Read East Ambae EVESAS 2 Bible Online

EVESAS 2 - East Ambae bible

EVESAS 2

¹Tuei igimiu neu mate lo vui a vevenagi a nomiu galegaleasi ko a gineu ngerehi neu veire rau qalogoro God.

²Io, tuei igimiu neu toga mwerehi a ureure mo toga, ko neu toga mo huri na huireana rau esi talo ure ngaha. A vui esi inge tau hi mo tabanagi lolo taqangire tangaloi ngerehi rahe masinge tea ve rain rong huri God.

³Tuei igide doluegi dau toga mwereire vage, dau vei leo ve dain vei havuhevugi na taratarani esi ko dam vai na gineu doluegi ngehi a tarabeside ko a domide mo taranie. U vovohoi ve igide dain lei na lolo gagasi noi God mo huri na noda doridori esi. Igide dahe wagineu tea dena sinobu doluegi.

⁴Nge huri i God a nona hahagavi u lawua, ko u tabe gide u liu.

⁵Hatie huri igide dau mate lo vui, a vevenagi huri na gineu ngerehi dau veire goro na nagoi God, ingeie hi u bete na mwasoana garaqa lawe gide. Lui Kraes igimiu neu mwaso gina dom tabetabe noi God.

⁶Ko u ragasi gide mei Kraes, ko u velu bubugi gide meie a eulu garagara. U veie mwere ngaha huri rahine hi ram huri Kraes.

⁷Siu huri ve lo taro mo vano ingeie vin haharagi na nona dom tabetabe lawua gina nona lologarea lawe gide lui Jisas Kraes.

⁸Ineu nam veve mwere ngaha, huri ve igimiu neu mwaso gina dom tabetabe noi God lo nomiu lado hogo. Igimiu nehe vagamwasoi gimiu tea sibomiu, nge ingeie hi a hogogi u vanai dein God.

⁹Hatie mwere na gai tawe hi nem lai lo nomiu garohuri lo tabanagi, siu igimiu nein he sage gimiu tea huri na gineu hi.

¹⁰I God u teu gide ko u lei bubugi gide mei Kraes, huri ve igide dain vei na tabanagi rau garea ngehi u domigi vagatai huri gide tuei beno huri gide ve dain tabanagi lure lo mwasoada.

¹¹Igimiu nein mese galuvegi, ve tomue igimiu nehe ilo God tea. Nge ira duvi Israel ram veve huri ve rau lei na teve gigilegi beno, ko ram tavuigi ram veve asiesigi gimiu, huri ve igimiu nehe lai na teve gigilegi. Nge a leo hi mo laqagi huri na gineu a tangaloi ram vai lo tarabesire hogosie.

¹²Igimiu nein lado haqe ve tuei i Kraes he toga tea mei gimiu, igimiu neu mwere na tavanaiana, igimiu hatie duvi Israel, igimiu hatie henamiu lo waratau hi i God u warataugi tea lawe na nona sinobu. Hatie nomiu lado tare, a vevenagi nehe ilo God tea.

¹³Nge siserigi ngaha igimiu hi neu vagahao dein God, nem vanai mo kakarani gina dai Jisas Kraes lo nona mateana.

¹⁴I Kraes sibona ingeie a noda tamwata. U veire duvi Israel ko a sinobu ngerehi hatie duvi Israel ram voragi sinobu gatagale. Ingere rau vile wahe mwerehi ve a qetuqetu mo labe wahera, nge i Kraes u reve surigi na gineu garagarasi hi u mwere na qetuqetu gina tarabesire sibona.

¹⁵I Kraes u teu hivogi na Leohora noi Mosis mena gorogoro talo Leohora doluegi. I Kraes u veie mwere ngaha vena vai na sinobu buri gairue hi ve ron voragi sinobu garaqa lune ko lo matahala mwerehi, mo vai gide dam toga lo tamwata.

¹⁶U eno lo domi Kraes vage huri ve vin vei utu na gineu gagarasi hi mo eno lo buri sinobu hala gairue, vena vai na sinobu buri gairue hi ron voragi tarabesigi gatagale, ko vena laire taligu vano lawe God. I Kraes u vei na gineu gina nona mateana lo gai saroutu.

¹⁷I Kraes u vanai ko u waregi sere na tamwata lawe gimiu hi neu vagahao dein God, ko vage lawera hine hi rau kakarani lobei God.

¹⁸A hogo, igide dam vanai lai lobei mama lo vui gatagale.

¹⁹Siu igimiu hatie duvi Israel, hatie hala vano sige a tavanaiana taligu, nge nem togagi venue bubugi meire sinobu gogona noi God. Igimiu ira netui God.

²⁰Igimiu neu mwere na vale hi a vatu togai bibi hi ira gai hora ko ira tangaloi ligoligogi. I Kraes sibona ingeie a muei vatu togaibibi lolo vale hi,

²¹ko a vale hi mo bulu bubugi lui Kraes. Ingeie mo mauri ko mo voragi na ute gogona lawe na Huqe.

²²Igimiu neu bulu bubugi lui mei Kraes mo lai gimiu nem bulu bubugi meire sinobu wagineu ko nem voragi na vale gatagale hi i God mo toga lolona lo managi noi Vui Gogona.