Read East Ambae 1 TIMOTI 5 Bible Online

1 TIMOTI 5 - East Ambae bible

1 TIMOTI 5

¹Iniko goin mese gato sabusebugi na tamaragai, nge gon gato vurugegi meie mwere hi ve i tamamu sibomu. Gon vaire mwalakelo mwere ve i retuemu.

²Iniko goin gato mena vavine sesea mwere hi ve i retahimu sibomu ko goin gato mena vavine taqalugu mwere hi ve i haqemu sibomu ko a domimu vin mwasara.

³Iniko goin leo huri na vavine madue hi ram toga gahera, hatie tangaloi vena buluire.

⁴Tare ve a vavine madue tea i netune lune sige i vagabuine, ingere ran hikehike ve rain bului retahire sige retubure ko ve ran soso na lenga garea hi i tamara, i retahire sige i retubure rau vei lawera. A lalakogi mwere ngaha mo vai God mo havuhevu.

⁵A madue hogo ngehi mo toga gahea tamwere, mo na nona lado tare lui God ko mo tataro tamwere lolo rani ko lolo bongi huri na buluiana dein God.

⁶Nge a madue hi mo lalakogi gina tarabesine a rong gareagi mo vanai lawe na sinobu, ingeie u mate beno. Hatie huri tare ve mo mwaso mo sigei.

⁷Iniko goin veve lawera hi rau lado hogo ve ran vai na gineu ingere ngaha siu huri ve a tangaloi rain he veve hurire tea.

⁸Ihine tea hi he lado tea huri rehavana, hageliu ingere hi rau waga gai gatagale bubugi meie, ingeie mo qalo goro na nona lado hogo ko ingeie u esi u liu deni hine tea hi he lado hogo tea.

⁹A vavine madue vin velu bubugi leie mena buri vavine madue tare a higaona u ngavulu gaiono beno. Tare ve ingeie u toga gogona mei tamai netune.

¹⁰A roroi nona tabana garea, a tangaloi rau iloe. A tabanagi mwere hi mo leo huri vurugegi renetune, mo lai vurugegi na hala vano sulolo nona togagi venue, mo vai na tabana lado wuweu huri mo solo na karure sinobu noi God, mo buluire ram toga rongesi ko mo bete na mwasoana vena vai na halai tabanagi garea doluegi.

¹¹Iniko goin mese tau na vavine taqalugu madue lo burigi hi, huri lo tagugi hi ingere rau betera lawe Kraes beno, ingere ram bela denire ra huri na nora taratarani esi lo tarabesire ko vage ingere ram tarani ve ran lagi taligu.

¹²Ingere rain lei na leo vevegi huri rahe vai na gineu ingere ngaha tea rau warataugi teu ve rain veie.

¹³Ingere ram huhuie ve rain ehuehu vale ram susuni na nora taro vurugegi, ko veve huri vage. Ingere ram sogagi qeture talolo gineu nora tangaloi wagineu. Ram veve leo ngerehi ve rain he veve tea.

¹⁴Ineu nam lado u garea ve a vavine taqalugu mandue ngehi ve ran lagi, ran bava neture, ko ran leo huri na nora togagi venue. Siu a tavului vuro vin he vai lei tea ve na vaiveire.

¹⁵Ineu nam matagu huri bataha ingere lavasigi rauehu beragi beno ko ram huri Setan.

¹⁶A vavine mo huri Kraes i rehavana lune, ingerehi a vavine madue, Ingeie vin leo hurire ko vin mese tau na mavanagi lo warelue. Siu a warelue vin leohuri na vavine madue ngerehi ram madue hogo.

¹⁷Ira tomtomuegi lolo warelue hi ram tabana vurugegi ve rain lei na gaivoli vin garea, hageliu ingere hi ram tabana siaga vunu, lo toretore ko a huhui.

¹⁸Huri a Reve reve Gogona mo veve vena, “Tare ve igimiu nem lai na bulugi vanai vena bilehi na bubui wit ve a toligi ran mwalue, nge igimiu nein mese vau bibi na wuwana, nen sireginie ve na gani tea wasi wit hi.” A Reve reve Gogona mo veve vage vena, “Tare a tangaloi tea mo tabana lawe na tangaloi wagineu, a tangaloi hi vin voli vovohoi ginie.”

¹⁹Iniko goin mese rorongtagi hine tea hi mo veve asiesigi na tomtomuegi gatagale, hogosie tare ve a tangaloi gairue sige gaitolu ram labe huri ve rain veveginie.

²⁰Iniko goin veve lawera hi ram toga mosigei lo galegaleasi huri ve ingere rau vagasile. Iniko goin vei na gineu ngaha lo nagora sinobu doluegi hi rau ladohogo siu huri ingere lavasigi rain lei matagutegi.

²¹Lo nagoi God ko i Jisas Kraes ko ira engsel noi God. Ineu nam veve siaga lawe gimiu ve nein vei lawe na tangaloi doluegi vin huri na matahala hala gatagale.

²²Iniko goin mese vai teuteu ve gon tangovi na tangaloi ve ran labe huri na tabana nona Huqe. Iniko goin mese bulu lo galegaleasi nora wai tangaloi. Iniko gon toga gogona.

²³Iniko goin mese inu na wai hogosie, nge goin inu na waen biti huri vin bului na loloi taqangimu ko a segeana hi ram vaigo gesegi.

²⁴A galegaleasi nora sinobu lavasigi dam leo laire tomue siu ram bei lei na leovevegi huri, nge a galegaleasi nora tangaloi lavasigi vin ribi siu da bei lehire.

²⁵Siu vage a lalakogi garea u matamwasara ve dain lehire, nge ingerehi rahe matamwasara tea ve dain lehire rain he toga hiligi tea.