Read East Ambae KOLOSI 3 Bible Online

KOLOSI 3 - East Ambae bible

KOLOSI 3

¹A vevenagi nem maraga mei Kraes sulo mwasoana, nein teu na domimiu lo gineu hi ram eno eulu lo ute hi Kraes mo toga lo matuei God.

²Nein lado huri na gineu ta eulu, hatie gineu ta lo ure.

³A nomiu galegaleasi sibomiu hi ta tuei rau mate, ko a nomiu mwasoana garaqa mo toga mei Kraes lui God.

⁴I Kraes ingeie a noda mwasoana, ko lune ve mo vonai taligu, igimiu nein bulu meie lo nona mwasoana garea lo eulu.

⁵Siu nein teu vohogi na nomiu galegaleasi doluegi dena nomiu mwasoana ngehi a bakabaka, a vai vagasile lo tarabesi doluegi, a taratarani esi ko a leo asi ngerehi mo vai na tangaloi mo havusie vena vai na galegaleasi lo tarabesine. A gineu ingere ngaha doluegi u mwere na lengai hudugoro na god kalikeli.

⁶A gineu ngerehi ram vai God mo lologagasi.

⁷Lo taro gatagale igimiu sibomiu neu toga lo vavai huireanai taratarani esi ngehi, ko a gineu ngerehi ram huqegi goro na mwasoanamiu.

⁸Nge siserigi ngaha igimiu nein teu vohogi na gineu ingere ngaha dena mwasoamiu, ngehi a lolo meromero, a meromero siserigi, nem vai gineu sige nem veve gineu vena vai esiesigi na domire tangaloi wagineu ko nem veve leo rau esi lo tarogi hi nem laqa.

⁹Igimiu mese veve leo kalikeli lawe gimiu gagatalegi. Huri gimiu neu siregi vohogi na mwasoamiu tatuei hi u galegaleasi ko a gineu ingere ngaha neu veire tuei.

¹⁰Siserigi ngaha igimiu nem tauvuigi na mwasoana garaqa. I God mo leahi na nomiu mwasoana garaqa, ingeie vin veie vin meuri ko vin meuri vin vagevage mwereie sibona.

¹¹Giniehi, hatie gineu ve vin haharagi ve a duvi Israel rau wegineu dena sinobu hi hatie duvi Israel, ingerehi rau lei na teve gigilegi ko ingerehi rahe lai na teve gigilegi tea, sige a sinobu ingere hi a hala vano sige a sinobu ngerehi lolo rani tea. Hatie gineu ve haharagi ve a tangaloi tabana vurogi rau wegineu denire tangaloi ngerehi ram toga tabetabegi. I Kraes mo toga lure doluegi hi ram lado hogo ginie. Kraes ingeie hogosie u eno hageliu.

¹²I God u leo wahe gimiu ko u vei gimiu nem voragi nona sinobu gogona. Ingeie u tabe gimiu. Siu igimiu nein vei na gineu ingere ngaha gesegi. Nein hagavi na tangaloi dolue, nein vaivei garea, nein lado wuwou, nein vano rorongo ko nein rong ribi.

¹³Nein vui bului gimiu gagatalegi ko nein lado vohogi na havagi ngehi neu vei vovohoi gimiu gagatalegi. Tare ve ihine tea mo vai na esi voheigo, goin lado vohogi na gineu hi a tangaloi hi u veie voheigo, a vevenagi a Huqe vin lado vohogi na havagi ngehi gom vaie.

¹⁴Nem vai na gineu ingere; nge a gineu hageliu, nein tabe gimiu gagatalegi. A tabetabe hi vin wiri bubugi gimiu lolo nomiu burigi garea.

¹⁵Nein siregi na tamwata hi i Kraes u betea lawe gimiu ve vin dedegi na nomiu domiana, a vevenagi igimiu doluegi neu ware ve igimiu a betugi gatagale huri nein lei na tamwata. Nein veve garea lawe na Huqe gesegi.

¹⁶Nein siregi na leo huhui noi Kraes na toga na siaga lumiu. Igimiu nen huhui ko nen vaga mwamwavigi gimiu gagatalegi gina mataisao. Igimiu nen huri ahi lo Sam, ko a ahi veve gareagi God mena nomiu tataro veve garea lolo lolomiu lawe God.

¹⁷A gineu doluegi hi nem vaire sige nem veve, nein veire gina lado mava lo henai Huqe i Jisas ko nein veve garea lolo lolomiu lawe God a mama.

¹⁸Gimiu vavine hi neu legi beno nein rong huri tamai netumiu, a vevenagi u vovohoi ve dain vei na gineu mwerehi lawe na Huqe.

¹⁹Mwera hi neu legi beno, nein tabe horamiu ko nein vano rorongo meire.

²⁰Ira renetugi, igimiu nein rong huri tamamiu tora retahimiu gina gineu doluegi, a vevenagi a Huqe vin rong garea huri na gineu mwerehi.

²¹Ira tama, nein mese vai renetumiu ram rong esi. Tare ve nem gato siaga lawagi meire ve rain rong hogo lune, ingere a domire vin soi gina havagineu tea hi ingere ram tarani ve rain vei.

²²Tangaloi tabana vurogi, nein rong huri na nomiu tangaloi hi ram huqegi goro gimiu lo gineu doluegi. Nein mese lado mavaginire lune ve ram leo bibi gimiu, tau nem vaie huri ve ran leo gareagi gimiu, nge nein tabana hogo, a vevenagi neu lado mavagi na Huqe.

²³Lo tabana doluegi ingere hi nem vaire, nein tabana vin garea tabetabegi. Nein tabana mwerehi ve nem tabana lawe na Huqe, hatie lawe na sinobu.

²⁴Nein lado bibi huri ve nein lei na nomiu tabeana dena Huqe, ngehi u waratauginie lawe na nona sinobu. Igimiu neu tabana lawe na Huqe i Kraes.

²⁵Nge nein lado bibi huri ve ihine tea ve mo vai na gineu esi vin lei na leovevegi huri na gineu esi hi, ko a Huqe vin vevegi na tangaloi vin huri na matahala gatagale.