Read East Ambae KALESIA 4 Bible Online

KALESIA 4 - East Ambae bible

KALESIA 4

¹Siu ineu nam tarani ve nan veve ngaha lawe gimiu. Irahine hi rain leihougi na vivilakogi noi retamara lune ram maresu teu, ingere rahe wagineu tea dena tangaloi tabana vurogi. Hatie huri rau lei hougi na gineu doluegi.

²Lune ram maresu teu, ingere rain ronghuri rahine hi rau leowahe ve rain leohurire. Nge lune a maresu rain sesea vin tatarise lo higaogi hi tamara rau tovo rarai teu, ingere rau meriqe dena limara hi rau leohurire, ko ram leo hurire sibora.

³Huri gide, u tatarise mwerehi vohogi. Lo taro gatagale, igide dau mwere na maresu, dau toga mo huri na tauleo talo ure ngaha mwere na tangaloi tabana vurogi.

⁴Nge lune a taro vovohoi u dadari, i God u hora netune ngehi u vora lo vavine, ko u toga lo vavai tauleo.

⁵I God u veie ngaha, vena voli tuguhi rahine hi ram toga lo vavai tau leo ko huri ve igide dain voragi renetune.

⁶Siserigi ngaha igimiu ira netui God, i God u hora na Vui noi Netune sulo lolo loloda, ko a Vui hi mo ngaragi vena,” Mama Tamaku.”

⁷Siu siserigi ngaha igimiu neu meriqe, igimiu ira netui God ko i God vin bete na vaigarea lawe gimiu ngehi u warataugi teu, a vevenagi igimiu ira netune.

⁸Tuei igimiu nehe ilo God tea. Igimiu neu voragi tangaloi tabana vurogi lawera god kalikeli.

⁹Nge siserigi ngaha igimiu neu ilo na God hogo. A hogo, i God hi u ilo gimiu. ?Siu huri havagineu igimiu nem walidori nem huri na God ngerehi rau kekena ko a tauleo hi neu hurire tuei? ?Wa igimiu nem tarani ve nen voragi tangaloi tabana vurogi lawe na gineu ngerehi taligu?

¹⁰Igimiu nem huri na leohuhui tau mosigei huri na rani ngerehi a muei reni, a vule, a taro ko a higao.

¹¹Ineu nam matagu mei gimiu, ve a noku tabana huri gimiu u mwasaru vurogi.

¹²Retueku ko irehaqeku, ineu nau dori nam mwerei gimiu, Siu nam tiehi gimiu ve nen dori nen mwereieu. Igimiu neu garea meieu tomue.

¹³Igimiu nein lado haqe ve ineu nau vonatu lobemiu waga tomue radu a vevenagi a segeana u veieu, ko nau waregi sere na Roro Garea lawe gimiu.

¹⁴Hatie huri a gaku segeana u voragi na gineu mava lawe gimiu, igimiu nehe lolo asigieu tea sige ve nem hora mulegieu. Nge igimiu neu lei vurugegieu mwere ve ineu a engsel noi God, mwerehi ve ineu i Jisas Kraes sibona.

¹⁵Siu igimiu neu hevuhevu u liu, ?Nge a nomiu havuhevu ngehilogo siserigi ngaha? Ineu siboku nam rarai ve nain veve sere ve igimiu neu dange vohogi na matamiu ko nen betera laweau, tare ve nein vei lei mwerehi.

¹⁶?Wa ineu a nomiu tavului vuro, a vevenagi nam veve na hogo lawe gimiu?

¹⁷A sinobu ngerehi ram haharagi na nora rong garea gi gimiu u liu, nge a nora domdomi rahe garea tea. A nora tarani hogosie ve ran vile wahe gimiu denieu, huri ve igimiu nein rong gareaginire mwerehi ingere rau rong gareagi gimiu.

¹⁸Siu u garea huri ve a sinobu rain haharagi ve ram rong gareagi gimiu, nge hogosie tare a domianagi u garea. U garea vage lawera ve rain haharagi ve a hogo vin eno tahi gesegi. Hatie ve lo tarogi hi nam toga mei gimiu hogosie, nge vage lune hi ineu hatie mei gimiu.

¹⁹Ira netuku mweratabe, ineu nam rong na gagarasi mwere na vavine mo gagarasi mei netune vena vora. A gagarasi hi vin eno luku vin dadari a dorimiu vin leahi ve na mwere na dori Kraes.

²⁰Ineu nam rongoe ve ineu lobemiu siserigi ngaha, siu huri ineu nain laqa lai lawe gimiu lo matahala u wegineu a vevenagi ineu nahe ilo tea ve nain bului gimiu mwerehilogo.

²¹Siu lavasigi dein gimiu ram tarani ve ran toga lo vavai tauleo. Igimiu nen veve laweau. ?Wa igimiu neu ilo na havagineu hi a Leohora mo veve?

²²A Reve reve Gogona u veve ve i Ebraham i netune a mwera ingere gairue. Gatagale u vora lo vavine hi mo tabana vurogi ko inetui Ebraham tuegi u vora lo vavine hi he toga vau tea.

²³I netune mwera lo vavine tabana vurogi u vora mo huri na doridorigi mwerehi a maresu haro mo vora, nge i netune mwera hi lo vavine he toga vau tea, u vora mo huri na waratau.

²⁴Siu, igide dain lei na valuhuri gairue ngaha, mwere na tavalui leo. A vavine gairue hi, mo haharagi na waratau gairue. A vavine muegi hi i Heka, i renetune rau vora lo toga vau. Siu i Heka hi mo labe huri na waratau ngehi i God u veie meire nona sinobu lo vusi lawua Saenai.

²⁵Siu i Heka mo labe huri na vusi lawua Saenai lo vanue Erabia, ngehi a nunui togagi venue lawua Jerusalem hibagataha, a vevenagi ingeie mo toga vau meire nona sinobu.

²⁶Nge a Jerusalem lo eulu he toga vau tea, ko ingeie i retahide.

²⁷Huri a Reve reve Gogona mo veve vena, “Gon havuhevu, iniko a vavine gohe bavabava tea. Gon ulo ko gon ngara gina haha vusiana, iniko hi gohe rongo na gagarasi tea vohogi lune a maresu mo ve na vora!”

²⁸Siu retueku ko ire haqeku, igimiu ira netui God mo huri nona waratau, mwerehi u warataugi teu huri Aesak tuei redu.

²⁹Lo tarogi hi, a maresu i Ismael ngehi u vora lo matahala mwerehi a maresu haro mo vora, mo vaivei na maresu hi i Aesak u vora lo Vui noi God, ko mo mwerehi tau hibagataha.

³⁰?Nge siu a Reve reve Gogona mo veve mwere hilogo? Mo veve vena, “Gon hora vohogi na vavine tabana vurogi ko i netune, huri netui vavine tabana vurogi, hatie leosiregi lawea ve vin lei hougi na hava gineu tea dena vivilakogi noi tamana. A gineu doluegi hi rain vano lawe netui vavine hi he toga vau tea.”

³¹Giniehi, retueku ko irehaqeku, igide hatie ira netui vavine tabana vurogi, nge igide ira netui vavine hi toga vau tea.