwiri mo vaieu nam huire.

¹¹Ineu nam laqa mwere na tangaloi a lengagi, nge igimiu neu veieu teu nam vaie. Igimiu hi ve nein veve gineu rau garea hurieu. Ineu hatie mava mavanaku, nge ira gaihora lalawua ngerehi rahe mava tea vena liu denieu.

¹²A vaigivui ko a gineu garigiana u sao hi ineu nau veire gina rongoribi lo nagomiu ngehi mo haharagi ve ineu a gaihora.

¹³Siu igimiu neu lei na gineu doluegi mwerehi a warelue lavasigi rau leire. Nge a gineu gatagale hogosie u wegineu ngehi a gineu hurieu he mavasi gimiu tea. Igimiu nen lado vohogi na buguku huri na gineu ngaha.

¹⁴Siserigi ngaha ineu nam rarai ve nain siro gimiu vagatoligi, ko ineu nain he voragi gaiweli mava tea lawe gimiu. Ineu nahe tarani tea gineu dein gimiu, nge a domiku mo eno lumiu hogosie. A maresu wuwerigi rain he vai vagatai mane tea ve rain bete lawe retamara tora ratahire. I tamara tora retahire, ingerehi ve rain vagatai mane huri rain bete lawe renetune.

¹⁵Siu ineu nam havuhevu huri ve nain bete na noku gineu doluegi hi ram eno lo limeku huri gimiu, nein bete laieu siboku vage. Tare ve ineu nam tabe garagaragi gimiu. ?Wa igimiu nein tabe laieu tea biti?

¹⁶Ineu nam lado ve igimiu nein daragi lei ve ineu nahe tau na gai weli mava tea lumiu. Bataha lavasigi dein gimiu rain veve ve ineu a tangaloi kalikeli, siseri ngaha nam vai na noku kalikeli lo leo ngerehi nam vevera lawe gimiu ve nan holi gimiu lune.

¹⁷?Mwerehilogo? ?Wa igimiu nem lado ve ineu nam belu gineu dein gimiu lo tangaloi ngerehi nau horara vanatu lawe gimiu? !Hatie! Ineu nam navu siaga dein gimiu

¹⁸Ineu nau nevu siaga dein Taetas vena vanatu lobemiu. Ko nau hora tuada gatagale u ladohogo ve ingere bulu. ?Wa i Taetas u lama gimiu? !Hatie! Igimiu neu ilo ve i Taetas ko ineu gorom vai na gineu gatagale lo Vui gatagale.

¹⁹Bataha nem lado ve igamai gam vai leo ve gan qalo goro gamai sibomai lo nagomiu. !Hatie vohogi! Igamai gam laqa mwerehi i Kraes mo tarani lo nagoi God. Igimiu a nomai buluana mweratabe, ko a gineu doluegi hi gam vaire vena vai siagagi gimiu.

²⁰Ineu nam matagu ve vaiteu nam vanatu, nam haqea ve nehe toga tea lo matahala mwerehi nam taranie, ko igimiu nein he taranieu tea lo matahala ve nein taranieu. Ineu nam matagu ve bataha a vuigaro, a gineu gagarasi, lolo gagasi, veve huri, sagesage, ko a rogerogegi leo mo toga lolo livugemiu.

²¹Ineu nam matagu ve lune nain vanatu lobemiu, a noku God vin vei maemaegieu lo nagomiu. Ineu nain hahagavi garagara huri rahine hi rau galegaleasi rahe ladowenigi tea lolo lolora ko ve ran tudori dena nora galegaleasi talo tarabesi ko a gineu esi hi rau veire.