Read East Ambae VILIBAE 2 Bible Online

VILIBAE 2 - East Ambae bible

VILIBAE 2

¹?Wa nomiu mwasoana lui Kraes vin betei na nomiu huireana? ?Wa nona tabetabe vin vei mesurigi gimiu? ?Wa dain bulu bubugi lo Vui? ?Wa igimiu a nomiu hahagavi ko a vai vei garea lumiu?

²Tare ve mwerehi, nein veieu nain rong garea gina domiana mwere tauhi, dain wahegi na tabetabe nge tauhi, ko a domiana gatagale tauhi ko huri gineugi gatagale tauhi.

³Igimiu nein mese vai na gineu gina domiana bugure ko a dom sagesage nge nein lado wuwou vovohoi gagatalegi, gimiu nen lado huri na tangaloi wagineu siu mobei gimiu sibomiu.

⁴Igimiu nein mese vai na gineu huri na nomiu mwasoana sibomiu hogosie, nge nein vei gineu vin huri na mwasoara tangaloi dolue vage.

⁵Lolo mwasoamiu nein ladolado ko nein vei gineu mwere i Jisas Kraes.

⁶I Kraes sibona, ingeie u mwerei God lo gineu doluegi. Ingeie u ilo ve ingeie u tatarise mei God, nge giniehi, ingeie he lado te ve vin vei na gineu hi ve vin huri na nona tarani sibona.

⁷Nge ingeie mo lado siregi na tantanona lobei tamana God ko mo vaie sibona mo voragi tangaloi vurogi. Ingeie mo Vonai lolo ure mo voragi tangaloi tabana.

⁸Ko ingeie mo toga mwere na tangaloi talo ure, ingeie vin lado wuweuginie sibona, ko vin lado mavagi God, hatie huri a gineu ngerehi rau vei mo mate lo gai saroutu.

⁹Siu i God mo ragasie dena mateana mo hage lo ute ta eulu, ngehi u hahale garagara. I God mo vai na henana mo lawua sileti na hea doluegi.

¹⁰Siu huri a tangaloi doluegi rain sisiqeu hivo rain huduhudu goro na henai Jisas, a gineu doluegi lo eulu, lo ure ko lo vavai ure.

¹¹A tangaloi doluegi rain veve ve i Jisas Kraes ingeie i Huqe ko mo lai na Roroa lawe God a Mama.

¹²Retueku, igimiu neu rorongtagi God gesegi lo tarogi nau toga mei gimiu. U garea lawagi ve nein rorongtaginie siserigi ngaha lune nain vano dein gimiu. Nein tabana siaga huri nein vei rovonagi na nomiu mwasoana mena matagute ko a ruru rurugi,

¹³huri God vin tabana lolo lolomiu vin bului gimiu nein tarani ve nein vei gineu ko ve nein vai havai hi ingeie vin rong garea lune.

¹⁴Igimiu nein vai gineu doluegi hatie mena singotutubu sige mena garoana.

¹⁵Siu nein mwasara den gineu esi ko hatie asiana lumiu. Igimiu nein voragi netui God hatie mena nomiu vai saloi. Nge igimiu nein toga meire tangaloi ingerehi rahe vovohoi tea ko meire hi rau bugure ram toga dali gimiu, lolo livugemiu a varavaramiu mo mwere na visiu hi lolo ureure hi a dodogi.

¹⁶Igimiu nein bete na leo huhui ngehi bete na mwasoana. Siu lune ve i Kraes vin vanai taligu, ineu nain hevuhevu huri a noku tabana he vano tea vurogi. Nau toatoa ko nau qoraginie.

¹⁷A nomiu lado hogo mo vai gimiu nem bete tabetabegi na nomiu mwasoana mwerehi ve vin voragi na Rugurugu lawe God. Tare ve nam bete na daiku siboku mena nomiu Rugurugu, ineu nain havuhevu ko nain rong garea mei gimiu.

¹⁸Igimiu vage nein havuhevu ko nein rong garea meieu.

¹⁹A noku lado tare mo eno lui Huqe Jisas ve nai hora Timoti vonatu lawe gimiu vin he ribi tea. Ineu nain havuhevu lune nain rongo na roro huri gimiu.

²⁰Hatie tangaloi gatagale vohogi ngehi u mwerei Timoti, ngehi u leo huri gimiu hogo.

²¹A tangaloi lavasigi ram rong ve rain leo hurire hogosie lo nora mwasoana, nge hatie lo tabana noi Jisas Kraes.

²²Igimiu neu ilo vurugegi huri ve i Timoti ingeie a hava tangaloi. Neu ilo vurugegi ve ingeie u tabana bubugi meieu, gorom waregi sere na Roro Garea, mwerehi ve a maresu mo tabana bubugi mei tamana.

²³Nau domigi ve nain horae lawe gimiu vin siseri lune nau ilo ve a havagineu vin vei laweau.

²⁴Ineu nam ilo vurugegi ve a Huqe vin buluieu ve ineu nain vanai lobemiu vin siseri.

²⁵Ebavrodaetas, i tueku lui Kraes, ingeie mo tabana meieu, ingeie a tangaloi vuro noi Kraes. Lune ineu nam tarani na buluiana, igimiu neu horae laweau ve na buluieu. Siserigi ngaha ineu nam lado ve nain hora muleginie taligu lawe gimiu, a vevenagi ingeie mo tarani garagara ve na lehi gimiu. Ineie mo lado asi a vevenagi igimiu neu rongo ve ingeie u sege.

²⁷Io, a hogo, ingeie u sege u kakarani ve vin mate, nge i God u hagavie, huri ve ineu nain mese hahagavi taligu.

²⁸Ineu nam tarani garagara ve nain horae lawe gimiu, siu huri igimiu nein lehe nein rong garea, ko ineu nain he lado asi tea huri gimiu taligu.

²⁹Igimiu nein lei vurugeginie lo henai Huqe gina havuhevu lawua. Igimiu nein bete na lado mava lawe na tangaloi rau mwereie, a vevenagi ingeie u kakarani ve vin mate lo tabana noi Kraes. Ingeie u lado utu ve vin siregi na mwasoana huri ve na buluieu lo taro hi igimiu nein he bului laieu tea.