Read East Ambae 1 TESALONAEKA 2 Bible Online

1 TESALONAEKA 2 - East Ambae bible

1 TESALONAEKA 2

¹Retueku ko irehaqeku, neu ilo vurugegi huri ve a nomai sirosiro mei gimiu vin he vano vurogi tea, nge vin wei a mwasigi.

²Igimiu neu ilo vurugegi na havagineu rau vei lawe gamai lo tarogi gau toga Vilibae. A tangaloi ram veve asiesigi gamai. Nge a noda God mo vai huiregi na domimei huri ve gain waregi sere na nona Roro Garea lawe gimiu.

³Igamai gam navu siaga dein gimiu hatie gina kalikeli sige a domiana rahe vovohoi tea. Igamai gahe vaileo tea ve gain lamagi gimiu.

⁴Nge gam waregi sere na Roro Garea a vevenagi i God u vei lehi na domimei beno ko u lado hogogi gamai huri ve gain vei mwere hi. Igamai gam waregi sere na leo ingere ngaha hatie huri ve vin vei havuhevugi na tangaloi, nge vin vei havuhevugi God ngehi u vei lehi na domimei.

⁵Igimiu neu ilo vurugegi huri ve igamai gahe vai leo tea ve gain gato sinesine gimiu, sige gam veve leo ve na vunigi na nomai lado lawua huri vivilakogi, i God u ilo huri ve a gineu ngaha a hogo.

⁶Igamai gam vai mwere ngaha hatie huri ve igimiu sige a tangaloi wagineu vage rain gerigi gamai,

⁷ko vage igamai a gai hora gogona noi Kraes gau vei lei ve gain nevu gineu sao dein gimiu, nge igamai gau tatabegi gimiu mwere na vavine hi mo leo huri renetune.

⁸Igamai gahe waregi sere na Roro Garea noi God tea hogosie lawe gimiu nge gau siregi na mwasoamai vage ve gain bului gimiu a vevenagi gau tabe gimiu.

⁹Retueku ko irehaqeku nem lado bibi na nomai gagarasi ko a nomai tabana huire hi gau veire lo tarogi hi gau toga mei gimiu. Igamai gau tabana ko u reni huri gam bului gamai sibomai lo tarogi gam waregi sere na Roro Garea noi God lawe gimiu ko gahe vai garasi gimiu tea.

¹⁰Lo tarogi gau toga mei gimiu, a mwasoamai u gogona ko u vovohoi, hatie asiana lune. Igimiu neu ilo vurugegi huri ve a hogo, ko i God vage.

¹¹Neu ilo vurugegi huri ve gam leo huri gimiu gagatalegi mwere na tama hi mo leo huri netune sibona.

¹²Igamai gam hauragasi na domimiu ko gam navu siaga dein gimiu ve nein vei leo ve nein toga lo togaana u garea lo nagoi God hi ingeie u ware gimiu su lo tanoi ratahigi u roroa.

¹³Mwerehi vage, Igamai gam veve gareagi God gesegi a vevenagi neu lei tabetabegi na leo hi neu rongoe dein gamai huri ve a leo hi a noi God, hatie nona tangaloi vurogi, ko a hogo a leo noi God hi mo tabana lolo lolomiu hi neu lado hogo ginie.

¹⁴Retueku ko irehaqeku a gineu gagarasi ngerehi rau veire lawe gimiu u mwere hi rau veire lawe na warelue Gogona noi God lui Kraes lo vanue Judia. A sinobu ta lo vanuemiu sibomiu rau vei garasi gimiu mwerehi ra duvi Judia rau vei garasire.

¹⁵Ingere rau wehi na noda Huqe Jisas Kraes ko a tangaloi ligoligogi noi God ko vage ingere ram garogi gamai ve gan vano den vanue Judia. Ingere rahe vairoroagi God tea lo nora lalakogi ko ram qalogoro na tangaloi doluegi.

¹⁶Ingere ram vai leo ve ran tugoro gamai ve gan mese huhui na tangaloi ngerehi hatie duvi Israel, vai teu ingere ram haqe na mwasoana. Lune ingere ram vai mwerehi, ingere ram vai na bugure mo sao mo vagevage. I God mo hora na nona lologagasi mo hivo lure lo tarogi hi ram vai mwerehi.

¹⁷Retueku ko irehaqeku, hatie huri igamai gam toga vagahao dein gimiu lo mahogi qilodo ngaha nge a domimei he sala tea dein gimiu ko gam tarani garagara ve gan lehi gimiu ko gam vaileo ve gan vonatu lobemiu.

¹⁸Igamai gam tarani garagara ve gan vonatu lobemiu. Ineu Bol mena buluiku, gau vei leo ve gain vonatu lobemiu vagasao beno nge i Satan mo tugoro gamai.

¹⁹Igimiu a nomai lado tare, a rong garea, ko a gineu gagarea ngerehi ve gain sage gamai hurire lo taroi vonaiana noi noda Huqe Jisas Kraes ram eno lumiu.

²⁰A hogo igimiu nem vai gamai gam havuhevu ko a henamai mo roroa.