Read East Ambae EVESAS 6 Bible Online

EVESAS 6 - East Ambae bible

EVESAS 6

¹Remaresu nen rong huri tamamiu ko i retahimiu, ngehi a gineu a Huqe mo tarani, huri ngehi a muei gineu ve nen vei.

²Huri a Leohora mo veve vena, “Gon lado mavagi tamamu tona ratahimu,” huri a gineu doluegi vin garea meigo, a bongimu vin qaravu lo ure ngaha.

³Ira tama nein mese gato siaga mei renetumiu, nge nein hawegi vurugeginire. Nein bete leo huhui lawera ko nen huhuire ve ran ilo na Huqe.

⁵Igimiu ira tangaloi tabana vurogi, nen rong huri rahine hi ram huqegi goro gimiu lolo ure ngaha. Nen haharagi lawera ve a nomiu tabetabe hurire u lawua ko mwerehi igimiu nem rong huri Kraes.

⁶Igimiu nen vaileo ve nen vai havuhevuginire gesegi, ko hatie lo taro hi ve ram lehi gimiu. Igimiu ira tangaloi tabanagi vurogi noi Kraes. Siu igimiu nein vei na gineu hi i God mo tarani ve nein veie gina loloi taqangimiu doluegi.

⁷Igimiu nen tabana havuhevu lawera hi ram lawua goro gimiu, mwerehi ve nem tabanagi lawe na Huqe ko hatie lawe na tangaloi.

⁸Igimiu nein lado haqe ve a Huqe vin bete na gaitawe lawe na tangaloi gagatalegi hi rau vei tabanagi garea, hatie huri tare ve ingere a tangaloi vurogi sige ingere hi rahe toga vau tea.

⁹Ira huqegi goro, igimiu nein veivei garea lawera nomiu tangaloi tabana vurogi. Nein mese vaga mataguteginire. Huri igimiu nein ladohaqe ve ihine hi a nomiu Huqe ko a nora Huqe hi mo toga lo eulu mo vaivei garea lawe gide lo matahala mwerehi teu.

¹⁰Siu vagasigi, igimiu nen labe siaga lo nona huireana lawua.

¹¹Igimiu nen saru goro gimiu gina luqei vuro noi God, huri ve igimiu nein qalo goro lai na huireanai kalikeli noi Setan.

¹²Irahine hi igide dam qalo gorora lo mwasoada, ingere hatie tangaloi. Igide dam qalo mena tamate hi ram toga vataha ute lo ure ngaha. Ngehi a nora tomtomuegi, ko irahine hi ram hago huireana, ko a nora huqegi hi ingere a vui doridori esi talo dodogi lo ure ngaha.

¹³Giniehi, igimiu nein seru goro gimiu gina lakoi vuro noi God doluegi. Siu lo taro hi ve a gineu esi ram vai, igimiu veilei ve nein labe siaga. Ko lune neu vei rovonagi na vuro doluegi, igimiu nem labe tau mosigei.

¹⁴Siu nen labe siaga, nen wasigi gimiu gina leo hogo, mwere na wasi hi nem taliginie lo tanoi wesimiu, ko a tutugoroi togaana vovohoi ngehi mo eno lo mabumiu.

¹⁵Igimiu nen saru garo na karumiu gina Roro Garea talo tamwata vena bului gimiu ve nen labe siaga.

¹⁶Ko vage nein hako siagagi na ladohogo mwere ve a nomiu gai tutugoro ve igimiu nein tugoro lai na liue teri nona tamate hi u mwere na avi mo gao.

¹⁷Siu igimiu nein ilo vurugegi ve i God u vaga mwasoi gimiu beno. Ngehi u mwere na gai rorovi qetu huri vuro. Ko igimiu nein hako siagagi na leoi God. A leo hi u mwere na muei vuro hi a Vui Gogona u betea lawe gimiu.

¹⁸Gesegi igimiu nein tataro lo managi noi Vui Gogona, nein nevu na gineu doluegi hi nem tarani garagara ginie. Tare ve nem vaie mwere ngaha, igimiu nein rarai tamwere ko nein mese wiriwiri. Igimiu nein tataro huri na sinobu noi God doluegi vataha tarogi.

¹⁹Vage igimiu nein tataro hurieu ve lune nam laqa, i God vin bete na leo laweau huri ve nain mese matagu huri ve nain veve sere na gineu hiligiana talo Roro Garea

²⁰I God u horau ve nain waregi sere na Roro Garea ngaha, ko ineu nain veie siserigi ngaha lolo valei veuveu. Igimiu nen tataro hurieu ve lune ineu nain waregi sere na Roro Garea hatie gina matagute.

²¹Ineu nam hora Titikas lawe gimiu, i tuada hi dau tabea ko a tangaloi lolo mwamwavi lo tabana nona Huqe. Ingeie vin veve na gineu doluegi hi rau vei laweau. Siu huri igimiu nein ilo huri ve ineu hine ko na vai na havagineu.

²²Giniehi, Ineu nam horae lawe gimiu huri ve igamaru mwerehilogo, ko ingeie vin vaga mwamwavigi na domimiu.

²³Retueku ko irehaqeku, ineu nam tataro ve i God a Mama ko i Jisas Kraes a noda Huqe, ingere roin bete na tamwata ko a tabetabe na toga mei gimiu nen lado hogo siaga ginie.

²⁴A hogogi noi God na toga mei gimiu doluegi hi nem tabe na noda Huqe i Jisas Kraes, a noku domi tabetabe huri gimiu vin rovo lai tea. Amen.