Read East Ambae 2 TESALONAEKA 1 Bible Online

2 TESALONAEKA 1 - East Ambae bible

2 TESALONAEKA 1

¹Den Bol, Saelas ko i Timoti. Lawe na warelue lo qatui venue lawua Tesalonaeka lo henai God a mama ko a noda Huqe Jisas Kraes.

²A hogogi ko a tamwata na toga mei gimiu dein God a mama ko a Huqe i Jisas Kraes.

³Retueku ko irehaqeku igamai gam veve garea lawe God huri gimiu gesegi. Ngehi u vovohoi hogo, a vevenagi a nomiu lado hogo mo mwaso mo vage vage ko a tabetabe ngehi igimiu doluegi nem hako huri gimiu gagatagalegi mo mauri vage.

⁴Igamai gam sagegi gimiu huri na matahala ngehi igimiu nem labe siaga tuturedu ko a nomiu lado hogo lumiu, hatie huri ram vai asiesigi gimiu ko nem rong-gagarasi lo gineu esi rau sao.

⁵Nge ngaha mo haharagi vurugegi huri ve a hogo a leo vevegi noi God u vovohoi. Ingeie mo tarani garagara ve igimiu nein tatarise ve nein vano lai lo ute hi i God mo ratahigi lolona huri na nomiu gagarasiana.

⁶I God vin vei na havagineu hi u vovohoi. Ingeie vin vei asiesiginire hi ram vai asiesigi gimiu.

⁷Ko ingeie vin bete na mangaana lawe gimiu hi nem gagarasi ko lawe gamai vage, lune a Huqe i Jisas Kraes vin vonai mena mui evi den eulu meire nona engsel muremure.

⁸Siu ingeie vin veveginire hi rau haro God ko rahe rong huri na Roro Garea tea huri a noda Huqe i Jisas Kraes.

⁹A leo vevegi rain leie lo rani hi, vin eno vagi tuei. A noda Huqe vin teu vohoginire, ko ingere rain he vonai tea kakarani lobena taligu, ko rain he lai lei na nona huireana lawua tea ngehi a huireana ta eulu.

¹⁰A gineu ingere ngaha rain vei lo rani hi a Huqe Jisas Kraes vin vonai taligu ve na lai na roroa, a vevenagi ira nona tangaloi gogona. Ko a tangaloi doluegi hi rau lado hogo rain awogi huri ram lehi Jisas. Igimiu nein bulu mena buri tangaloi ngerehi a vevenagi neu lado hogogi na havagineu hi gau veve lawe gimiu.

¹¹Giniehi igamai gam tataro huri gimiu gesegi, gam hui siaga dein God ve na bului gimiu ve nein toga lo mwasoana ngehi u ware gimiu huri ve nein toga lune. Igamai gam tataro huri ve a huireana noi God vin bului gimiu ve nein vai na gineu garea hi nem taranire ko nein vai na tabana ngehi mo vonai dena nomiu lado hogo.

¹²Igamai gam tataro huri na gineu ngerehi, siu huri ve a henai noda Huqe Jisas Kraes vin roroa lumiu, ko a henamiu vin roroa lune. A roroa hi mo vonai den hogogi noi noda God ko a Huqe i Jisas Kraes.