Read East Ambae 2 KOREN 3 Bible Online

2 KOREN 3 - East Ambae bible

2 KOREN 3

¹Bataha a dilogi mo tatangi lolo qeromiu ve igamai gam tauvuigi gam gato sagesage gamai sibomai, nge hatie mwerehi. Lune a tangaloi wagineu ram vanai lo tanomiu, ingere rain lei na leta ngehi i retuemiu lavasigi rau uli, huri ve a leta hi vin veve sere na tangaloi wagineu ngerehi lawe gimiu, huri igimiu neu horara. ?Wa igimiu nem tarani ve nein vei gamai mwerehi? Ngehi a lengaana.

²Igimiu sibomiu neu mwere na leta hi mo haharagi lawe gamai huri igimiu nem toga lolo lolomai mwere na leta hi a tangaloi u ulie beno. Siu a sinobu rain lehi na leta hi, ko rain velu leie.

³U matamwasara ve i Kraes u uli na leta hi sibona, siu mo taue lo limemai ve gain wahegi lateginie. A leta hi i Kraes he ulie tea gina inki, u ulie gina managi nona Vui noi God hi mo mwaso vin he mate lai tea. Ko he ulie tea lo vatu, nge u ulie lolo loloi tangaloi.

⁴Igamai gain laqa lai mwere ngaha, a vevenagi igamai gau bulu bubugi mei Kraes, ko gam ladohogogi God.

⁵Igamai gahe veve tea ve a tabana ngaha gain vei lei sibomai. I God hogosie u vei gamai gam tatarise ve gain vei lei na havagineu doluegi hi ve gain veie.

⁶Ingeie u vei gamai gam vailei gam voragi na tangaloi tabana lo waratau garaqa hi u vanai denie sibona lawera nona sinobu. A waratau garaqa ngaha he mwere na tau leo tea hi rau uli bibie beno. A tauleo hi rau uli bibie mo lai na mateana, nge a Vui noi God ngehi mo bete na mwasoana.

⁷A Leohora hi u lei na mateana u ulibibie lo vatu lalawua gairue. U vanai dena varavarai God, ngehi u vei na nagoi Mosis mo leleo garagara ve ira duvi Israel rahe rada tea vohogi lo nagoi Mosis. Nge he ribi tea a leleo hi u matahara.

⁸Siu u matamwasara ve a managi lawua noi God mo leleo hagi na halai tabanagi gagatalegi hi a Vui Gogona u veire.

⁹Tare ve a Leohora mo vevegi na tangaloi ve u vagasile lo galegaleasi, a leleo noi God mo leleo hagi na Leohora, a hogo, a matahala garaqa ngehi a Vui Gogona mo vai na tangaloi mo vovohoi lo nagoi God, a leleona u lawua sileti.

¹⁰A Leohora tatuei a leleona lune, nge a leleona u matahara vohogi lune u tatarise ginie mena leleo u lawua taligu talo matahala garaqa.

¹¹Tare ve a Leohora, hi u salasala u vanai mena leleo, siu a matahala garaqa ngaha ve vin eno vagituei, a leleona u lawua sileti.

¹²Igamai gam hakovi na ladotare ngaha, siu igamai gahe matagu tea.

¹³Igamai gahe mwerei Mosis tea, u hunegi goro na nagora huri ve ira duvi Israel rain mese lehi na nagona. A leleo hi u matahara, ko i Mosis he tarani tea ve ira duvi Israel rain lehe hi mo salasala.

¹⁴A domine u lulu maeto, mo dadari hibagataha a mavusui galego nge tauhi i Mosis u gagavugi goro na nagona ginie, mo gagavu goro na domire duvi Israel tau mosigei. Lune ingere ram valu na Leo Waratau ta tuei, rahe lai na iloilogi tea lolo domire. Hogosie tare ve ihine tea mo bulu bubugi mei Kraes, i Kraes vin tagagi vohogi na mavusui galego hi.

¹⁵Mwerehi bagataha, lune ingere ram valu na Leohora noi Mosis, nge a mavusui galego hi mo gagavugi goro na domire tau mosigei.

¹⁶Lune a tangaloi a domine mo lado leahi ko mo huri na Huqe, a Huqe vin lei vohogi na mavusui galego hi dena nagona.

¹⁷A Huqe ingeie a Vui, tahi logo a Vui nona Huqe mo tino aie, a tamwata aiehi vage.

¹⁸Siu a gineu he gagavugi goro na nagoda tea. Igide doluegi dam haharagi na leleoi Kraes, siu igide dau dori na domide ve dain mwere na nunui Kraes, ko a leleona mo varavara sulude tamwere. Ngehi a tabanagi nona Vui Gogona, ingeie a Huqe.