Read East Ambae KOLOSI 4 Bible Online

KOLOSI 4 - East Ambae bible

KOLOSI 4

¹Gimiu hi nem huqegi goro na tangaloi tabana vurogi, nein bete na havagineu hi u garea ko u tatarise lawe na nomiu tangaloi tabana vurogi. Igimiu nein lado haqe ve igimiu a nomiu huqegi mo toga.

²Nen tataro na vano tuturedu, nein mese wiriwiri, ko nein tataro nein veve garea lawe God gesegi.

³Gimiu nein tataro vage huri gamai ve i God vin bete na tarogi lawe gamai vin garea huri gamai gain veve na nona Roro lawe na sinobu. Gimiu nein tataro ve igamai gain waregi sere na leo noi Kraes hi u eno hiligi ve i God vin vei gimiu nein iloilo huri Kraes. Giniehi ineu nam toga lolo valei veuveu.

⁴Igimiu nen tataro hurieu huri ve nain waregi sere na Roro lawe na sinobu vin matamwasara.

⁵Gimiu nein mataisao lo turegi huri nein dori mena sinobu ngerehi hatie nora lado hogo lui Kraes, nein vei gimiu ve nein bului leire lo matahala u sao tare ve nem vai lei.

⁶Lune igimiu nem laqa a leomiu rain mesuri gesegi, huri gimiu nein duvi lei na tangaloi doluegi lo matahalagi u garea.

⁷Tikikas ingeie i tueku lui Kraes nau tabea ko ingeie a tangaloi lado hogo siaga ko mo tabana meieu lawe na Huqe. Nge vin veve na gineu doluegi hi rau vei laweau.

⁸Giniehi nam horae, siu huri gimiu nein ilo vurugegi huri gamai ko huri ingeie vin vaga mwamwavigi na domimiu.

⁹Nau horae mei Onesimas, ingeie a tangaloi lado hogo siaga ko i tuada lui Kraes ko ingeie gatagale lo nomiu burigi. Ingere rain veve lawe gimiu huri na gineu rau vei tangaha.

¹⁰Aristakas ingeie u toga meieu lolo valei veuveu, ko i Mak i tuei Banabas, ram hora nora veve garea lawe gimiu. Nau veve lawe gimiu beno huri na hava gineu hi ve dai vei huri Mak. Tare ve mo vonatu nein lei vurugeginie.

¹¹I Jisas, ingeie tau hi dam warea ve i Jastas, ingeie mo hora nona vevegarea lawe gimiu vage. A duvi Israel gaitolu hogosie hi rau lado hogo ram tabana bubugi meieu huri na ute hi i God mo ratahigi lolona, ko ingeie rau veieu nam havuhevu.

¹²Ebravras, a tangaloi tabana noi Jisas Kraes, nge lo nomiu burigi mo veve nona veve garea lawe gimiu vage. Mo tataro gesegi huri gimiu ve igimiu nein meuri ko nein metue lo nomiu lado hogo ko huri nein vei na gineu doluegi hi God mo tarani huri gimiu.

¹³Nau ilo huri ve ingeie u tabana gagarasi huri gimiu ko a sinobu ta lo qatui venue Laodisia ko Hierapolis.

¹⁴Dimas ko i tuada Luk, ingeie a dokta, mo hora nona veve garea lawe gimiu.

¹⁵Igimiu nein veve nomiu veve garea lawe retuada ta Laodisia. Ko nein veve nomiu veve garea lawe Nimva a vavine hi nem sone bubugi gesegi lo valena.

¹⁶Lo tagugi hi neu velu na leta ngaha, nein ragahui huri nein veve lawe na sinobu lolo warelue ta Laodisia ve rain velue. Ko igimiu nein velu na leta hi nau ulie lawe na warelue ta Laodisia.

¹⁷Igimiu nein veve lawe Akibas, ve vin vei leo ve igimiu nein vei vagasigi na tabana hi a Huqe u bete lawe gimiu.

¹⁸Ineu Bol, nam veve noku veve garea lawe gimiu ko nau ulue gina limeku siboku. Nein ladoau ve ineu nam toga lo garo vau. A hogogi na toga mei gimiu.