Read East Ambae KOLOSI 2 Bible Online

KOLOSI 2 - East Ambae bible

KOLOSI 2

¹Ineu nam tarani ve igimiu nein ilo ve ineu nau kea gagarasi huri gimiu, ingere hi lolo togagi venue lawua Loadisia, ko lavasigi vage hi rahe lehi na nagoku tea vohogi.

²Ineu nam tarani ve nan vai siagagi na domire, ve ingere ran bulu gatagale lo tabetabe siu huri ingere rain lei na vai garea lo nora rongrong hogo ngehi mo vaire ram ilo na gineu hiligiana noi God, ngehi i Kraes sibona.

³Nge a mataisao ko a lolorani ram hili lune.

⁴Igimiu nein mese siregi ve a sinobu rain vaga lengagi gimiu gina leo ngerehi mwere lo rongrongogi huri ve a hogo, nge ingere na kalikeli hogosie.

⁵Hatie huri ineu nam vagahao dein gimiu lo tarabesiku, nge nam lado gimiu tamwere. Ineu nam havuhevu huri nam rongo ve nem toga lo mwasoana garea ko a nomiu lado hogo lui Kraes u siaga.

⁶Igimiu neu lei Jisas Kraes a nomiu Huqe, siu igimiu nen toga tuturedu lo bulgatagale meie.

⁷Igimiu nen leo ve a goarimiu ran turebue lui Kraes ko ve ingeie na voragi vatu togaibibi huri na mwasoamiu. Nen labe siaga lo nomiu lado hogo mwerehi gau huhui gimiu ko nen havuhevu lolo lolomiu.

⁸Igimiu nein leo huri ve ihine tea vin mese tomuegi gimiu lo leo huhui kalikeli ngehi mo vanai dena tangaloi hogosie ngehi mo vanai dena vui hi ram huqegi na ure ngaha, hatie dein Kraes.

⁹I Kraes u lei na tarabesi tangaloi mwerei gide, nge i God a mwasoana doluegi u toga lune beno.

¹⁰Siu igimiu hi neu bulu bubugi mei Kraes, i God u vagahorongi na mwasoamiu beno gina gineu ngerehi u bete lawea gimiu. I Kraes mo huqegi goro na gineu doluegi, ira huqegi talo Vui ko ira tangaloi lalawua doluegi talo ure.

¹¹Lune igimiu neu vonai lobei Kraes, mwerehi ve neu lei na teve gigilegi u wegineu. A teve gigilegi hi he vai tea lo tarabesigi, nge i Kraes u vei na teve gigilegi, ngehi gina nona mateana mo vai gimiu nem mariqe dena huireanai nomiu galegaleasi sibomiu.

¹²Lune igimiu neu lei na garuhi gogona, u tulegi bubugi gimiu mei Kraes. Siu nem maraga taligu lo mwasoana a vevenagi a nomiu lado hogo u siaga lo managi noi God, ngehi u vei ragasi Kraes dena mateana.

¹³Igimiu neu mate a vevenagi a nomiu galegaleasi u lawua ko igimiu hatie sinobu noi God. Igimiu neu toga tavala varea dena Leohora, nge i God u siregi lawe Kraes mo vai gimiu nem mwaso, lune ingeie u lado vohogi na bugui noda galegaleasi doluegi.

¹⁴I God u mengi na leo vevegi hi rau eno vovohoi gide huri dau kalokalo lo Leohora. I God u lei vohoginire mo toto bibire talo gai saroutu.

¹⁵Lo matahala mwere ngaha, i God u qoragi na huqegi talo vui esi ko a nora tanoi lawua. I God u vagamaemae ginire lo nagora tangaloi huri u qoraginire lo gai saroutu.

¹⁶Siu igimiu nein mese siregi ve ihine tea na vevegi gimiu huri na hava gineu tea hi nem gani sige nem inu. Igimiu nein mese siregi ve ihine tea na veve lawe gimiu ve nein tatabegi na vule tavidiri, a Rani Mangaana sige a rani lalawua lavasigi vage.

¹⁷A gineu ingere ngaha, ingere hatie gineu hogo a vevenagi hatie tarabesire ve dain tango lai lure. Ingere a nunui tarabesi gineu dain tango lai lune. A tarabesigi hogo hi igide dain tango lai lune, ngehi Kraes.

¹⁸A tangaloi lavasigi rain veve lawe gimiu ve ingere ram toga wuweu ko ram hudu goro na engsel. Ingere ram sagera mena nora hueri, nge a hueri ngerehi hatie gineu lure, a vevenagi a tangaloi ngerehi a domire mo horo gina sagesage.

¹⁹Ingere rau siregi rahe wiri siagagi tea lui Kraes. Ingere hi a qatagi tarabesigi. I Kraes mo kokogoro na tarabesine. Ingeie mo wiri bulutegi na tarabesigi mwerehi a hariherinai tarabeside ram bulu lo garahugada. A tarabesigi mo mwaso mo huri na matahala noi God.

²⁰Lo tarogi igimiu neu mate mei Kraes ko neu meriqe dena vui ngerehi ram toga lolo ure. ?Huri hava gineu nem vaie mwere ve igimiu a nati ure ngaha mosigei huri igimiu nem huri na tau leo mwere ingere ngaha:

²¹“?Nein mese gani ngaha, Nein mese ganigeni rongoe ngaha sige. Nein mese hakovi na gineu hi?”

²²A tau leo hi ram dovo na gineuhi ureure hogosie, lo tagugi hi dau lalakogi lure u rovo, ingere ram salasala.

²³A sinobu lavasigi ram lado ve a tau leo ingere ngaha ve rau garea nge ingere ram labe lo mataisao nona tangaloi hogosie. A tau leo hi rau siaga, ko a sinobu hi ram dori tabetabegi lure, ram lado ve ingere rau lado wuweu. Nge a nora taratarani esi tea talo tarabesire