Read East Ambae 2 KOREN 13 Bible Online

2 KOREN 13 - East Ambae bible

2 KOREN 13

¹Siserigi ngaha ineu nain vonatu nain siro gimiu vagatoligi. A Reve reve Gogona mo veve vena, “Tare ve a leo mo wali lui hine tea, a tangaloi gairue sige gaitolu rain labe huri rain veve sere na leo hi,” mwerehi a Reve reve Gogona mo veve.

²Ineu nau bete na leoi matagute lawe rahine hi rau galegaleasi lune nau toga mei gimiu vagatuegi. Siserigi ngaha ineu nau vagahao dein gimiu, ineu nam bete na leo matagute lawera hine doluegi wagineu. Lune ineu nain vanatu taligu lobemiu, ineu nain he hagavi gimiu tea, Ineu nain gato siaga meire.

³Lo taro hi, igimiu nein leo hogosie ve i Kraes mo toga meieu ko mo vai siagagieu ve nan waregi sere na nona leo. Ngehi mo haharagi ve i Kraes he wiriwiri tea lolo livugemiu, nge u huire garagara.

⁴A hogo, ingeie u kekena lo taro hi u mate lo gai saroutu, nge siserigi ngaha ingeie mo mwaso gina managi noi God. A hogo huri ve igide dam wiriwiri lui Kraes, nge huri gimiu, igide dain mwaso lui Kraes lo managi noi God.

⁵U garea ve igimiu sibomiu nen vivilogi na mwasoamiu. Igimiu nein vevegi gimiu sibomiu, nem hako bibi na nomiu ladohogo sige hatie. Ineu nau ilo vurugegi ve tare a nomiu ladohogo mo mwaso tau mosigei, igimiu nein veve lai ve i Kraes mo toga lo mwasoamiu.

⁶Nge ineu nam ladohogo ve igimiu nein lehe ve igamai gahe vagasile tea ve gain vevegi gamai sibomai.

⁷Igamai gam tataro lawe God huri gimiu ve a nomiu ladohogo na mese vano rerarera. Igamai gahe tataro tea ve a sinobu rain leo ve a nomai tabanagi u garea. Bataha a sinobu lavasigi rain lado ve a nomai tabana u soi, siu hatie huri, tare ve ram lado ve gau vagasilegi na nomai tabana, nge igamai gam tarani ve igimiu nen vai na gineu ran vovohoi.

⁸Igamai gain he vai lei tea ve gain qalo goro na leo hogo, nge gain vei na gineu vin huri na leo hogo hogosie.

⁹Tare ve igamai gam wiriwiri, nge gam havuhevu huri igimiu a nomiu huireana lumiu, siu igamai gam tataro huri na gineu ngaha, huri ve igimiu nen tudori ko nein vovohoi.

¹⁰Giniehi, ineu nam uli na leo ingere ngaha lawe gimiu lune ineu vagahao dein gimiu. Huri ineu nahe tarani tea ve nain vanatu lobemiu nain gato siaga mei gimiu gina huireana hi a Huqe u betea laweau. U bete na huireana ngaha laweau ve nain heu ragasi gimiu, nge hatie huri ve nain reve surigi gimiu.

¹¹Retueku ko ire haqeku, siserigi ngaha, ineu nam veve noku leo tuletulegi lawe gimiu. Ineu nam navu siaga dein gimiu ve nen labe siaga nein vovohoi vurugegi. Igimiu nein vei na hava gineu hi nau veve lawe gimiu ve nein veie. A domimiu vin bubugi mei gimiu gagatalegi, ko nen toga lo tamwata. Siu i God, ngehi a vui tamwata ko a tabetabe vin toga mei gimiu.

¹²Igimiu nen lai vurugegi gimiu gagatalegi gina sungsunguni gogona.

¹³A sinobu gogona noi God doluegi ram hora nora vevegarea lawe gimiu.

¹⁴A hogogi noi noda Huqe i Jisas, a tabetabe noi God, ko a bulubulu noi Vui Gogona na toga lobemiu doluegi.