Read East Ambae KOLOSI 1 Bible Online

KOLOSI 1 - East Ambae bible

KOLOSI 1

¹Den Bol, a gaihora noi Jisas Kraes. Ineu a gaihora a vevenagi mo huri na tarani noi God. Vage den Timoti i tuada.

²Lawe ire tuada ko rehaqeda hi ram toga gogona lui Kraes ingerehi ram toga lolo togagi venue Kolosi. A hogogi ko a tamwata lawe gimiu den God i tamada.

³Lo nomai tataro huri gimiu gesegi gam veve garea lawe God i tamai noda Huqe Jisas Kraes.

⁴A vevenagi igamai gau rongo na roro huri na nomiu lado hogo lui Jisas Kraes ko a tabetabe hi nem haharagi lawe na sinobu noi God doluegi.

⁵Igimiu neu lei na lado hogo ko a tabetabe, a vevenagi a nomiu lado tare. Ko a havagineu hi neu lado tare hurie mo eno tabetabegi huri gimiu lo eulu. Igimiu neu hikehike huri na lado tare ngaha lune igimiu neu rongo na leo huri na hogo, ngehi a Roro Garea.

⁶Ngehi gau veve sere lawe gimiu, vataha na mahogi lolo ure a Roro Garea hi mo lai na vai garea mo mauri. Nge ngaha u vei lawe gimiu vage. Igimiu neu rongo na Roro Garea ko neu ilo vurugegi na hogo huri na hogogi noi God.

⁷Igimiu neu rongo na Leo huhui huri na hogogi noi God deni Ebavras ngehi gau tabea. Ingeie mo tabana bubugi mei gamai ko ingeie a tangaloi garohuri noi Kraes lo henamai.

⁸Ingeie u veve lawe gamai vage huri na tabetabe ngehi neu leie dena Vui Gogona.

⁹A vevenagi mo tavuigi lo rani hi, gau rongo na roro huri gimiu, igamai gam tataro huri gimiu gesegi, gam navu dein God huri ve igimiu nein ilo vurugegi na gineu hi God mo tarani. Gam tataro vage ve nein lai na matai sao vin lawua ko igimiu nein ilo vurugegi na gineu ta lo Vui.

¹⁰Siu huri gimiu nein vei lei ve nein toga vin huri mwerehi a Huqe mo tarani. Ko nein vei na gineu ngehi mo vai roroaginie. Igimiu nein wei mwasigi lo tabanagi rau garea ko nein meuri lo iloilo noi God.

¹¹I God vin vei siagagi gimiu gina nona huireana lawua sibona siu huri ve igimiu nein labe siaga lune lo taro a gineu esi rain vonai, nge nein rong ribi.

¹²Ko igimiu nein veve garea gina havuhevu lawe tamada u vei gimiu ve nein betegi na gineu doluegi hi u vagataire huri na nona sinobu lo ute ta eulu a ute hi mo rani gesegi.

¹³I God u vei gide dam mariqe den huireana talolo dodogi, ko mo lai gide sulolo tantanoi ratahigi noi netune hi u tabea.

¹⁴I netune u voli na bugude, ko a vevenagi ingeie, i God mo lado vohogi na bugude.

¹⁵Ihine tea vin he leo lai God tea, nge i Jisas Kraes u mwereie vohogi. Ingeie u hage namawe taligu dena gineu doluegi ngerehi i God u teure.

¹⁶Ingeie u teu na gineu doluegi lo eulu ko lo tano, ngerehi ram hako huireana, ira Engsel, Ira tamate, ira ratahigi, ira tomtomuegi talo ureure doluegi.

¹⁷Tomue, lune i God he tau na gineu tea mosigei, nge i Kraes u toga tahi beno. Siu a gineu doluegi ram toga tuturedu mo huri na tantanora a vevenagi ingeie.

¹⁸I Kraes ingeie a qatui Warelue, a warelue hi a tarabesine a gineu doluegi hi ram vonai denie. Ingeie vage a muegi, u maraga dena mateana. Siu lo gineu doluegi i Jisas ingeie mo tomue gesegi.

¹⁹I Kraes u garea u liu mwerehi, huri God mo havuhevu huri mo siregi na nona mwasoana doluegi mo eno lui Kraes.

²⁰Gina mateana ko a dai Kraes lo gai saroutu, mo lai na gineu doluegi vano taligu lawe God. Hatie huri tare ve a gineu talo ure sige ta eulu.

²¹Tomue igimiu neu tino vagahao dein God. Igimiu neu voragi nona tavului vuro lolo domimiu, ko neu vei na galegaleasi u sao goro God.

²²I God u lei gimiu taligu vano lawea sibona. Ingeie u vei na gineu ngaha lo mateana noi Kraes lo tarabesine, siu huri ve ingeie vin lei gimiu taligu vano lo nagoi God mwere na sinobu hi rau gogona, hatie nora galegaleasi lure ko hatie gineu huri ve i God vin vevegi lei gimiu huri ve neu vagasile.

²³A gineu ngaha vin vei, tare ve igimiu nem labe siaga lo nomiu lado hogo. Igimiu neu rongo na Roro Garea beno. Igimiu nein mese bela dena nomiu lado tare. A Roro Garea hi u waregi serea lo qatui ureure doluegi. Ineu Bol, nam bului nam waregi sere na Roro Garea hi.

²⁴Ineu nam havuhevu lo noku gagarasi huri gimiu. A gineu u sao ngehi ve i Kraes vin gagarasi teu lo tarabesine, ngehi a warelue. Ineu nam masinge lo tarabesiku ve nain gagarasi lo gineu ngerehi mwere a duvi noku tabana.

²⁵Ineu nau voragi na tangaloi tabana lawe na warelue, a vevenagi i God u bete na muei tabana laweau ve nain veie ngehi mo bului gimiu ko a tabana hi ve ineu nain veve na roroi leo noi God doluegi lawe gimiu.

²⁶A roro ngaha a gineu hiligiana, u eno hiligi dena matara tangaloi doluegi lo vuigi redu, nge siserigi ngaha a sinobu gogona noi God rau rongoe beno.

²⁷I God u domiginie huri ve vin siregi lawe na nona sinobu ve rain ilo na gineu ngaha ko a gineu hiligi u roroa ngehi mo eno mei God huri na nona sinobu doluegi. A gineu hiligi hi i Kraes sibona, ngehi mo toga lumu. Ingeie hogosie a noda lado tare huri na ute ta eulu.

²⁸Siu igamai gam waregi sere tuturedugi Kraes lawe na tangaloi gagatalegi. Gina nomai mataisao, a lolorani gau bete leo matagute ko gam huhuire doluegi. Gau veie ngaha ve na vai na tangaloi doluegi ran matue lui Kraes ko vena lai na sinobu doluegi vano lo nagoi God.

²⁹Ineu nau tabana u huire ve nain vei na gineu ingere ngaha mena huireana doluegi i Kraes u bete laweau.