Read East Ambae 2 TESALONAEKA 3 Bible Online

2 TESALONAEKA 3 - East Ambae bible

2 TESALONAEKA 3

¹Siu reteuku ko irehaqeku, a nomai leo vagasigi lawe gimiu ve nen tataro huri gamai ve a leo huhui nona Huqe na mawahe na siseri ko huri a sinobu rain lei na leo huihui hi gina lado mava, mwerehi u vei lawe gimiu.

²Igimiu nen tataro vage ve i God na tugoro gamai den tangaloi ngerehi a domire rau huire ko rau esi, a vevenagi a tangaloi doluegi rahe lado hogo tea.

³Nge a Huqe u lado garagara ko ingeie vin bete na huireana lawe gimiu ko vin tugoro gimiu den Tangaloi Galegaleasi.

⁴A Huqe mo vai gamai gam rong hogo huri ve igimiu nem vai ko nein van tuturedu ve nen vai na gineu ngerehi gau veve lawe gimiu.

⁵Igamai gam tataro huri ve a Huqe na tomuegi na lolo lolomiu sulolo tabetabe noi God ko a rongribi noi Kraes.

⁶Retueku ko irehaqeku, lo huireana noi noda Huqe Jisas Kraes igamai gam veve siaga lawe gimiu ve nein tino vagahao den hava tangaloi hi u lado hogogi God nge mo rao tabana ko he huri na leo huhui tea hi gau bete lawe gimiu.

⁷Igimiu sibomiu neu ilo vurugegi ve nein toga mwerei gamai gam toga. Igamai gahe huiwiri tea lo tarogi gau toga mei gimiu.

⁸Ko lo tarogi gam gani na hinaga gana tangaloi wagineu, tamwere gam volie. Gam vai na tabana huire lolo bongi ko lolo rani siu huri gahe vai garasi gimiu tea.

⁹Siu u vovohoi huri ve igamai gain nevuhi gimiu ve nein bului gamai, nge igamai gam tabana huri gam leo huri lei gamai sibomai siu huri igamai gain voragi na mataleleogi lawe gimiu huri nein huri lune.

¹⁰A tau leo ngaha gau bete lawe gimiu lo tarogi gau toga mei gimiu. A hava tangaloi hi mo huiwiri vin mese gagani.

¹¹Igamai gam rong huri ve a tangaloi lavasigi lolo nomiu burigi ram huiwiri. Vataha rani rahe vai na gineu tea, nge ram ava ava mena tangaloi lalavasigi huri ve ran rogeginire mena nora tabana.

¹²Lo henai noda Huqe i Jisas Kraes igamai gam veve siaga lawe na tangaloi huiwiri ngerehi ve ran tabana surigi ko huri rain leilei na gara hinaga sibora.

¹³Siu, iretueku ko irehaqeku, igimiu nehe wiriwiri tea vohogi ve nein vei na tabanagi hi rau garea.

¹⁴Tare ve a tangaloi lavasigi rahe masinge tea ve rain rong huri na havagineu hi igamai gam vevera lolo revereve ngaha, siu igimiu nein mata bibire. Igimiu nein mese bubugi meire, siu huri ingere rain maemae.

¹⁵Nge, igimiu nein mese laire ve ingere a nomiu tavului vuro. Ingere hi i retuemiu ko ingerehi a nomiu tabana huri ve nein vovohoiginire.

¹⁶Siserigi ngaha a noku tataro huri ve a Huqe hi ingeie a vui tamwata na bete na tamwata lawe gimiu vataha tarogi ko lo matahala doluegi. A Huqe na toga lobemiu doluegi.

¹⁷Ineu Bol, nam qere na noku revereve siserigi ngaha lo tanoi limeku siboku. A noku revereve doluegi nam qerea mwere ngaha, huri mo haharaginie huri ve a leogi ram vonai denieu. Ko mo huri na matahala hi nam ulie.

¹⁸A hogogi noi noda Huqe Jisas Kraes na toga mei gimiu doluegi.