Read East Ambae VILIBAE 1 Bible Online

VILIBAE 1 - East Ambae bible

VILIBAE 1

¹Ineu Bol ko Timoti, i gamaru a tangaloi tabanagi noi Jisas Kraes. Lawe na sinobu noi God doluegi hi ram toga lui Jisas Kraes lo togagi venue lawua Vilibae, vage lawera tamtamaragai meire dikon.

²A hogogi ko a tamwata dein God i tamada ko a Huqe i Jisas Kraes.

³Ineu nam veve gareagi na noku God vataha tarogi lune nam lado haqe gimiu,

⁴ineu nam tataro gina havuhevu gesegi huri gimiu doluegi.

⁵Ineu nam vevegareagi God huri na buluiana neu bete laweau lune nau waregi sere na Roro Garea, a buluiana hi neu bete laweau lo vuigi redu lo tarogi hi lune neu lei na ladohogo mo dadari gaqarigi.

⁶I God u tevuigi na tabanagi garea lumiu, siu ineu nau ilo vurugegi ve ingeie vin tabanagi tuturedu mei gimiu vin dadari lo qereqerenagi lune hi a noda Huqe i Jisas vin vanai taligu.

⁷Ko a noku lado hogo huri gimiu doluegi u vovohoi a vevenagi igimiu nem toga lolo loloku. Igimiu doluegi nem wahegi na hogogi noi God meieu lune ineu nam toga lolo valei veuveu nau kokogoroau siboku ko nam haharagi ve a Roro Garea a hogo.

⁸I God mo ilo ve ineu nam tarani garagara ve nan lehi gimiu, a vevenagi nam tabe gimiu doluegi gina tabetabe noi Jisas Kraes.

⁹A noku tataro huri gimiu ingeie ngaha, ve a nomiu tabetabe vin meuri vin vagevage, vage ve igimiu nein lei na iloilo ko a rongronghogo mena nomiu tabetabe,

¹⁰huri igimiu nein leo lai na gineu hi u garea ko a gineu hi esi ko nein hako siagagi na gineu garea, huri ve igimiu nein mwasara ko a gineu esi vin he eno tea lumiu lune i Kraes vin vanai taligu.

¹¹Huri ve i Kraes vin bului gimiu nein vei na gineu garea u sao vena bete na roroa ko a waregi roroi lawe God. I Bol, ingeie lolo valei veuveu, nge a Roro Garea mo vano tuturedu.

¹²Retueku ko irehaqeku, ineu nam tarani ve igimiu nen ilo ve a havagineu hi rau hogosieu, rau bului na Roro Garea ve na mawahewahe.

¹³Giniehi, ira bolis hi ram rada goro valei muei kavman ta Rom ko irahine wagineu vage tahi rau ve ineu lolo valei veuveu a vevenagi ineu nam ladohogo lui Kraes.

¹⁴A vevenagi ineu lolo valei veuveu, ira ladohogo u sao a domire mo huire lui Kraes mo vagevage ko rahe matagu tea ve rain laqagi na leoi God.

¹⁵A hogo ve lavasigi ram waregi sere huri Kraes a vevenagi a gineu gagarasi mo eno lure ko ram lailei hageginire, nge lavasigi ram waregi sere huri Kraes gina domiana garea.

¹⁶Ingere ram vaie lo tabetabe, a vevenagi ram ilo ve i God u bete na tabana ngaha laweau lune nain kokogoro na Roro Garea.

¹⁷Siu lavasigi ram waregi sere Kraes gina ladolado rahe garea tea, ingere ram lado ve rain teu gaivutugieu vin lawua lune nam toga lolo valei veuveu.

¹⁸Nge hatie huri, a gineu mo eno hageliu ve lo matahala doluegi, tare ve huri na gareana sige a ladolado rahe vovohoi tea, ingere ram waregi sere huri Kraes. Siu ineu nam havuhevu ko nain hevuhevu vin vano tuturedu.

¹⁹A vevenagi igimiu nem tataro hurieu ko a Vui noi Jisas Kraes mo buluieu, ineu nam ilo ve nain mwelue.

²⁰A gineu gatagale hogosie hi ineu nam tarani garagara ginie, ngehi a domiku mo eno lune, ve nain mese vai na gineu tea vohogi ngehi ve maemae ginie lo nagoi Kraes. Ineu nam tarani ve a domiku na huire garagara, huri ve tare nam mate siserigi ngaha sige nam mwaso, nge a mwasoaku doluegi vin tabe hagagi na henai Kraes mwerehi nam vaie gesegi.

²¹Lolo domiku, tare ve ineu nam mwaso tau, ngehi nam bulu mei Kraes, ineu nain tabe hagagi na henana, sige tare nam mate, ngehi u garea u liu laweau.

²²Nge tare nam mwaso tau, ngehi a iloilogi huri ve nain vei na tabanagi garea u sao lo ure ngaha. Siserigi ngaha a matahala gairue rom eno lo nagoku, ko ineu nahe ilo tea ve a turegi ngehilogo hi ve nain leowahea. Lolo domiku nam tarani garagaragi ve nan mwalue dena mwasoana ngaha ve nan vano na toga lobei Kraes, ngehi u garea u liu denie hi nam toga lo ure ngaha.

²⁴Nge nam lehe ve u garea ve nan toga tau lo ure ngaha huri ve nain bului lei gimiu.

²⁵Huri ineu nau ilo vurugegi huri na domiana ngaha, nau ilo ve nain toga mei gimiu ve nan bului gimiu ve a nomiu ladohogo na mauri ko ve na bete na havuhevu lawe gimiu.

²⁶Igimiu nein havuhevu vin liu lui Jisas Kraes lune ineu nam toga mei gimiu taligu.

²⁷A gineu gatagale hogosie mo eno lolo domiku. Igimiu nein ronghogo lolo lolomiu ve nem lo matahala hi mo bete na lado mava lawe na Roro Garea noi Kraes. Siu tare nam vanatu nam siro gimiu sige ineu vagahao dein gimiu, ineu nain rongo ve igimiu nem labe siaga lo domianagi gatagale, ve nem tabanagi bubugi huri na ladohogo talo Roro Garea.

²⁸Ko igimiu nehe matagu tea gi rahine hi ram qalo mei gimiu. Ngehi mo haharagi ve ira nomiu tavului vuro rain salasala, nge igimiu nein mwaso lobei God.

²⁹I God u bete na tanoi lado mava lawe gimiu, hatie ve huri na tanoi ladohogo lui Kraes hogosie, nge ve nein rongo gagarasi hurie vage. A gineu ingere ngaha vunu rom bete na roroa lawe Kraes.

³⁰Lune ineu nau toga mei gimiu, neu lehi na noku wahagiana, ko nem rongo huri na wahagiana hi mo eno luku siserigi ngaha. A wahagiana nge tauhi mo eno lumiu sibomiu.