Read East Ambae 1 TESALONAEKA 5 Bible Online

1 TESALONAEKA 5 - East Ambae bible

1 TESALONAEKA 5

¹Retueku ko irehaqeku he tatarise tea ve gain uli na leo lawe gimiu huri na ranigi ko a tarogi.

²Igimiu neu ilo vurugegi na rani hi a Huqe vin vonai taligu huri vin vagavutugegi gide vin mwere na tangaloi balubelu hi mo digegi na balu lolo bongi.

³A sinobu rain veve vena, “Igamai gam toga u tamwata ko gau mwaso,” lo taro hi a gineu esi lalawua rain hogosire lai, ko rain vei esisesiginire vin siseri. Ngehi u mwere na gagarasi ngehi mo vanai siserigi lawe na vavine hi a maresu mo ragasie mo rarai ve na mwaso a sinobu ngerehi rain he toa lai tea.

⁴Nge igimiu, retueku ko irehaqeku, nehe toga tea lolo dodogi ko a ranigi hi vin he vaga vutugegi gimiu tea mwere na tangaloi balubelu.

⁵Igimiu ira netui leleo ko rani. Igide hatie maresu talolo bongi sige talolo dodogi.

⁶Siu igide dain mese mwereire sinobu wagineu hi ram maturu, nge da rada dam ladolado ko ve da kokogoro na noda togaana.

⁷Ira hine hi ram maturu, rain meturu lolo bongi. Ira hine hi ram torongo ram torongo lolo bongi.

⁸Nge igide dam toga lo leleo siu dain kokogoro gide siboda. Igide dain seru goro gide gina lado hogo siaga ko a tabetabe huri vin tugoro gide, ko a noda lado tare huri na mwasoana ko vin voragi na noda gairorovi qetu ngehi a tangaloi vuro ram tari ram vano lolo vuro.

⁹I God he leo wahe gide tea ve dain rong-gagarasi lo nona lologagasi, nge huri ve dain haqe na mwasoana lui noda Huqe Jisas Kraes.

¹⁰I Jisas u mate huri gide huri ve dain toga lai bubugi meie hatie huri tare dam mwaso sige dau mate, lune ingeie vin vonai taligu.

¹¹Siu igimiu nen vaga mwamwavigi na domimiu gagatagalegi ko nen bete na huireana lawe gimiu gagatagalegi mwerehi igimiu nem vai siserigi ngaha.

¹²Retueku ko irehaqeku siserigi ngaha igamai gam navuhi gimiu ve nen lado mavagi rahine hi ram tabana siaga mei gimiu, rau tomuegi gimiu ko rau huhui gimiu huri na Huqe.

¹³Nen lado mavaginire ko nen tabera, a vevenagi ingere rau vei na tabana gagareagi. Nen toga tamwata mei gimiu gagatagalegi.

¹⁴Retueku ko irehaqeku igamai gam navuhi gimiu ve nen veve matagutegi lawera ngerehi rahe tabana tea. Nen vaga mwamwavigi na domire ngerehi ram matagu. Nen buluire ngerehi rau wiriwiri. Nen rong ribi mena tangaloi doluegi.

¹⁵Neu ilo vurugegi ve ihine tea vin mese wono na gineu esi gina gineu esi taligu, nge nen vai leo ve nen vai na gineu garea tamwere lawe gimiu gagatagalegi ko lawe na sinobu doluegi.

¹⁶Nen vai leo ve nen rong garea lolo lolomiu gesegi

¹⁷Nein tataro gesegi.

¹⁸Ko igimiu nen veve garea huri na hava gineu tea hi mo vai. Ngehi a hava gineu i God mo tarani huri gimiu lui Jisas Kraes.

¹⁹Nein mese diri vagamate na tabana nona Vui Gogona lolo lolomiu.

²⁰Nein mese leo hivohivogi na leo ligo ligogi mwere ve he mava tea.

²¹Nge nein vei lehi na gineu doluegi, ko nein wiribibi na hava gineu hi u garea.

²²Ko nein tino vagahao den gineu doluegi hi rau esi.

²³Siserigi ngaha igamai gam tataro ve i God sibona, ingeie a vui tamwata vena vai mwasaragi gimiu hi ira nona sinobu sibona, ve a rosorosomiu doluegi, a mwasoamiu, a tamatemiu ko a tarabesimiu ve na toga tabetabegi ko hatie sokorana lune, vin dadari a noda Huqe i Jisas Kraes vin vonai taligu.

²⁴Igimiu nein lado hogogi na Tangaloi gatagale hogosie hi u ware gimiu ve vin vei na gineu ingere hi lawe gimiu.

²⁵Retueku ko irehaqeku nein tataro huri gamai.

²⁶Lo tarogi gimiu nem vui haqe tomiu retuemiu nein sunguni gimiu gagatalegi gina sungsunguni gogona.

²⁷Igamai gam veve lawe gimiu lo henai noda Huqe ve nen valu na revereve ngaha lawera doluegi hi rau lado hogo.

²⁸A hogogi noi noda Huqe Jisas Kraes na toga mei gimiu.