Read East Ambae KALESIA 3 Bible Online

KALESIA 3 - East Ambae bible

KALESIA 3

¹Igimiu ira sinobu ta Kalesia neu ilo vurugegi huri na mateana noi Jisas Kraes lo gai saroutu. Nge igimiu mala robagi, nem siregi lawe hine tea ve na lama gimiu.

²Igimiu nen veve na gineu gatagale ngaha laweau. ?Igimiu neu lei na Vui Gogona mwerehilogo? ?Wa neu lei na Vui Gogona a vevenagi neu ronghuri na Leohora? Hatie, neu lei na Vui Gogona a vevenagi igimiu neu rongo na Roro Garea ko nem ladohogo ginie.

³Igimiu neu teuvuigi na mwasoamiu lui Kraes lo Vui. ?Wa siserigi ngaha igimiu nem vai leo ve nen vai vagasiginie lo nomiu huireana sibomiu? Nge a reraana.

⁴?Wa a nomiu lado hikehike rau mwasaru vurogi? Nam lado ve hatie.

⁵?Wa i God u bete na Vui ko a vaigi vui lawe gimiu a vevenagi neu huri na Leohora? Hatie, ingeie u vei na gineu ingere ngaha a vevenagi neu rongo na Roro Garea ko nem ladohogoginie.

⁶A Reve reve Gogona mo veve na gineu nge tauhi huri Ebraham. “I Ebraham u ladohogogi God ko i God mo lai vurugegi na ladohogo noi Ebraham, ko a ladohogo hi u veie mo vovohoi lo nagoi God.”

⁷Siu huri ve igimiu nein ilo vurugegi ira netui Ebraham hogo, ingere hi rau ladohogo.

⁸A Reve reve Gogona u veve huri na gineu ve vin vei te tagaha, u veve ve i God vin vei na sinobu ngerehi hatie duvi Israel rain vovohoi lo nora ladohogo. A Roro Garea ngaha u veve sere lawe Ebraham tomue siu mobei vei, mwerehi a Reve reve Gogona mo veve vena, “A qatui venue lalawua doluegi rain lei na vai garea lumiu.”

⁹Siu ira hine doluegi hi rau ladohogo mwerehi i Ebraham u ladohogo, rau lei na vai garea mwerei Ebraham vage.

¹⁰Nge rahine ram lado talo Leohora hi ram hurie ve vin veire rain vovohoi, ingere ram toga lo vavai leo vevegi, a vevenagi a Reve reve Gogona mo veve vena, “Ihine tea vin lei na leo vevegi tare ingeie he ronghuri na havagineu tea hi rau uli lolo buk huri na Leohora, ingeie beno lo vavai leo vevegi noi God.”

¹¹Siu siserigi ngaha u matamwasara ve a tangaloi vin he vovohoi lai tea lo nagoi God gina Leohora, a vevenagi a Reve reve Gogona mo veve vena, “Irahine hi rau vovohoi lo nagoi God, rain toga vin huri na nora ladohogo lune.”

¹²A Leohora he labe tea lo ladohogo. A Leohora hi mo veve vena, “A tangaloi mo ronghuri na gineu ingere ngaha vin mwaso a vevenagi a gineu ngerehi.”

¹³I Kraes u lei vohogi na vevegi hi a Leohora u teu lude. Ingeie u leahi gide ko u teue sibona lo vavai leovevegi. U uli lo Reve reve Gogona vena, “A tangaloi rau ue vagamatea mo dule lo gain ngehi u toga lo vavai leovevegi noi God beno.”

¹⁴I Kraes u veie mwere ngaha huri ve a vai garea hi u warataugi lawe Ebraham vin lei lui Jisas Kraes lawe rahine hi hatie duvi Israel. I Jisas u mate huri ve gina noda ladohogo igide dain lei na Vui hi i God u warataugi teu.

¹⁵Retueku ko irehaqeku, ineu nain vei na mataleleogi huri na gineu hi dam vai vataha bongi. A tangaloi gairue rom lado bubugi lo havagineu tea rom labe siaga lo nora waratau, ihine tea vin he vai utu leie tea sige vin he tau tea gineu lo ulugi taligu.

¹⁶Siu i God u vei na waratau lawera vunu, lawe Ebraham ko lawe na duvine. A Reve reve Gogona he veve tea ve, “lawera duvimu.” Ngehi a dilogi mo tatangi ve a sinobu u sao. Nge i God mo veve vena, “ko lawe na duvimu.” Ngehi a iloilogi huri ve i God mo laqagi huri na tangaloi gatagale, a tangaloi hi i Kraes.

¹⁷A iloiloi noku leo nge ngaha, i God u vei na dom bubugi mei Ebraham ko mo waratau ve vin wiribibi siagaginie. A Leohora hi u vanai lo tagui higao vudolue vagavesi avigi ngavulu gaitolu. A Leohora hi vin he tau leahi na lado bubugi hi tea ko huri ve na vai vohogi na waratau noi God hi u vei lawe Ebraham.

¹⁸Tare ve igide dam lai na gineu ngerehi i God mo bete lawe gide a vevenagi dam huri na Leohora, ngehi mo gigilegi ve a waratau noi God mo rovo tahi, igide dain he lai na gineu tea dena waratau ngerehi. Nge i Ebraham u lei na gineu doluegi hi i God u bete lawea, huri i God u warataugi teu ve vin veie mwerehi.

¹⁹?Siu a Leohora mo labe huri na havagineu? A Leohora u vanai vena haharagi ve a gineu rau esi hi a sinobu ram vai, mo qalogoro na taraniana noi God. A Leohora hi u labe mo dadari a tangaloi hi i God u warataugi teu hurie tuei, u dadari beno. Lune a Leohora u vanai a engsel noi God rau bete lawe Mosis mwere ve ingeie a tuduviduvi, huri ve ingeie vin welie mo bete lawe na sinobu.

²⁰Nge i God gatagale hogosie, siu a hogo, i God he tarani na tuduviduvi tea.

²¹?Wa inge ngaha a iloilogi huri ve a Leohora mo qalogoro na waratau noi God? !Hatie vohogi! Vin voragi na leohogo hogosie, tare ve a Leohora mo vai gide dam vovohoi. Nge i God he bete na Leohora tea hi ve vin lei na mwasoana.

²²Lo domianagi tuegi vage, a Reve reve Gogona u haharagi ve a ureure doluegi mo toga vau lo galegaleasi. U vei mwere ngaha huri ve a gineu ngerehi i God u waratauginire vin betera lawe rahine hi rau ladohogo lui Jisas Kraes.

²³Tomue siu a ladohogo ngaha u vanai, igide dau toga vau a vevenagi a Leohora. Hatie mwadurugi mei gide, mo dadari i God u haharagi na matahalai ladohogo hi mo vanai.

²⁴Lo leogi tuegi vage, a Leohora u leogoro gide mo dadari i Kraes u vanai huri ve igide dain vovohoi lei lo nagoi God lo noda hogogi.

²⁵Siserigi ngaha a matahala huri na ladohogo u dadari beno ko igide dahe toga tea lo vavai huireanai Leohora.

²⁶Igimiu doluegi neu geruhi gogona lui Kraes, ko igimiu doluegi nem saru goro gimiu gi Kraes. Ngehi a iloilogi ve igimiu doluegi ira netui God lo ladohogo lui Jisas Kraes.

²⁸Lui Kraes hatie huri iniko a hava tangaloi. Tare ve lavasigi den gimiu ira duvi Israel, sige lavasigi ingere a tangaloi tabana vurogi, sige lavasigi hatie tangaloi ve mo huqegi gorora, vage lavasigi ingere a mwera, ko lavasigi ingere a vavine. Igimiu doluegi neu bulu lui Kraes.

²⁹Igimiu ira noi Kraes, siu igimiu ira duvi Ebraham. Igimiu nein leihougi na vaigarea noi God doluegi, a vevenagi huri na waratau hi i God u veie lawe Ebraham.