Read East Ambae 2 KOREN 4 Bible Online

2 KOREN 4 - East Ambae bible

2 KOREN 4

¹I God lo nona hahagavi, u bete na tabana ngaha lawe gide, siu igide dain he hako sireginie tea dena limada.

²Nge igamai gau tudori dena gineu esi hi rau toga hiligi ko a matahala asi ngerehi a tanoi maemae lure, igamai gahe vai gineu tea gina kalikeli, sige gam tau leahi na leo huhui noi God. U matamwasara vovohoi huri ve igamai gam huhui na hogo, gam haharagi lawe na tangaloi doluegi ve igamai irahine. Siu ingere rain ilo lolora sibora ve igamai a hava tangaloi lo nagoi God

³Tare ve a Roro Garea hi gam waregi serea mo toga hiligi, ngehi mo toga hiligi lawe rahine hi rau sala hogosie.

⁴A Vui esi mo huqegi goro na ure ngaha, u toqe goro na domire hi rahe ladohogo tea. Ingere rain he leo lai na leleoi Roro Garea huri na leleoi Kraes, ngehi u mwerei God sibona vohogi.

⁵Igamai gahe waregi sere na gineu tea huri gamai sibomai, nge gam waregi sere ve i Jisas Kraes ingeie a Huqe ko ve igamai ira nomiu tangaloi tabanagi lawe Jisas.

⁶Lo taro gatagale i God u veve vena, “!A leleo na leleo lue dena dodogi!” I God ingeie tauhi u vei na nona leleo mo lelehagi na lolo loloda ko mo siregi lawe gide ve da ilo na leleoi God ngehi mo eno lo nago Kraes.

⁷Igamai gau lei na matani gineu ngaha dein God, nge igamai gau mwere na lahatano, ngehi a matani gineu mo eno hiligi lolona. Ngehi mo haharagi huri ve a managi lawua hi mo vanai dein God, nge hatie ve dein gamai.

⁸A gineu esi u sao ram eno dalibulugi gamai, nge rahe qoragi gamai tea. Igamai gahe ilo tea ve gai vei mwere hilogo mena mwasoamai, nge igamai a domimai he soi tea vohogi.

⁹Rau veivei gamai, nge i God he vagahao tea dein gamai. Lo taro lavasigi igamai gam rong-gagarasi, nge rahe vai vohogi gamai.

¹⁰Igamai gam wali na mateanai Jisas lo tarabesimai sibomai huri ve a mwasoanai, huri ve a tangaloi rain leo laie vage lo tarabesi mei.

¹¹Igamai gam mwaso, nge huri Jisas igamai gam kakarani lobei na mateana siu huri ve a mwasoai Jisas a tangaloi rain leo laie lo tarabesimai ngehi u mate.

¹²Siu a mateana mo tabanagi lumei, nge a mwasoana mo tabanagi lumiu.

¹³U uli lo Reve reve Gogona mo veve vena, “Ineu nau ladohogo, giniehi nam gato.” A nomai ladohogo mwerehi vage, gam ladohogo giniehi gam gato.

¹⁴God u ragasi i Jisas u Huqe dena matenana, ko igamai gam ilo ve i God vin ragasi gamai dena mateana mei Jisas. I God vin lei tabulutegi gamai mei gimiu, ko igide dain labe lo nagona.

¹⁵A gineu ingere ngaha ram eno lawe gimiu. A hogogi noi God mo wahegi mo vano lawera sinobu saosao, siu u sao denire sinobu u sao ram waregareagi God huri na leleona.

¹⁶Siu igide dain mese wiriwiri. A tarabeside ram tamaragai ko ram kekena, nge lolo loloda a tamateda mo garaqaga vataha rani

¹⁷A gineu ram asi mei gide biti huri na mahogi qiloda, nge ram bului gide ve dain leilei na mwasoana tavagi tuei. A leleoi mwasoana hi u lawua dena nonda rong-gagarasi

¹⁸Igide dain mese leo toratora lo gineu ngerehi dam leo laire, nge a matada rain leo toratora lo gineu ingere dahe leo laire tea. A gineu dam lehire rain mahogi qilodo, nge i gineu dahe lehire tea rain eno vagi tuei.