Read East Ambae KALESIA 6 Bible Online

KALESIA 6 - East Ambae bible

KALESIA 6

¹Retueku ko irehaqeku, tare veve gatagale dein gimiu mo soi lo galegaleasi, igimiu hi nem hakovi na Vui noi God, nein vei vovohoi ginie, nge nein vei rorongo ginie. Ko nein leo huri vurugegi gimiu, vaiteu nem soi lo kalikeli vage.

²Nein vui bulu bului gimiu lo nomiu hakohako mava ko lo matahala mwere ngaha, igimiu nem rongtabe na tauleo noi Kraes.

³Tare ve ihine tea mo lado sibona be ingeie i lawua, nge lo leoleonagi ingeie hatie gineu lune, ingeie mo kalie sibona.

⁴A tangaloi gagatalegi vin vei lehie sibona lo hava gineu tea hi u veie, tare u garea, siu mobei sage ginie sibona nge vin he tatarise ginie tea sibona lo gineu tea a tangaloi wagineu u veie.

⁵Huri a tangaloi gagatalegi vin weli na nona hakohako sibona.

⁶Ihine tea mo lai na leo huhui lolo Roro Garea, vin wahegi na gineu gagareagi doluegi mena nona huhui.

⁷Nein leo huri ve nein mese veve leo kalikeli vovohoi God. Huri a hava toli tea a tangaloi mo gaburegi, ingeie vin weli na mwasigi.

⁸Tare ve ihine te mo gaburegi na toli gineu rau esi, ingeie vin weli na mwasigi rau esi, ngehi a mateana, nge tare ve mo gaburegi na toli gineu talo Vui, ingeie vin weli na mwasigi hi a mwasoana tavagi tuei.

⁹Igide da mese wiriwiri lo gineu garea hi dom vai, tare dam vantuturedu dam vaie mwerehi, a taro vin vanai lune igide lei na mwasigi lo noda tabanagi huire.

¹⁰Giniehi, a tarogi tau mei gide ve da vai gineu garea lawera sinobu doluegi, hageliu lawera hi ram ladohogo,

¹¹Igimiu nen leo ineu nau vei na leta lalawua lune nau uli lawe gimiu gina limeku siboku.

¹²Irahine ram tarani ve ran garogi gimiu ve nen lai na teve gigilegi, ingere hi ram lado hage ginire sibora huri na gineu talo tarabesigi hogosie. Ram vaie mwere ngaha, a vevenagi ingere ram ilo ve a tangaloi vin he vai veire tea lo tarogi hi ram toretoregi na mateana noi Kraes lo gai saroutu.

¹³Huri irahine hi rau lei na teve gigilegi beno, rahe vai na gineu tea hi a leohora mo taranie.

¹⁴Nge hurieu, ineu nain sageau huri na gai saroutu noi Jisas Kraes hogosie. Huri i Kraes u mate lo gai saroutu, i God i vei vohogi na huireana gineuhi ureure ngehi rau eno luku, ko mo vaieu nam toga tabetabegi dena gineu esi ngerehi.

¹⁵Tare ve a tangaloi mo ladohogo lui Kraes, hatie huri tare ve, mo lai na teve gigilegi sige hatie, nge a gineu mo eno hageliu, ngehi i God mo vaie mo voragi tangaloi garaqa.

¹⁶Nge hurire hi ram huri vurugegi na tauleo ngaha lo mwasoara, ve a tamwata ko a domhahagavi na toga meire, ko hatie meire hogosie, nge meire sinobu noi God doluegi.

¹⁷Vagasigi, ineu nahe tarani tea ve ihine tea vin vei romasi gieu taligu, a vevenagi a tarabesiku u tatavilara doluegi, ngehi mo haharagi ve ineu a tangaloi tabana vurogi noi Jisas.

¹⁸Ko ve a hogogi noi noda Huqe i Jisas Kraes na toga mei gimiu doluegi. Amen.