Read East Ambae VILIBAE 3 Bible Online

VILIBAE 3 - East Ambae bible

VILIBAE 3

¹Retueku ko irehaqeku, igimiu nen horo gina havuhevu lo nomiu bulu gatagale mena Huqe, ineu nahe maemae tea ve nain uli na leta lawe gimiu, nai huri huri lo leo lo havagineu hi nau uli lawe gimiu tomue, ko vin garea mei gimiu tare nain veie mwerehi.

²Igimiu nein leo huri rahine hi ram vai gineu esi, ram mwere na wiriu hi ram tarani ve ran gasi deiregi na tangaloi.

³Igide hi dau lei na teve gigilegi hogo. Igide dam huduhudu goro God lo Vui ko a noda sagesage mo eno lui Jisas Kraes. Huri dahe lado tea talune siboda sige lo havagineu tea hi dam vai.

⁴Bataha ineu nain vei lei ve na lado taluku siboku, tare ihine, a gineu tea ve vin lado talune sibona, ingeie vin ilo ve ineu a gineugi rau lawua taligu hi ve nain lado lai taligu huri.

⁵Ineu a duvi Israel vohogi. Ineu a duvi Benjemen. I tamaku mei ratahiku, ingere vunu a duvi Hibru ko giniehi neu a duvi Hibru vovohoi. Lune ineu nau vora, lo tagui bongi gai welugi ineu nau lei na teve gigilegi mo huri na Leohora nora duvi Israel, ineu a Varise.

⁶Ineu nau vei qetu siaga huri nau veivei na warelue noi Kraes. A tangaloi vin he haqe lai na noku vai vagasile tea lo matahala hi nau rong huri na Leohora noi Mosis.

⁷A gineu ngerehi rau eno hageliu laweau, nge siserigi ngaha ineu nam lado ve hatie gineu lure a vevenagi i Kraes.

⁸Hatie huri ve a gineu ngerehi hogosie, nge ineu nam lado ve a gineu doluegi hatie gineu lure, tare ve ineu nain tatariseginire mena iloilo lawua hi na leie huri Jisas Kraes a noku Huqe. A vevenagi ingeie a gineu esi ngerehi doluegi rau sala denieu, siu ineu nam ilo ve a gineu ngerehi hatie gineu lure. Ngehi mo haharagi ve i Kraes mo toga meieu,

⁹ko ve nain voragi nona tangaloi tabanagi. Siserigi ngaha ineu nam vovohoi lo nagoi God, hatie huri ve nau huri lo Leohora, nge a vevenagi nau ladohogogi Kraes. I God mo vaieu nam tatarise lo nagona a vevenagi a noku lado hogo.

¹⁰Ineu nam tarani ve nan ilo Kraes ko a huireana hi u vei ragasie dena mateana. Ineu nam tarani ve nan bulu meie lo nona gagarasi ko ve mwereie lo nona mateana.

¹¹Siu a noku ladotare mo eno huri ve ineu siboku nain maraga taligu dena mateana

¹²Ineu nai he veve lai tea ve vovohoi, sige ve ineu nau dadari lo tanoi qoragiana beno, nge nam vai leo ve nan toa na dadari lo tanoi qoragiana hi ko nan laie gi noku siboku. Nge huri i Kraes u veieu nam voragi nona tangaloi, ineu nam vai leo ve nan lai na domine na voragi domiku.

¹³Retueku ko ire haqeku ineu nam ilo ve ineu nahe dadari tea mosigei lo tanoi qoragiana hi, nge a gineu gatagale hogosie hi nam tarani gesegi nan vaie, ve nan galuvegi na gineu ngerehi rau vano beno ko ve na wahagi huri na gineu ram vonai mosigei.

¹⁴Ineu nam vaileo ve nan dadari lo tanoi qoragiana hi ko ve nan lai gaitawe ngehi i God u wareau lui Kraes sulo mwasoana ta eulu.

¹⁵U garea huri ve igide hi dau sesea beno lo dori Kraes, ko a domide na eno gatagale lo gineu hi. Sige ve lavasigi a domire rau wegineu, i God vin mata-mwasaraginie lawera.

¹⁶Nge igide dain huri tuturedugi na hogo ngehi u eno mei gide beno.

¹⁷Retueku ko irehaqeku, u garea ve igimiu nen huri lo taikeruku. Huri igamai gau teu na matahala vovohoi beno lawe gimiu. Igimiu nein huri lo dorire tangaloi ngerehi rau huri lo taikeru hi.

¹⁸Ineu nam veve vatu sao lawe gimiu beno, siu ngaha nam veve taligu gina lado mava. A noku tinengi mo hale huri na tangaloi u sao a nora togaana mo voragi na tavului vuro lawe na gai saroutu noi Kraes.

¹⁹Siu lo vagasigi, ingere rain salasala. Huri ingere ram vai na gineu ngerehi a tarabesire ram tarani. Ingere ram sagera huri na havagineu tea hi ram vai, ngehi a tanoi maemae lune, ko a domire mo eno lo gineui ureure hogosie.

²⁰Nge a togagi venue mo eno eulu ko igide dam rarai na noda vagamwasoi, a Huqe i Jisas Kraes hi ve vin himei den eulu.

²¹Gina nona managi, ingeie vin huqegi goro na gineu doluegi, ingeie vin teu leahi na tarabeside hi rau kekena ko vin vei rain mwerena tarabesine hi ta eulu.