Read East Ambae 1 TIMOTI 3 Bible Online

1 TIMOTI 3 - East Ambae bible

1 TIMOTI 3

¹A havagineu hi nem veve a hogo, ihine tea mo tarani ve vin voragi tomtomuegi ingeie mo tarani ve vin vei na tabana garea.

²A tomtomuegi vin mese vai na gineu ve a sinobu rain veve hurie lune. Ko i gahorana gatagale hogosie, ingeie vin vei leo ve na toga gogona, vin matai sao, a tangaloi wagineu rain lado mavaginie, ingeie mo rarai huri ve vin lei na hala vano lo valena ko ingeie vin huhui lei.

³Ingeie vin mese inu lawagi na waen sige mo tarani ve na gilu, nge ingeie vin rorongo ko vin toga tamwata, he lado lawagi tea huri mane.

⁴Ingeie vin voragi tomtomuegi garea lawe renetune, i renetune ram rorongtaginie ko ram lado mavaginie.

⁵?Tare ihine tea he tomuegi lei renetune tea, a tangaloi hi vin leo huri lei na Warelue noi God mwerehilogo?

⁶Nge tomtomuegi hatie tangaloi hi mo bei lado hogo, vai teu mo sagea huri ve rau leo wahea sasawagi ko ingeie vin vagasile mwere na tamate u vagasile.

⁷A tomtomuegi vin lei na tanoi lado mava dena sinobu vage ngerehi rahe toga tea lolo warelue, siu huri a tangaloi wagineu rain mese veve hurie ve ingeie vin he dule tea lo vune nona Tamate ve na maemae.

⁸Lo matahalagi mwerehi tau, ira dikon a tangaloi wagineu rain lado mavaginire. Ingere rain veve hogo gesegi. Ingere rain mese inu wai lenga ko rain mese lado lawua huri mane.

⁹A rongrongora vin matamwasara huri rain huri na gineu hiligiana talo lado hogo, ngehi i God u sereluae lawe gide.

¹⁰A tangaloi huri ve vin lalakogi mwere na dikon, ira tomtomuegi talolo warelue rain vei lehire tomue, tare ve ingere rau tatarise, a warelue mo bei labetaginire.

¹¹Mwerehi vage, a vavine dikon a tangaloi wagineu rain ladomava ginire. Ingere rain mese veve asiesiginire wai tangaloi. Ingere rain vei leo ve rain toga gogona ko rain vovohoi lo gineu doluegi.

¹²A dikon i gahorana gatagale hogosie ko ingeie a tomtomuegi garea lawe renetune ko ire havara sibora.

¹³Ira hine hi ram tabanagi vurugegi lo tanoi dikon rain lei na tanoi ladomava u lawua. Rain he matagu tea ve rain ngasagi na lado hogo lui Jisas Kraes.

¹⁴Siserigi ngaha, lune ineu nam uli na leta ngaha lawego, lolo domiku ve vin he ribi tea ineu nain vanatu nain lehigo.

¹⁵Siu hatie huri, tare ve nahe vanatu vena siseri, a leta ngaha mo veve sere na doridori garea ngehi ve ira netui God rain hakobibie. Ira netui God ngehi a warelue noi God hi mo mwaso tavagituei, a gaiture ko a toga bibi lawe na hogo.

¹⁶“I God u haharaginie lawe gide lo tarabesi tangaloi. A Vui u veve vasogoginie ve ingeie a hogo ira engsel rau lehe. Ira gai hora rau waregi sereluae lawe na qatui venue lalawua doluegi. A sinobu doluegi lolo ure ram lado hogo ginie ko i God u leie taligu sueulu.”