Read East Ambae 2 TESALONAEKA 2 Bible Online

2 TESALONAEKA 2 - East Ambae bible

2 TESALONAEKA 2

¹Retueku ko irehaqeku, a gineu mei gamai ve gain veve lawe gimiu huri na vonaiana noi noda Huqe Jisas Kraes, ko a tarogi hi igide dain bulu bubugi meie.

²Nein mese rom romasi siserigi lolo domimiu sige nem matagu tare ve nem rongo ve a rani nona Huqe u vonai beno. Ihine tea vin veve na gineu ngaha lo leo ligoligogi, sige a roro, sige gina leo lo revereve hi u vonai dei gamai.

³Nein mese siregi na tangaloi gatagale ve na vagalengagi gimiu lo hava turegi tea. A rani nona Huqe vin he vonai tea vin dadari lo taro hi a tangaloi u sao rain tudori dein God vin vei, ko a tangaloi galegaleasi hi mo vano lo turegine vena hivo lolo avi redu, mobei evudare.

⁴Ingeie vin qalogoro ko vin teue sibona hage namawe goro na gineu kalikeli ngehi a sinobu ram waregi ve a God sige a gineu tea ngehi a sinobu ram huduhudu goro. Ko a tangaloi galegaleasi hi vin vei leo vena soro lolo valei tataro noi God mo toga aiehi mo veve ve ingeie i God.

⁵Nau veve beno lawe gimiu lo tarogi nau toga mei gimiu ve a gineu ingere ngaha rain vei. ?Bataha nem lado bibi sige hatie?

⁶Ko siserigi ngaha neu ilo na hava gineu hi mo tugoro na tangaloi galegaleasi siu huri ve vin evudare lo tarogi vovohoi.

⁷A huireana hiligi nona galegaleasi u tabana beno lolo ure nge a tangaloi gatagale hogosie mo tugoro na huireana hi. Ko ingeie vin tugoroe tamwere hi vin dadari rain lei vohoginie dena matahala.

⁸Siu tangaloi galegaleasi vin evudare, ko a Huqe vin ue vagamatea gina mauvine ngehi mo mwalue dena singona ko vin makaraginie gina varavarai nona vonaiana.

⁹A tangaloi galegaleasi hi vin vonai gina huireana noi Setan. Ingeie vin hakovi na huireana lawua ve vin vei na vaigivui kalikeli, wagiwegineu u sao a gigilegi ko a gineu garigiana.

¹⁰Ingeie vin vei na halai galegaleasi doluegi vena kali lehire hi rau sala. Ingere rain mate a vevenagi ingere rahe masinge tea ve rain tabe lo hogo, tare ve rain tabe lo hogo, ingere rain mwaso.

¹¹Giniehi, i God mo hora na gineu huire lawera ngehi mo tomuegi beraginire dena hogo siu ingere rain lado hogo gina kalikeli.

¹²Siu huri ve ingere doluegi rain lei na leo vevegi huri rahe lado hogo tea gina hogo, nge ram havuhevu huri ram vai na gineu rau esi.

¹³Retueku ko irehaqeku, igimiu hi a Huqe u tabe gimiu, i God u leo wahe gimiu lo tavuigi ve nein mwaso. Giniehi, igamai gam veve gareagi God huri gimiu. Igimiu nem mwaso gina managi nona Vui ngehi mo vai gimiu nem gogona ko gina nomiu lado hogo siaga lo hogo.

¹⁴I God mo lalakogi lo Roro Garea hi igamai gam toretore ginie lawe gimiu, vena ware gimiu ve nein mwaso ko ve nein bulu lei meie lo roroa noi noda Huqe i Jisas Kraes.

¹⁵Siu, retueku ko irehaqeku, igimiu nen labe siaga ko nen labe tamwere nen lado hogo gina leo huhui hi gau bete lawe gimiu lo nomai laqaana ko lo nomai revereve gau reve lawe gimiu.

¹⁶A nomai tataro lawe na noda Huqe i Jisas Kraes sibona ko i God i tamada ve ron vaga mwamwavigi na domimiu ko ve ron vai siagagi gimiu lo gineu gagareagi doluegi ngerehi nem vaire sige nem vevera. I God u tabe gimiu, ko lo nona tabetabe lawua u bete na lado tare garea lawe gide ko a vagamwamwavigi na domiana ngehi vin vano tuturedu vagituei.