Read East Ambae 1 TESALONAEKA 4 Bible Online

1 TESALONAEKA 4 - East Ambae bible

1 TESALONAEKA 4

¹Retueku ko irehaqeku gamai gau huhui gimiu huri ve nein toga lo matahala u vovohoi huri ve i God vin rong gareagi gimiu ko igimiu nem toga lo matahala mwerehi. Siserigi ngaha igamai gam navuhi gimiu ko gam vagamwamwavigi na domimiu lo henai noda Huqe Jisas Kraes huri ve nen toga lo matahala vovohoi na vage vage.

²Igimiu neu ilo vurugegi na hava gineu hi gau veve lawe gimiu huri ve nein veire lo huireana noi noda Huqe Jisas Kraes.

³I God mo tarani gimiu ve nein toga gogona ko nen toga vagahao den lengai bakabaka.

⁴Ingeie mo tarani ve nein ilo vurugegi na matahala hi ve nein leo huri na tarabesimiu vin vovohoi lo matahala ngehi u gogona ko a tanoi lado mava lune.

⁵Igimiu nein mese siregi na tarabesimiu ve na vai na bakabaka mwere na sinobu ngerehi rahe ilo God tea.

⁶Mwerehi vage nein mese vai asiesigi sige nem lamagi na tangaloi noi Kraes lo matahala mwere ngaha. A Huqe vin vevegi na sinobu ngerehi ram vai na gineu ingere ngaha a vevenagi gau veve serera lawe gimiu beno ko gau vevematagutegi lawe gimiu vage.

⁷I God u ware gide ve dain toga gogona, nge he tarani tea ve dain toga lolo galegaleasi.

⁸Siu a tangaloi gatagale he masinge tea ve vin rong huri na leo huhui ngaha, ingeie he tabe God tea, hatie leo huhui nona tangaloi vurogi, ko i God ingeie hi u bete na nona vui gogona lawe gide.

⁹Igamai hatie taranigi ve gain uli lawe gimiu huri na tabetabe huri rehavamiu lui Kraes, a vevenagi i God u huhui gimiu beno ve nein vui tabetabe gimiu.

¹⁰Ko a hogo igimiu nem tabe na tangaloi noi Kraes doluegi talo qatui vanue Masedonia. Retueku ko irehaqeku, siserigi ngaha igamai gam vaga mwamwavigi na domimiu ve nen tabera na liuliu vage.

¹¹Nen vai na havagineu hi neu vei leire ve nein toga lo tamwata. Nen leo huri na tarabesi nomiu lalakogi garea sibomiu ko nen vai na nomiu tabana sibomiu mwerehi gau veve lawe gimiu beno.

¹²Tare ve nem vai mwerehi, siu a sinobu ngerehi rahe lado hogo tea lui God rain lado mavagi gimiu ko igimiu nein he lado tea talure wai tangaloi huri na nomiu taraniana.

¹³Retueku ko irehaqeku, gamai gam tarani garagara ve nein ilo vurugegi huri na tangaloi noi Kraes hi rau mate beno. Siu igimiu nein mese hahagavi mwereire lavasigi hi hatie nora lado tare lure.

¹⁴Igamai gam lado hogo huri ve i Jisas u mate ko u maraga taligu. Siu a vevenagi ingeie, i God vin vei ragasire mei Jisas ira hine hi rau mate beno.

¹⁵A havagineu hi igamai gam veve lawe gimiu siserigi ngaha a roro mo vonai dena Huqe sibona. Igide hi dam mwaso tau, lune a Huqe vin vonai taligu dain he vano tea tomue denire hi rau mate beno.

¹⁶A Huqe sibona vin himei den eulu gina dilo u lawua garagara ko mena diloi muei engsel ko mena diloi tavue hi mo gigilegi na diloi God mo ware. Ko ingerehi rau mate beno rau ladohogogi Kraes rain maraga gitomue.

¹⁷Lo tagugi hi igide hi dam mwaso tau dain bubugi hage meire lolo tai lengi huri dain vui haqe mena huqe lo mahava. Ko igide dain toga mena huqe tavagi tuei.

¹⁸Siu igimiu nein vaga mwamwavigi gimiu gagatagalegi gina leo ngerehi.