Read East Ambae KALESIA 2 Bible Online

KALESIA 2 - East Ambae bible

KALESIA 2

¹Lo tagui higao hangavulu domwagi gaivesi, ineu nau vano taligu Jerusalem toku Banabas, nau lei Taetas vage meieu.

²Ineu nau vano aiehi a vevenagi i God u serelue laweau ve nain vano. Gau sone bubugi meire tomtomuegi nora tangaloi rau ladohogo gahe gamai, nau veve sere lawera ve ineu nam waregi sere na Roro Garea lawera sinobu hatie duvi Israel. Ineu nahe tarani tea ve a noku tabana ta tomue ko a tabana hi nam vaie siserigi ngaha ve vin mwasara vurugegi.

³I Taetas igamai bulu lo tarogi hi, nge nahe garoginie tea ve vin lei na teve gigilegi, hatie huri ingeie ta Krik.

⁴Igamai gau laqagi na gineu ngaha a vevenagi a tangaloi ladohogo kalikeli rau vanai belugi lolo nomai burigi. Ingere rau vanai mwere na mataduru ram vai leo ve ran talelegi dori na togaana mariqe hi gau leie lui Jisas Kraes. A nora tarani ve rain vei gamai ve gain voragi tangaloi tabanagi vurugegi taligu.

⁵Nge igamai gahe siregi tea mahogi lawera tangaloi ladohogo kalikeli ngerehi. Igamai gau lado ve a hogo ta lo Roro Garea ve na vano tuturedu lawe gimiu.

⁶A tomtomuegi ngerehi ram lado sibora ve ingere a tangaloi lalawua, nge rahe leahi lei na Roro Garea tea hi ineu nam waregi serea. Ineu hatie domianagi meieu huri na gineu ngaha tare ve rau lawua sige hatie. Huri lo nagoi God a tangaloi doluegi rau tatarise.

⁷Nge a tomtomuegi ingere ngaha rau lehe ve i God u bete na tabana ngaha laweau ve nain veve sere na Roro Garea lawera hine hi hatie duvi Israel, u mwerehi vohogi ngehi i Bita u waregi sere na Roro Garea lawera duvi Israel.

⁸I God u bete na huireana lawe Bita ve vin tabana mwere na gaihora huri na sinobu a duvi Israel. Nge u bete na huireana laweau vage ve nain tabana mwere na gaihora huri rahine hi hatie duvi Israel.

⁹I Bita, i Jemis ko i Jon, huri ve ingere a tomtomuegi, rau ilo huri ve i God u bete na hogogi laweau u wegineu, siu ram lai vurugegi Banabas ko ineu. Ram lado bubugi ve ingere rain vano lobera duvi Israel ko ve igamai gain vano lobera hi hatie duvi Israel.

¹⁰A gineu gatagale hogosie, rau nevu dein gamai ve gain ladobibi ve gain buluire mahogi. A gineu hi ineu nau tarani garagara ginie ve nain veie.

¹¹Lune i Bita u vanai Antiok, ineu nau gato siaga lo nagona a vevenagi ingeie u vagasile.

¹²I Bita u gagani meire tangaloi ngerehi hatie duvi Israel mo dadari lune hi a duvi Israel lavasigi i Jemis u horara ram vanai Antiok. Lune ram dadari, i Bita mo siregi he gagani tea meire duvi Israel taligu ko mo vile wahea sibona denire. Huri ingeie mo matagu ginire duvi Israel.

¹³Siu i Bita ingeie i kaligoro, mwere ira duvi Israel lavasigi hi rau bulu meie. Vage i Banabas, a duvi Israel hi rau ladohogo rau veie mo vai mwerehi ingere rau veie.

¹⁴Lune ineu nau lehe ve ingere rahe huri na hogo tea talo Roro Garea, nau laqa siaga lo nagoi Bita. Ineu nau veve vena, “Bita iniko a duvi Israel, iniko goin he toga tea mwere na duvi Israel. Nge goin toga vin huri na mwasoai sinobu ngerehi hatie duvi Israel. ?Siu huri havagineu igimiu nem garoginire hi hatie duvi Israel ve ran toga na huri na doridorinai togana nora duvi Israel?

¹⁵Igide dahe vora tea mwereire hi hatie duvi Israel hi rau galegaleasi, nge dau vora vovohoi dena duvi Israel.

¹⁶Giniehi, igamai gau ilo vea tangaloi mo vovohoi lo nagoi God, hatie ve a vevenagi hi mo huri vurugegi na Leohora, nge gina lado siaga talui Jisas Kraes.

¹⁷Igide ira duvi Israel dau vanai lobei Jisas dau veileo ve dain vovohoi lo nagoi God, ko ngehi mo haharagi matawasaraginie ve igide ira galegaleasi vage. ?Wa ngehi a iloilogi huri Kraes mo vagamwamwavigi na domiana huri na galegaleasi? !Hatie vohogi!

¹⁸Nge ineu nain voragi lengi hogo, tare ve nam tauvuigi nam huhui na gineu ngerehi nau siregi vovohoiginire beno.

¹⁹A Leohora hi u vei vagamateau, nau mate mena Leohora siu huri ve nain maso lai mei God.

²⁰Ineu nau mate mei Kraes lo gai saroutu, ko ineu nahe mwaso tea taligu, nge i Kraes hogosie hi u toga lolo loloku. Ineu nam toga mosigei lolo tarabesiku, nge nam toga gina ladohogo lui Netui God hi u tabeau ko u sireginie sibona vena vagamwasoieu.

²¹Ineu nahe masinge tea ve nain rahagi na hogogi noi God. Nge tare a Leohora mo vai na tangaloi mo vovohoi lo nagoi God, ngehi mo haharagi ve a mateana noi Kraes hatie iloilogi lune.