Read East Ambae 1 TIMOTI 1 Bible Online

1 TIMOTI 1 - East Ambae bible

1 TIMOTI 1

¹Ineu Bol a gaihora noi Jisas Kraes, i God a noda vagamwasoi ko i Jisas Kraes, ingeie a vui noda lado tare.

²Ineu nau uli na leta ngaha lawego Timoti, mwere ve iniko netuku vohogi, a vevenagi a nomu lado hogo ve i God a mama ko i Jisas Kraes a noda Huqe ron bete na hogogi lawego, a tanoi hahagavi ko a tamwata.

³Ineu nam tarani ve iniko goin toga Evesas vin qaravu mwerehi nau veve lawego lo taro hi nau vanatu Masedonia. A sinobu lalavasigi aiehi ram huhui na leohuhui kalikeli ko iniko goin veve siaga lawera ve rain siregi.

⁴Iniko goin veve lawera ve ran siregi vohogi na leo kalikeli ngerehi hatie hogo lure ko a babai hea saosao ngehi mo haharagi na duvi retubure. A gineu ngerehi hi mo bete na vuigaro hogosie, rahe bului na tabana noi God tea, ngehi mo vai lo ladohogo.

⁵A domiana huri na leohora ngaha huri ve a sinobu rain hakovi na tabetabe hi mo vanai dena lolo lolora, a ladolado bagoto ko a ladohogo ngehi u vovohoi.

⁶A sinobu lavasigi rau vagasilegi na gineu ingere ngaha ko ram veve leo rahe vovohoi tea.

⁷Ingere ram tarani ve rain voragi huhui talo leohora noi Mosis, ingere rahe ilo na iloiloi gineu tea hi ram laqaginie sige rahe ronghogo tea.

⁸Igide dam lo huri ve a Leohora u garea, tare ve ihine tea mo huri vurugeginie.

⁹Igide dau ilo vage huri ve a Leohora u vei hatie huri na sinobu hi rau garea, nge u vei hurire hi ram kalokalo lo Leohora ko u vei hurire hi rahe masinge tea ve rain huri lune. A Leohora hi mo eno huri na sinobu hi ram qalo goro God ko ingere rau galegaleasi, ingere rahe gogona tea ko hatie nora ladohogo ve u vovohoi, ingerehi ram ue vagamate retamara ko ratahire, ingere ram ue vagamatera tangaloi wagineu.

¹⁰Ingere ram na galegaleasi lo bakabaka, ingerehi ram vai na bakabaka meire tangaloi wagineu hi a tarabesire rau mwereire sibora, ram sogagi tangaloi hi ram tabana vurogi huri mane, ram kalikeli, ingere ram tauteu esi lo tangaloi, ko ingere ram vai leo ve ran vai na gineu ve na tugoro na leo huhui hogo noi God.

¹¹A leo huhui ngaha, a duvi Roro Garea noi God ngehi u betea laweau huri ve nain waregi serea.

¹²Ineu nam veve garogi na noku Huqe i Jisas Kraes, ingeie u bete na huireana laweau, a vevenagi ingeie a domine u siaga luku ko u bete na tabana ngaha laweau ve nain tabana lawea.

¹³Lo taro rau vano beno, ineu nau veve leo rahe garea tea vovohoi Kraes ko nau veiveie ko nau vei na gineu hala saosao vena vai gagarasiginie. Nge i God u haharagi na hahagavi laweau, a vevenagi ineu nahe ilo havagineu tea hi nam vaie. Ineu nahe ladohogo tea.

¹⁴Nge a noda Huqe u bete doluegi na nona hogogi laweau u lawua ko u bete na ladohogo ko a ladotabe ve roin voragi noda lo bulu gatagale lui Jisas Kraes.

¹⁵Siu a havagineu hi nam veve a hogo, ko ve igimiu nein lei vurugeginie doluegi. I Jisas Kraes u vonai lolo ure ve vin vagamwasoire tangaloi galegaleasi, denire hi, ineu nau esi garagara.

¹⁶Nge i God u hagavieu, huri ve luku hi nau esi garagara dena tangaloi galegaleasi doluegi, i Jisas Kraes vin haharagi lei na nona rongribi ngehi hatie duvigi. A nona rongribi meieu mo vai na gigilegi luku huri rahine hi ve rain ladohogo ginie ko rain mwaso tavagi tuei.

¹⁷Lawe na Ratahigi mo huqegi tavagi tuei, ngehi vin he mate lai tea, dain he leo laie tea, a God gatagale hogosie hi ve dain gogodo ko dain ware roroiginie vagi tuei, Amen.

¹⁸Netuku, Timoti, a noku leo ngaha ve nai bete lawego, mo vanai dena leo ligoligogi ngehi rau bete lawego tuei. Iniko goin hakobibi na nora leo, ve na vaisiagagi na domimiu huri ve goin qalo vurugegi goro na gineu esi lolo ure ngaha.

¹⁹Iniko goin vano tuturedu lo nom ladohogo ko ve gon vai na gineu hi gom ilo huri ve u garea. A tangaloi lavasigi rau lado vohogi na gineu ngaha ko a nora ladohogo u mwerena aka hi u saka lo baba.

²⁰I Haemeneus ko i Aleksanda, ingere ru vei na gineu mwerehi, ineu nau betera lawe Setan ve ingere roin hikehike ve roin mese veve asiesigi God.