Read East Ambae 2 KOREN 8 Bible Online

2 KOREN 8 - East Ambae bible

2 KOREN 8

¹Siu, retueku ko irehaqeku, igamai gam tarani ve igimiu nein ilo na hogogi noi God hi u bete lawe na warelue u sao lo togagi venue lawua Masedonia.

²A gineu esi lalawua rau vei lehire, nge ingere rau labe siaga tuturedu. Hatie huri lo nora mahogiana, ingere rau bete limara tabetabegi a vevenagi a nora havuhevu u lawua garagara.

³Ineu nain veve lai lawe gimiu ve rau bete limara u tatarise mwerehi ve rain bete, sige mo liu denie hi ve rain bete lai. Ihine tea he garoginire tea ve rain vei mwerehi.

⁴Ko ingere rau nevu tanogi ko rau garogi siagagi mei gamai ve gain siregi lawera ve rain bului lo tabana ngaha huri na sinobu noi God.

⁵Ko ingere rau bete limara lo matahala ngehi igamai gahe lado tare tea ve vin vei mwerehi. Tomuegi, ingere rau betera sibora lawe na Huqe ko lawe gamai vage. Ngehi a muei gineu i God mo tarani.

⁶Siu igamai gau nevuhi Taetas vena bului tuturedugi gimiu ve nen vai vunuhi na muei tabanagi ngaha talo hogogi noi God, a vevenagi ingeie hi u teuvuiginie.

⁷Igimiu neu mwerai hako gineu lo gineu doluegi hi ram eno lo limemiu, lo nomiu lado hogo, lo nomiu laqaana, lo nomiu iloilo, lo nomiu tarani rarai ve nein bului na tangaloi, ko lo tabetabe hi neu lei dein gamai. Siu, lo matahala mwerehi, igimiu nein labe siaga vage lo tabetabe huri na hogogi.

⁸Ineu nahe tau na leo siaga tea huri na gineu ngaha. Ineu nam matamwasaragi lawe gimiu ve a sinobu lavasigi a domire u mwamwavi ve rain bului. Siu lo matahala mwerehi ineu nam hikesi na domimiu ve igimiu neu tabe na wai tangaloi sige hatie.

⁹Igimiu neu ilo na hogogi noi noda Huqe i Jisas Kraes beno. Igimiu neu ilo ve i Kraes a mwerai hako gineu, ingeie u voragi na mahogi, ve gina nona mahogiana, bataha igimiu nein mwerai homu.

¹⁰Ineu nam lado ve nein vei mwere ngaha. Lo higao u rovo beno, igimiu a muegi hi neu tarani ve nein bete limemiu, ko igimiu hi a muegi neu bete.

¹¹Siu siserigi ngaha igimiu nen vai rovonagi na tabana hi neu teuvuiginie. Siu a nomiu lalakogi vin tatarise mwerehi nem tarani ve nein veie.

¹²Tare ve a domimiu u mwamwavi huri ve nein bete, i God vin lei vurugegi na nomiu hogogi vin huri na halai nomiu hako gineu, nge hatie lo gineu ngerehi hatie nomiu.

¹³Igamai gahe masinge tea ve gain teu na hakohako mava lumiu, sige ve gain veie vin mamarae lawera tangaloi dolue. Hatie! Igamai gam tarani ve a gineu doluegi rain tatarise mena sinobu doluegi.

¹⁴Lo taro ngaha lune a nomiu vivilakogi u sao, u tatarise ve igimiu nein hako meire lavasigi rau qilodo lo gineu. Siu lo taro hi igimiu nein qilodo lo gineu tare ve a nora u sao, ingere rain hago mei gimiu. Lo matahala mwerehi, igimiu nein vui bulubului gimiu vin tatarise.

¹⁵Mwerehi a Reve reve Gogona mo veve vena, “A tangaloi mo vano mo vile na hinaga u sao a gana he sao tea lawagi. Nge a tangaloi hi mo vile biti, a gana hinaga huri na nona taraniana.”

¹⁶Ineu nam veve gareagi God huri u vei Taetas mo lado garagara huri gimiu mwereieu.

¹⁷Lune igamai gau nevuhi Taetas vena siro gimiu, u veve huri ve u mesinge tabetabegi, a vevenagi a domine u lado garagara huri gimiu.

¹⁸Igamai gau hora na tangaloi tabanagi noi God gatagale ve vin vano mei Taetas, a tangaloi ngehi a tangaloi doluegi ram veve hageginie huri u waregi sere na Roro Garea.

¹⁹Ko vage, a tangaloi ngaha a warelue rau leowahea ve vin vano mei gamai lune igamai gam bete na mane hogohogo ngaha. Igamai gam vai na lalakogi ngaha ve na vai roroagi na Huqe ko mo haharaginie ve igamai gam tarani ve gain bului gina lolomai hogo.

²⁰Igamai gau leo huri vurugegi ve a tangaloi rain mese veve huri gamai lo matahalagi hi gam leohuri na nomiu hogohogo ngehi a sinobu rau bete gina dom tabetabe.

²¹Igamai gam vai leo ve gan vai na gineu hi mo vai havuhevugi na Huqe ko vage ngehi a sinobu ram lado ve u vovohoi.

²²Siu igamai gam hora tuada vena vano meire, a tangaloi hi mo tarani tamwere ve na bului. Ingeie u haharaginie sibona lawe gamai lo matahala u sao, ko siserigi ngaha ingeie mo tarani vena bului na vagevage, a vevenagi a nona ladohogo u siaga lumiu.

²³Vage huri Taetas, ingeie a buluiku, ingeie mo tabana meieu ve gori bului gimiu. Ko huri retuada lavasigi, a warelue u horara, ko ve ran vai roroagi Kraes.

²⁴Siu igimiu nen haharagi na gigilegi nomiu tabetabe lawe na tangaloi ingere ngaha ko giniehi igamai gam sage gamai huri gimiu. Siu a warelue doluegi rain leo laie.