Read East Ambae 1 TIMOTI 6 Bible Online

1 TIMOTI 6 - East Ambae bible

1 TIMOTI 6

¹Tare ve a tangaloi mwerai homu mo lai na tangaloi tabana vurogi ingere hi ram huri Kraes, ingere rain lado mavaginie, siu a henai God ko a nona leo huhui vin voragi na tanoi maemae tea.

²Tare ve a sinobu ingere hi rau mwerai homu rau lado hogo a nora tangaloi tabana vurogi rain mese leoleo hivoginire, a vevenagi ingere ram huri Kraes vage. Ingere rain tabana vin mala siaga a vevenagi ingere ram tabana huri na sinobu ngerehi ram lado hogo ko rain tabera. Iniko goin huhuire ko goin waregi sere na gineu ingere ngaha.

³Tare ve a tangaloi mo huhui na doridori u wegineu dena gineu ngehi nau vevera, a tangaloi hi he lado bubugi tea mena leo huhui hogo noi Jisas Kraes, ngehi mo haharagi na matahala vovohoi huri ve dain tabana lawe God.

⁴A tangaloi hi mo sagesagea ko hatie gineu lolo qatune. A tangaloi hi, he lado na gineu wagineu tea nge a Vui Gogona hogosie. Ngehi tau vuigi na Vui Gogona, a gineu gagarasi, a qaloqalo mena tangaloi, a tauteu esi talo tangaloi, ko a ladolado hagi.

⁵A sinobu ingere hi ram vai na gineu rau esi tamwere, a domire rahe vovohoi tea ko rahe veve leo hogo tea. A nora domiana huri ve a warelue a gineu huri ve a tangaloi vin mwerai homu lune.

⁶A hogo a lado hogo mo vai gide ve dain lei na vivilakogi u sao, nge gineu hi mo eno lawe rahine hi ram rongarea gina hava gineu hi rau leie.

⁷Igide lai tea gineu ve da vanai meie lolo ure, siu igide dain he lai tea gineu ve da vano meie.

⁸Nge tare ve a gada hinaga ko a luqada lude, igide dain rongarea giniehi.

⁹Ira hine ram tarani ve rain voragi mwerai homu rain soi lei lo kalikeli ko ingere ram dule lo vunei taratarani u sao rahe vovohoi tea ko a gineu gagarasi ngehi vin reve sasaruginire tavuine ko rain salasala.

¹⁰Huri taratarani huri na mane a vui galegaleasi doluegi. A sinobu sao rau tarani garagara ve rain mwerai homu, nge mo vaire ram bela dena lado hogo ko taqangire u mevurivuri gina hahagavi u sao.

¹¹Nge iniko a tangaloi noi God, goin bela dena gineu ingere hi. Goin toga lo matahala vovohoi, goin tabana lawe God, goin lado hogo, goin tabetabe, goin rongribi ko goin lado wuweu.

¹²Iniko goin qalo gina qaloana garea talo lado hogo. Ngehi goin saga tatakau lei lo mwasoana ta vagituei. Ngehi u tevuigi lune iniko gu leo hogosi Kraes lo nagora tangaloi u sao.

¹³Lo nagoi God, ngehi mo bete na mwasoana lawe na gineu doluegi ko lo nagoi Jisas Kraes, ngehi u labe siaga mo veve sere na nona lado hogo lo nagoi Bontius Baelat.

¹⁴Huri ve iniko goin tabe na nona Leo hora ngerehi gina taqangi renige. Siu ihine tea vin he haqe lai na asigi tea lumu siserigi ngaha ko vin dadari lo ranigi hi i Jisas Kraes vin vonai taligu.

¹⁵I God vin veie ve a gineu ngaha vin vei lo tarogi vovohoi ingeie i God u gogona ko ingeie a ratahigi gatagale hogosie, a ratahigi nora ratahigi teri ko a Huqegi nora huqegi teri.

¹⁶Ingeie hogosie vin he mate lai tea, ko ingeie mo toga lo leleo u leleo garagara huri ve a tangaloi vin he vano lai tea kakarani lobegi. A tangaloi he lehi God tea vohogi ko vin he lehe tea vohogi. Ve a tanoi lado mava ko a managi na eno lawe God.

¹⁷Iniko goin veve lawera hi a nora vivilakogi u sao lolo ure ngaha ve rain mese sagesagera ko rain mese lado talo nora mane, ngehi vin ribi tea mo rovo, nge ve ingere rain lado talui God. Ingeie a mwerai homu mo bete na gineu doluegi hi dam taranire ve rain vei havuhevugi gide.

¹⁸Iniko gon veve ran vai na gineu garea gina nora mane. Ingere rain mwerai homu lo tabanagi rau garea ko rain betebete gina lolora hogo lawe rahine rahe buluire tea lai sibora. A havagineu tea hi i God u bete lawera, ingere rain rarai gesegi ve rain wahegi lawera tangaloi wagineu.

¹⁹Lune ingere rain veie mwere ngaha, ingere rain hogoni vunigi na nora matani hako gineu mwere a tanoi bilebile garea huri na taro mo vanai mosigei, siu huri ingere rain saga tatakau lei lo mwasoana hogo.

²⁰Timoti, iniko goin leohuri na havagineu hi God u lado siaga talumu hurire. Iniko goin bela dena gineui ureure, goin bela dena tangaloi hi ram laqa rerarera ram qalo meigo mena nora iloilo kalikeli.

²¹A sinobu ngerehi ram beragi lategi dena lado hogo a vevenagi ram ladohogo gina iloilo kalikeli hi. A hogogi na toga mei gimiu.