Read East Ambae EVESAS 5 Bible Online

EVESAS 5 - East Ambae bible

EVESAS 5

¹Igimiu nen vai mwerehi i God mo vai. Huri igimiu ira netui mwera tabe.

²Igimiu nen siregi huri ve a domtabetabe na tomuegi gimiu. I Kraes u tabe gide ko u siregi na mwasoana huri gide mwere na rugurugu hi mo vai havuhevu gi God.

³Igimiu nein mese galegaleasi gina tarabesimiu ko a halai galegaleasi wagineu mwere ngehi a lado lawua.

⁴Siu he garea tea ve igimiu nein laqagi na leo asi ngehi ve vin vaga maemaegi na tangaloi ko vin vei esiesiginie, ko a leo vagisovu rau esi, nge u vovohoi ve igimiu nen vevegareagi God vataha tarogi.

⁵Igimiu nen ilo vurugegi ve a tangaloi mo vai na galegaleasi lo tarabesine sige a tangaloi u garagarasie gena gineu, sige a tangaloi mo vai na doridori esi vatahae ngehi mo eno lawe na mwera ko vavine. A tangaloi ngehi u lado lawua u tatarise mena tangaloi hi mo huduhudu goro na tarabesi nunui gineu, ingeie vin sala, ko vin he ahu vunigi lei tea lolo ute hi i Kraes ko i God rom ratahigi lolona.

⁶Igimiu nein mese siregi ve ihine tea vena sine lehi gimiu gina nona gato rerarera. I God vin veveginire doluegi hi rahe ronghurie tea ko ram veve gineu rahe garea tea.

⁷Siu igimiu nein mese dori kakarani meire mwere ngaha.

⁸Igimiu neu mwere na tangaloi hi ram toga lolo dodogi, nge siserigi ngaha igimiu ira sinobu talo leleo a vevenagi igimiu a sinobu nona Huqe siu nen dori mwerehi ve igimiu a sinobu talo leleo.

⁹Ko nen vai na nomiu leleo na varavara, nen ve hogo gesegi ko nen horo gina hogo,

¹⁰mo vai mwerehi, igimiu nem vai leo ve nen vai havuhevugi na Huqe.

¹¹Igimiu nen mese bulu lo gineu mwasarugi ngehi rau vei lolo dodogi. Nge nen haharagi ve a gineu ngerehi rau esi garagara.

¹²Ngehi a tanoi maemae huri ve dain laqagi na havagineu hi u vei lolo dodogi.

¹³Nge a leleo vin haharagi ve a gineu ingere ngaha rau mwere na havagineu.

¹⁴A leleo mo haharagi na gineu doluegi, mwerehi a Reve reve Gogona mo veve vena, “Nen rada, gimiu hi nem maturu, ko nen maraga dena mateana, siu i Kraes vin leleohagi gimiu.”

¹⁵Nein leohuri, huri ve nem toga mwerehilogo. Nein mese toga mwere na tangaloi hatie iloilora lure, nge nein toga mwereire tangaloi mataisao.

¹⁶Igimiu nen leo ve a taro na mese vano vurogi, a vevenagi a rani ingere ngaha rau esi.

¹⁷Giniehi, igimiu nein mese lenga, nein vai na domimiu na garea, ko nen hike huri ve i God mo tarani ve nein vei na havagineu.

¹⁸Igimiu nein mese torongo gina waen, ko a halai wai mwamwavi vatahae huri ngehi vin vei esiesigi gimiu, nge nen siregi ve a mwasoamiu na horo gina Vui Gogona.

¹⁹I nein laqa mei gimiu gagatalegi lo ahi talo Sam, a ahi vevegarea, ko a ahi ingere hi ram veve sere na gineu talo vui lune nem huduhudu na Huqe.

²⁰Lune nem veve garea lawe God huri na gineu doluegi, gesegi nein ware na henai noda Huqe i Jisas Kraes.

²¹Igimiu nen lado mavagi gimiu gagatalegi lo matahala mwerehi nem lado mavagi Kraes.

²²A vavine gon lado mavagi tamai netumu mwerehi gom lado mavagi Kraes,

²³mwerehi vage a vavine a qatune i tamai netune mwerehi i Kraes mo huqegi goro na nona warelue. I Kraes ingeie mo vagamwasoi na warelue ngehi a duvi tarabesine sibona.

²⁴A vavine vin teu tamai netune tomuegi gesegi, mwerehi a warelue mo tau tomuegi Kraes.

²⁵A mwera vin tabe gahorana lo matahala mwerehi a warelue mo tabe Kraes ko u bete na mwasoana hurie ve na voragi noi God. Ingeie u vei gogonagi na warelue gina huireanai nona leo ko u solo mwasaraginie gina wai.

²⁷I Kraes u veie mwere ngaha huri a nona warelue vin gogona ko vin roroa ko hatie malelei sokorana lune. I Kraes u mate huri ve vin bete na warelue lawea sibona, mwere na vavine hi mo vena lagi mena nona vulavula garea doluegi.

²⁸Lo matahala mwerehi teu, a mwere vin tabe gahorana vin liu mwerehi ingeie mo tabea sibona.

²⁹Hatie tangaloi gatagale tea dein gide vin veve lai ve mo leomasi na tarabesine sibona, nge mo vanganie mo haweginie mwere hi a Huqe mo hawegi na warelue.

³⁰Huri igide a rosorosoi tarabesine,

³¹Mwere a Reve Gogona mo veve vena, “A mwera mo siregi tamana ko i ratahine ko mo bulu mei gahorana, ingere vunu rom voragi tarabesigi gatagale.”

³²Ngehi a gineu gona talo vui nge ineu nam ronghogosie ve i ngehi mo tavalugi Kraes ko a nona warelue.

³³Siu a mwera gagatagalegi ram tabe gahorara mwerehi ram tabera sibora ko ira gahorara rain lado mavagi tamai neture.