Read East Ambae 2 KOREN 6 Bible Online

2 KOREN 6 - East Ambae bible

2 KOREN 6

¹Igamai gam tabana bubugi mei God, siu igamai gam navuhi gimiu ve, igimiu hi neu lei na hogogi noi God beno nein mese sireginie vena mwasaru vurogi

²I God mo veve vena, “Ineu nau rongo na nomiu tataro, ko lune igimiu neu tarani na buluiana, denieu nau vanai ko nam vagamwasoi gimiu.” A taro hi u dadari beno. Nge ngaha a rani huri gimiu ve nein mwaso.

³Igamai gahe tarani tea ve ihine tea vin haqe na asigi lo nomai tabana, siu hatie gineu ve gau veie ve vin voragi na vatutaturegi lawe hine tea.

⁴Nge lo gineu doluegi, ko lo matahala doluegi igamai gam haharagi ve igamai a tangaloi tabanagi noi God hogo. Igamai gau rong ribi gesegi, hate huri a gineu esi ram vai gamai, gau gagarasi ko gau weli na taro rau siaga.

⁵Rau vivihi gamai, rau tuli gamai sulolo valei veuveu. Igamai gau vuisaka meire hi rahe tarani gamai tea ko ram tavuigi na vui garo. Igamai gau tabana u huire ko lo taro lavasigi igamai gahe maturu tea sige gahe gagani tea.

⁶Igamai gam haharagi ve igamai ira tangaloi tabanagi noi God gina mwasoamai hi u renige, a nomai rong ronghogo, nomai rongribi, ko a lologarea, gina magagi nona Vui Gogona, ko gina dom tabetabe lawua hogo.

⁷Gina leo hogo hi gam vevera, ko gina managi noi God, igamai gau labe siaga lo nomai togaana garea vena kokogoro gamai sibomai lo gineu doluegi.

⁸A sinobu lavasigi ram ladomavagi gamai nge lavasigi ram tauteu esi lumei. A sinobu lavasigi ram veve gineu rau esi vovohoi gamai, nge lavasigi ram veve gineu rau garea. A sinobu lavasigi ram veve ve igamai gau kelikeli, nge igamai gam veve na leo a hogo.

⁹A sinobu lavasigi rahe ilo gamai tea, nge igimiu neu ilo vurugegi gamai. Igamai u tatarise ve gau mate beno, gau lei na leo vevegi, nge gam mwaso tau mosigei.

¹⁰A nomai hahagavi u lawua, nge igamai gam havuhevu gesegi. Igamai gam mahogi, nge gam vai na sinobu u sao ram guqe gina lado hogo. Igamai hatie nomai gineu, nge a hogo, vataha na gineu a nomai.

¹¹Igamai gau laqa tabetabegi lawe gimiu lo togagi venue lawua Koren ko gau vugeri na taqangimei lawe gimiu.

¹²A rongrongomai lo tabetabe huri gimiu he mala mautu tea, nge igimiu neu toqe goro na rongrongomiu talo tabetabe huri gamai.

¹³Ineu nam laqa lawe gimiu mwerehi ve ira netuku. Igimiu nen vai lawe gamai mwerehi igamai gau vei lawe gimiu. Nen vurugegi na taqangimiu lawe gamai.

¹⁴Igimiu nehe mwereire tea hi rahe lado hogo tea. Siu igimiu nen mese bulu meire. A gareana ko a asiana roin he bubugi lai tea. A leleo ko a dodogi roin he bulubulu tea vage.

¹⁵?Wa i Kraes ko i Setan roin lado bubugi lei? ?A tangaloi ladohogo ko a tangaloi hi he lado hogo tea roin bubugi lei mwerehilogo?

¹⁶A valei tataro noi God vin he bubugi lei tea mena nunui tarabesi gineu, ko igide a valei tataro noi God hi mo mwaso. Mwerehi i God u veve vena, “Ineu nain toga meire ko nain dige lategi meire, ko nain voragi nora God, ko ingere rain voragi noku sinobu.”

¹⁷A Huqe u veve vage vena, “Nen siregi na sinobu ngerehi, nen tino vagahao denire. Nein mese tango lo gineu rahe mwasara tea. Siu huri nain lei vurugegi gimiu”,

¹⁸ko nain voragi tamamiu. Igimiu nein voragi renetuku ineu a God hogo, nau managi garagara.