Read East Ambae 1 TIMOTI 4 Bible Online

1 TIMOTI 4 - East Ambae bible

1 TIMOTI 4

¹A Vui Gogona u veve mata-mwasaraginie ve tetagaha tea a sinobu lavasigi rain teu vohogi na lado hogo, Ingere rain huri na vui ngerehi ram kalikeli ko a leo huhui nora tamate.

²A leohuhui mwerehi mo vonai dena leo rahe vovohoi tea, a vuigi a kalikeli. A rongrongora rau mate mwerehi ve rau gao lo vatu gara.

³Ingere ram gato goro na sinobu ve ran mese lagi ko ram veve lawera ve rain mese gani na halai hinaga lavasigi hi i God u teure ve a sinobu hi rau lado hogo rain genire gina veve garea lawe God, ko a vevenagi ingere rau ilo na hogo.

⁴A gineu doluegi i God u teure rau garea ko dain he rahaginire tea tare ve dau lei vurugeginire gina lengai veve garea.

⁵Ingere rau gogona a vevenagi i God u teure gina leona ko a vevenagi igide dam tataro hurire.

⁶Iniko goin voragi tangaloi tabana garea noi Jisas Kraes, tare ve gom veve na gineu ingere ngaha lawe retuemiu ko rehaqemiu. Iniko goin huire lo leoi lado hogo ko a leo huhui garea hi gom huri lune.

⁷Nge iniko goin mese huri lo leo ngerehi rahe vovohoi tea mena hogo noi God. Nge gon huhuigo sibomu ve gon tabanagi lawe God.

⁸Iniko goin huhui na huireana talo tarabesimu, u garea lo matahala lavasigi, nge goin tabanagi lawe God u garea lo matahala doluegi huri mo bete na vai garea lawego lo mwasoana hi bagataha ko lo mwasoana hi vin vanai tetagaha.

⁹A gineu hi nam veve a hogo, iniko goin lei vurugeginie ko goin lado hogoginie.

¹⁰Giniehi igide dam wahagi dam vai na tabanagi. Igide dam lado tare talui God hi mo mwaso, ngehi a vaga mwasoi lawera sinobu doluegi, hageliu ingere rau lado hogo.

¹¹Igimiu nein veve sere na gineu ingere ngaha lawera tangaloi ko a leo huhui ingere ngaha.

¹²Iniko a mwalakelo vurogi, goin mese siregi ve ihine tea na leoleo hivoginigo. Nge a leomu, a doridorimu, a nomu tabetabe, a nomu lado hogo ko a mwasoamu hi u mwasara na voragi taikeru garea lawera hi rau lado hogo.

¹³Iniko goin vano tuturedu goin velu na Reve reve Gogona lawera sinobu, ve nai vai siagaginire ko goin huhuire.

¹⁴Iniko goin mese ladolado siqegi na hogogi hi mo eno lumu, u vonai lawego lolo leo ligoligogi lune ira tamaragai ta lolo warelue ram tangovigo gina limara.

¹⁵Iniko goin vano tuturedu gon vai na gineu ngerehi, goin veire gina lolo lolomu doluegi, huri ve a mwasi nomu tabana a tangaloi doluegi rain lehe.

¹⁶Iniko goin leohuri na mwasoamu ko lo nomu leo huhui. Tare iniko gom toga ko gom huhui lo matahala vovohoi, goin vagamwasoi gimiu doluegi. Iniko sibomu ko irahine hi ram rorongtaginigo.