Read East Ambae 2 KOREN 9 Bible Online

2 KOREN 9 - East Ambae bible

2 KOREN 9

¹Ineu nahe lado tea ve nain uli na leta lawe gimiu huri na buluiana hi neu bete huri na sinobu noi God.

²Ineu nam ilo huri ve igimiu nem tarani ve nen bului. Ineu nau sagegi na gineu hi lawe na sinobu lo togagi venue lawua Masedonia, nam veve lawera ve igimiu lo duvi venue Akaea, igimiu neu rarai ve nein bete nomiu hogogi lo higao hi u rovo beno. Ko a nomiu taraniana hi ve nein betebete u vei na sinobu u sao ram rarai ve ran betebete vage.

³Siu siserigi ngaha ineu nam hora retuada gaitolu vanatu lobemiu, ve a nomai leo gam sagegi gimiu huri na gineu hi, hatie gina leo vurogi. Ineu nam tarani ve igimiu nein vei rarai mwerehi nau veve lawe gimiu beno.

⁴Tare ve ihine tea dena togagi venue lawua Masedonia mo vanai meieu ko mo haqea ve igimiu nehe rarai tea, igamai gain maemae huri ve gau ilo vurugegi huri igimiu. Ko igimiu nein maemae vage.

⁵Giniehi, ineu nam lado ve u garea ve nain nevuhi retuada ve rain vanaturain lehi gimiu tomue siu gabei vanatu. Ingere rain vile vagasigi na hogogi tabetabegi ngehi neu warataugi teu ngehi vin rarai lune gain vanatu. Ko vin voragi na hogogi tabetabegi, hatie ve ngehi nem bete gina lolo hari.

⁶Igimiu nein lado haqe na gineu ngaha. A tangaloi mo rivu na rivurivu u biti vin vile na mwasi rivurivu u biti, nge a tangaloi a bulana rivurivu u lawua vin lei na mwasigi vin lawua.

⁷Siu igimiu gagatalegi nein bete vin huri na lolo lolomiu. Igimiu nein mese hahagavi lune nem betebete ko igimiu nein mese betebete tare ve a loloi taqangimiu he havuhevu tea. I God mo lolo garea gina tangaloi hi mo bete tabetabegi.

⁸Ko i God vin bete na vai garea lawe gimiu vin liu denie hi nem tarani. A nomiu gineu vin sao huri na tabanagi garea doluegi.

⁹U uli lo Reve reve Gogona vena, “Ingeie mo bete tabetabegi lawera mahogi. A gineu hi mo vaire hi rau vovohoi ko rain eno vagi tuei.”

¹⁰I God ingeie hi u bete na toli lawe na tagitalu ko mo bete na bereti lawea gi gana hinaga. Ingeie vin bete na toli hi nem tarani garagaraginie lawe gimiu ko ingeie vin vaga mauriginie, nein lei na mwasigi u lawua dena nomiu tabana garea.

¹¹Ingeie vin vei gimiu nein mwerai hako gineu lo matahala doluegi siu huri ve a sinobu u sao rain veve gareagi God huri na nomiu hogogi tabetabegi ngehi igamai gau bete lawera.

¹²A tabana ngaha he bului na taraniana nora sinobu noi God tea hogosie, nge mo bete na veve garea lawe God mo saosao vage.

¹³Ngehi a gigilegi nomiu lado hogo. A sinobu sao rain ware gareagi God a vevenagi igimiu neu ronghuri na Roro Garea noi Kraes, a leo garea hi nem veve huri ve nem lado hogo ginie, a vevenagi igimiu neu wahegi tabetabeginie lawera ko lawe rahine wagineu vage.

¹⁴Ko lune ingere ram tataro, ingere ram tarani ve rain bubugi mei gimiu a vevenagi huri na hogogi lawua ngehi i God u betea lawe gimiu.

¹⁵Veve garea huri na nona hogogi a gineu garigiana hi dau gerigi samweginie lo leo.