Read East Ambae EVESAS 1 Bible Online

EVESAS 1 - East Ambae bible

EVESAS 1

¹Ineu Bol gaihora noi Jisas Kraes. Ineu nam voragi gaihora mo huri na havagineu hi i God u taranie. Ko lawera sinobu gogona noi God lolo togagi venue lawua Evesas, ingere hi ram lado hogo lui Jisas Kraes.

²A tamwata ko a hogogi mo vanai dein God a mama ko a Huqe i Jisas Kraes.

³Waregi roroi God ko i tamai noda Huqe i Jisas Kraes. Lui Kraes i God u bete na vai garea talo Vui doluegi lawe gide den eulu.

⁴Huri ve lui Kraes, i God u leowahe gide tomue siu mobei teu na ure siu huri ve igide dain voragi nona sinobu gogona, a sinobu hatie malelei gineu esi lure lo nagona.

⁵I God u lado rarai ve vin vei gide dain voragi renetune sibona lui Jisas Kraes, a vevenagi mo huri na nona tabetabe. Ngehi a gineu u taranie ko u vei havuhevu ginie,

⁶ko mo lai na vevegarea lawe God vevenagi huri na nona hogogi lawua. I God u bete na hogogi lawe gide mo huri na nona tarani tabetabegi lui Kraes hi u tabea.

⁷Lui Kraes, igide dam mariqe gina dai nona mateana lo gai saroutu, ko ngehi mo vai gide dam lai na ladovohogi na bugui noda galegaleasi mo huri na nona dom tabatabe lawua,

⁸ngehi u bete tabetabegi na nona hogogi lawua lawe gide. I God u vagahorongi gide gina nona mataisao ko a rongrongo hogo,

⁹vena vai gide ve da ilo na nona gineu hiligiana. I God a nona taraniana ve vin mwerehi, u ladogi vagatai ve vin veie lui Kraes.

¹⁰A nona tanoi dovodovo ve vin vei na gineu ngaha, lune a tarogi vovohoi vin vanai, ngehi huri ve a gineu doluegi lo eulu ko lo tano rain bulu bubugi mei Kraes mwere ve ingeie a qatagi gineu doluegi.

¹¹Lune i God u vei rarai na gineu ngaha, i Jisas u bulu meie, siu i God u leowahe gamai ra duvi Israel ve gain voragi nona sinobu leowahe. Ingeie u vei na gineu ingere naha mo huri na lado rarai, mwerehi u taranie, siu ingeie u veie ngaha lawe gamai, a vevenagi a nona lado vagatai ngaha u veie lo vuigi redu.

¹²Igamai a muei sinobu hi gau teu na nomai ladotare lui Kraes ko u leowahe gamai huri ve gain bete na waregarea ko a roroa lawe God.

¹³Ko igimiu vage hi hatie duvi Israel, ko i Kraes u bulu bubugi mei God siu i God mo tau na nona gigilegi lumiu ve igimiu ira nona sinobu vage. Igimiu neu rongo na leo huhui hogo beno. Ngehi a Roro Garea hi i God u vei vagamwasoi gimiu ko lune igimiu neu rongoe, nem lado hogo lui Kraes. Siu i God mo tau na nona gigilegi lumiu ve igimiu ira nona sinobu, a vevenagi u bete na Vui Gogona lawe gimiu mwerehi u warataugi teu.

¹⁴A vevenagi a Vui Gogona mo toga lude, igide dam ilo vurugegi huri ve dain leilei na gineu ngerehi i God u vei rarai ve rain voragi noda. A Vui Gogona mo haharagi ve i God vin vei gide hi u voli tuguhi gide beno, dain meriqe vohogi. Siu u vovohoi lawe gide ve da tabe hagagi na henai God gesegi huri na nona vaivei garea.

¹⁵Giniehi, lune ineu nau rongo na nomiu lado hogo lui noda Huqe i Jisas Kraes ko a nomiu tabetabe huri na sinobu noi God doluegi.

¹⁶Lo noku tataro, ineu nam veve gareagi God. Ineu nam lado gimiu gesegi lo noku tataro,

¹⁷nam navu dena God noi noda Huqe i Jisas Kraes, i mama u roroa, ve na bete na vui mataisao ko a serelue lawe gimiu siu huri ve igimiu nein ilo vurugeginie.

¹⁸Vage ineu nam tataro huri ve a nomiu rongrongo hogo vin lawua lolo lolomiu siu huri igimiu nein ilo na vaigarea lalawua noi God ko rau roroa vage, ngehi u warataugi teu lawera nona sinobu gogona.

¹⁹Ko igimiu nein ilo ve a managi noi God u lawua u liu huri gide hi dam ladohogo. A managi hi u tatarise mena huireana lawua,

²⁰ngehi i God u vei ragasi Kraes dena mateana ginie ko mo taue lo matuana eulu garagara.

²¹I God u teu Kraes mo mamalu goro na huqegi doluegi, ira hine hi rau lawua ram hago huireana, ko a ratahigi doluegi, hatie ve lo ure ngaha hogosie, nge lolo ure tuegi vage.

²²I God u teu Kraes mo Huqegi goro na gineu doluegi ko u veie mo lawua goro na gineu doluegi huri na warelue,

²³ngehi a tarabesi Kraes. A warelue mo horo gi Kraes mo vagahorongi na gineu doluegi lo matahala doluegi.