Read East Ambae EVESAS 3 Bible Online

EVESAS 3 - East Ambae bible

EVESAS 3

¹Siu ineu Bol, ineu a tangaloi toga vau noi Kraes lawe gimiu hi hatie duvi Israel.

²A hogo igimiu neu rongo huri ve i God u bete na tabana ngaha laweau lo nona dom tabetabe huri ve nain bului gimiu.

³Ingeie u siregi laweau huri ve nain ilo na nona gineu hiligiana, huri u haharaginie laweau. Ineu nau uli nau veve sere biti beno huri na gineu ngaha.

⁴Tare ve igimiu nem valu na havagineu hi nau uli, igimiu nein leo lai huri ve ineu nau ilo vurugegi na gineu hiligiana huri Kraes.

⁵Lo taro rau vano beno, i God he veve sere na nona gineu hiligiana hi tea lawe na tangaloi. Nge siserigi ngaha i God u haharagi na gineu hiligiana hi lawera nona gaihora gogona ko ira tangaloi ligoligogi.

⁶A gineu hiligiana hi nge ngaha, ve a Roro Garea u vei na sinobu ingere hi hatie duvi Israel ram bulu gatagale meire duvi Israel ve rain lei na vai garea noi God. Ingere a tarabesigi gatagale ko ingere bubugi ram wahegi na gineu hi i God u warataugi teu lui Jisas Kraes.

⁷I God u buluieu gina nona huireana ko a nona dom tabetabe lawua, ko u vei eu nam voragi tangaloi tabana huri nam waregi sere na Roro Garea.

⁸Ineu nau enhivo dena sinobu noi God doluegi, nge i God u bete na hogogi ngaha laweau ve nain waregi sere na Roro Garea lawera hi hatie duvi Israel ko a gineu gagareagi noi Kraes, ngehi rau lawua garagara dain he ilo laire tea.

⁹Ko i God u bete na tabana laweau ve nain veve sere lawe na sinobu doluegi huri na nona gineu hiligiana, ngehi u eno hiligi lo tauvuigi redu. Ingeie hi u teu na gineu doluegi.

¹⁰Mo vai mwerehi ve lo tarogi ngaha, turuhi na warelue ingeie vin matamwasaragi lawe na huireana ta eulu ko a huqegi talo ure ngaha, huri ve a matai sao noi God u lawua garagara ko a halagi u sao.

¹¹Ngehi u vovohoi vurugegi mena domiana noi God hi lo vuigi redu, ko a gineu ngaha u vei lui Jisas Kraes a noda Huqe.

¹²Lui Kraes igide dain vanai tabetabegi lei lo nagoi God ko dain he matagu tea. Igide dain vei lei na gineu ngaha lo noda lado hogo lui Kraes.

¹³Siu ineu nam navuhi gimiu ve a domimiu vin mese soi a vevenagi ineu nam wali na gagarasi huri gimiu. A noku gagarasi hi a roroa lawe gimiu.

¹⁴Giniehi, ineu nam tataro ladobiti lawe Mama.

¹⁵Ingeie hogosie a doridorinai tamana u eno lune, siu irahine hi ram toga eulu ko ingere hi ram toga lo ure rain lei na doridori hi denie.

¹⁶Ineu nam navu dein mama ve na bete na nona huireana lawua ve igimiu nen huire lolo lolomiu lo managi talo Vui Gogona.

¹⁷Ineu nam tataro ve i Kraes na toga lolo lolomiu gina lado hogo ko a mwasoamiu na huire lo tabetabe ko vena mauri lo domtabetabe.

¹⁸Ko ineu nam tataro ve igimiu ko ira sinobu gogona noi God doluegi ve ran ilo vurugegi na tabetabe lawua noi Kraes ve u tatavola mwere hilogo ko u qaravu mwere hilogo ko u eno aulu mwere hilogo ko u bue mwere hilogo.

¹⁹A domtabetabe noi Kraes ihine tea vin he iloe tea, nge ineu nam tataro ve igimiu nein vei lei ve nein ilo na dom tabetabe ngaha siu igimiu nein horo gina tabetabe noi God.

²⁰Siu gina huireana noi God hi mo tabana lolo loloda, i God vin vei na gineu u sao ko vin liu taligu dena tanoi havagineu tea hi dam navu sige u eno namawe garagara dena noda tanoi ladolado.

²¹Igide doluegi a warelue noi God hi u diu bubugi gide lui Jisas Kraes siu huri ve igide dain tabe hagagi na henai God vataha tarogi vin he rovo lai tea. Amen.