Read East Ambae 1 TESALONAEKA 1 Bible Online

1 TESALONAEKA 1 - East Ambae bible

1 TESALONAEKA 1

¹A leo tureture lawe na warelue ta Tesalonaeka mo vonai dein Bol, Saelas ko i Timoti. A warelue mo labe lui God a mama ko a Huqe Jisas Kraes. A hogogi ko tamwata na toga mei gimiu.

²Lo nomai tataro gesegi igamai gam veve gareagi God huri gimiu doluegi ko igamai gam lado huri gimiu vataha tarogi lune gam tataro

³Vataha tarogi lo nagoi God a mama igamai gam lado taligu huri na doridori garea neu veire a vevenagi, a nomiu ladohogo. Ko a hava tabanagi neu veire huri mo haharagi na nomiu tabetabe. Ko igamai gam veve gareaginie huri gimiu nem labe siaga lo nomiu ladohogo huri na nomiu lado tare lui Jisas Kraes a noda Huqe.

⁴Retueku ko irehaqeku, i God u tabe gimiu ko dau ilo ve ingeie u leo wahe gimiu,

⁵a vevenagi a Roro Garea hi gam waregi serea lawe gimiu hatie gina leo hogosie, nge gina huireanai Vui gogona ko gina iloilogi huri ve a hogo. Siu vage igimiu neu ilo vurugegi huri na nomai togaana lo tarogi hi gau toga mei gimiu huri ve gain bului gimiu.

⁶Igimiu neu huri vurugegi na taikerumei ko a taikerui noda Huqe vage. Neu gagarasi vatu sao, nge neu lei tabetabegi na leo huhui hi gina havuhevu ngehi mo vonai dena Vui gogona.

⁷Siu igimiu nem voragi na taikeru garea lawe na tangaloi doluegi hi rau ladohogogi na Huqe lo qatui venue Masedonia ko Akaia.

⁸Ko igimiu nem waregi sere na leo nona Huqe hatie lo qatui venue Masedonia ko Akaia hogosie, nge a nomiu lado hogo lui God mo vai na tangaloi ram rongo huri gimiu vataha vanue. Siu igamai gahe lado utu tea ve gain veve sere na roro huri gimiu.

⁹A tangaloi vataha vanua ram ngasagi na roro huri neu lei tabetabegi gamai lo tarogi gau toga mei gimiu ko vage neu siregi nehe huduhudu goro na god a nunui gineu tea taligu, nge nem huduhudu goro na God hi a hogo ko mo mwaso ta vagi tuei.

¹⁰Igimiu nein toga rarai netui God ngehi u vagamwasoie dena mateana huri ve vin himei den eulu. Ingeie i Jisas hi vin vagamwasoi gide dena lologagasi noi God lo tarogi ingeie vin vevegi gide.