Read East Ambae EVESAS 4 Bible Online

EVESAS 4 - East Ambae bible

EVESAS 4

¹Ineu a tangaloi tabanagi noi Huqe, giniehi, ineu na toga lolo valei veuveu. I God u leo wahe gimiu ve nein voragi nona sinobu, siu nam garogi gimiu siserigi ngaha ve nen toga na huri na mwasoana hi i God u ware gimiu hurie.

²Gesegi igimiu nein lado wuweu, a domimiu vin madamada, ko a rongribi, nen lai vurugegi gimiu gagatalegi lo dom tabetabe.

³Igimiu nem bulu gatagale lo tamwata ko lo vui, siu igimiu nen vai leo ve nen bubugi tamwere lo matahala mwere ngaha.

⁴A tarabesigi gatagale ko a vui gatagale, ko i God u ware gimiu ve nein lei na lado tare gatagale.

⁵A Huqe gatagale, a ladohogo gatagale, ko a garuhi gogona gatagale.

⁶I God gatagale ko ingeie a tama lawe na gineu doluegi. Ingeie mo huqegi goro na gineu doluegi, ko ingeie mo toga vataha ute ko mo toga lolo gineu doluegi.

⁷I Kraes u bete na muei hogohogo lawe gide gagatalegi, ngehi mo haharagi ve ingeie mo rarai ve vin bete gineu vin liu denie hi igide dam tarani.

⁸Giniehi, u veve lo Reve reve Gogona vena, “Lune ingeie u hage eulu garagara, ingeie u tomuegi na buri tangaloi rau toga vau ko mo u bete hogogi teri lawera sinobu.”

⁹Lune a leo mo veve ve, “Ingeie u hage eulu garagara,” ?A iloilogi mwerehilogo? A iloilogi huri ve tomuegi ingeie u himei lolo ure.

¹⁰Siu i Jisas u himei lolo ure, ko ingeie tau hi u hage lo eulu garagara. I Kraes u veie ngaha huri ve na vaga horongi na gineu doluegi lo ure.

¹¹I Kraes u bete na hogogi lawe na sinobu, u veire lavasigi ram voragi gaihora, lavasigi ram voragi tangaloi ligoligogi, lavasigi ve ran vano ran waregi sere na Roro Garea ko lavasigi ram tatabegi na tabana ko ram huhui na sinobu noi God.

¹²I Kraes u veire mwere ngaha huri ve a nona sinobu rain rarai ve rain vei na nona tabanagi, huri ve ira hine hi rau voragi duvi tarabesi Kraes, rain huire vin vagevage. Siu huri ve igide doluegi dain bulu gatagale lai, igide dain ladohogo gi netui God ko dau ilo vurugeginie, lo matahala mwerehi igide dahe mwere na maresu tea, nge igide a sesea beno. Siu huri ve igide dain mwerei Kraes ko igide dain lei na nona gareana doluegi.

¹⁴Siu igide dain he voragi maresu memeaga tea taligu. A tangaloi kalikeli hi ram sine na sinobu ram bela lo matahala rau esi ko ram vai na qature mo asi, nge a nora leo huhui vin he gilugi lei gide tea. Igide dain he mwere na aka tea hi a navo mo tuli lategi, vage a langi mo walie lategi.

¹⁵Hatie! Igamai gain veve leohogo lawe na sinobu ko gain tabera. Lo matahala doluegi igamai gain meuri vin mwere na sinobu noi Kraes mwere ingeie mo qatagigi lawe gamai.

¹⁶I Kraes mo huqegi goro na tarabesigi doluegi nge a rosorosoi tarabesigi ram bulu bubugi lo tarabesigi gatagale. A rosorosogi gagatalegi a nona tabana huri ve vin veie vena vai na tarabesigi na mauri. A tabetabe mo vai na tarabesigi mo huire.

¹⁷Ineu nam veve na gineu ingere ngaha lawe gimiu lo henai Huqe. Igimiu nein mese toga mo huri na doridori mwerehi a tangaloi rahe ladohogo tea ram toga lune. A domire mo horo gina gineu rau esi.

¹⁸Ingere rahe ilo na havagineu tea, ingere rahe ronghogo tea, a vevenagi ingere rahe rorongtagi tea. Siu ingere rain he lailei na mwasoana tea hi i God mo betea.

¹⁹A tanoi maemae he eno tea lure, ram livusi na vavine, ram vai na gineu rau esi garagara, hatie gineu ve vin tugorora.

²⁰Nge a doridori ingere ngaha rahe vanai tea dena leo huhui ta lo Roro Garea noi Kraes.

²¹Ineu nam ilo huri ve igimiu neu rongo na roro hurire beno, igimiu nem toga lolo lolona ko neu lei na leo huhui hogo ngehi mo eno lui Jisas Kraes. Neu lei na leo huhui huri ve nei siregi na doridorimiu hi ta tuei, ve nen siregi vohogi na togaana hi rau esi ngehi neu toga lune tuei. A doridori hi rau esi taligu a vevenagi a gineu esi ingere hi ram vagalengagi na sinobu ko ram tarani ve rain veire tamwere.

²³Nge neu lei na leo huhui ve nein vei garaqagi gimiu lolo lolomiu,

²⁴ve nein voragi tangaloi garaqa. A tangaloi garaqa hi u veie ve vin mwerei God, u veie ve vin garea hogo ko vin gogona.

²⁵Siu igimiu nein siregi nein mese kalikeli. Igimiu nein veve hogo lawe gimiu gagatalegi a vevenagi dau havahava lo tarabesigi gatagale.

²⁶Lune igimiu nem mero, nein mese vai na galegaleasi, nein leo ve a nomiu meroana vin rovo siu mobei bongi.

²⁷Igimiu nein mese bete na mahogi lawe Setan ve na qoragi gimiu.

²⁸Ira hine ram balubelu rain siregi rain mese balubelu, ko ran tavuigi ran tabana. Huri ingere rain lei na mwasi limara sibora hogo. Siu huri vin nora gineu ve rain wahegi meire tangaloi mahogi.

²⁹Lune igimiu nem laqa, nein mese veve leo rau tuitui, nge nen veve gineu hi a sinobu ram tarani garagaraginie, ngehi a leo ve vin bului rahine wagineu ve ran huire lo nora lado hogo. Siu huri ve a havagineu hi nem veve vin bului vurugegi rahine hi ram rorongtagi gimiu.

³⁰Ko igimiu nen mese vai hahagavigi na Vui Gogona. A vui hi a gigilegi ve igimiu ira noi God hogo. U bete na Vui gogona lawe gimiu mo haharagi ve ingeie vin vei gimiu nein meriqe lune a Rovonai Bongi vin vanai.

³¹Igimiu nen siregi vohogi na gineu ingere hi ram vai na domimiu ram asi ginire. Igimiu nen mese meromero siseri, vage nen mese wiribibi na meroana lolo domimiu. Igimiu nein mese ulo lune igimiu nem gato meromero, vage nein mese gato bulabula, ko nein mese vai gineu hi rau esi.

³²Igimiu nen lolo garea ko nen tabe gimiu gagatalegi, ko nen lado vohogi na bugumiu gagatalegi mwerehi i God u ladovohogi na bugumiu hi lui Kraes.