Read East Ambae 2 TIMOTI 2 Bible Online

2 TIMOTI 2 - East Ambae bible

2 TIMOTI 2

¹Niko, Timoti, netuku, goin huire gina hogogi ngehi i Jisas Kraes u betea lawe gide.

²Iniko ko a sinobu lavasigi neu rongo na gineu doluegi beno ngerehi nau vevera. Iniko goin huhui na sinobu ngerehi gom lado talure gina gineu ingere ngaha. Siu ingere rain vei lei ve rain huhuire tangaloi wagineu.

³Iniko goin voragi soldia garea noi Jisas Kraes ko goin vurugegi na rongesi hi ram eno lude.

⁴A soldia mo tarani ve na vai na nona tangaloi lawua na rong garea, siu vataha rani a soldia he vai tea gineu ve na huri na nona tarani sibona.

⁵Vage mwere na tangaloi hi mo toatoa hi mo toa ve vin qoragi na nona toatoa vin rorongtagi na tau leo huri na toatoa hi huri vin qoragine.

⁶A tangaloi rivurivu mo tabana huire ingeie vin lei na mwasi bulana rivurivu gitomuegi.

⁷Goin ladolado lo havagineu hi nau vevea, a vevenagi Huqe vin haharaginie lawego huri goin rong hogo lo gineu doluegi.

⁸A Roro Garea hi nam toretore ginie, gom lado Jisas Kraes, ingeie hi u maraga taligu dena mateana, ingeie a duvigi lui Devet,

⁹ineu nam gagarasi a vevenagi, hurie hi, rau veuhieu gina garo vatu mwere na tangaloi hi mo vai na gineu rau esi. Nge a leo huhui noi God rai he vauhi laie tea.

¹⁰Siu ineu nau rong ribi nau lei na asiana ngerehi doluegi siu huri ingere hi i God u leo wahera rain lei na mwasoana ngehi eno lui Jisas Kraes. Gina mwasoana hi mo vonai gina roroa ngehi vin rovo lai tea.

¹¹A leo huhui ngaha a hogo: Tare ve dam mate meie, dain toga meie vage.

¹²Tare ve dam lai vurugegi na gagarasiana hi dain huqegi bubugi meie. Tare ve dam lado ve dain he lai vurugeginie tea, ingeie vin he lai vurugegi gide tea.

¹³Tare ve dahe lado hogo siaga tea lo noda waratau, ingeie vin lado hogo siaga lo nona waratau, a vevenagi ingeie vin he kali lei na nona waratau tea.

¹⁴Goin huhuire gina leo ingere ngaha tamwere, goin veve matagutegi lawe na sinobu lo nagoi God huri ve rain mese vuigarogi huri na leo ingere ngaha. A matahala mwere hi vin he bului lei na tangaloi tea gatagale, ko vin vei asiesiginire hi ram rorongtagi.

¹⁵Iniko goin vei leo siaga lo matahala doluegi ve goin voragi tangaloi tabana garea ngehi God vin rongarea ginigo. Iniko gohe maemae tea mena nona tabana. Iniko goin huhui na sinobu gina leo huhui hogo noi God lo matahala vovohoi.

¹⁶Iniko goin tino vagahao dena tangaloi ngerehi ram laqagi na gineu rahe garea tea, a vevenagi a tangaloi ngerehi ram tomuegi na sinobu rain vano vagahao dein God.

¹⁷A nora leo huhui esi hi mo taka rorongo mwere na segeana hi mo mawahewahe lolo tarabesi. Ngehi mo mwere na leo noi Haemeneus ko i Vaelitas.

¹⁸Ingere rom siregi na leo huhui ngehi a hogo, rom veve ve i God u vei gide dam maraga taligu dena mateana beno, ko ingere rom vai asiesigi na lado hogo siaga nora sinobu lavasigi.

¹⁹A vatu togai bibi noi God vin labe siaga tuturedu. A leo ngere hi rau teire talo vatu togaibibi hi.” A Huqe u ilora hi rau voragi nona tangaloi ko u ilo gide doluegi hi dam tarani ve dain bulu mena Huqe dain siregi na doridori ngerehi rau esi.

²⁰Lolo valera mwerai homu a lalangai lakoi hinaga, hatie huri rau veire dena gol ko a silva hogosie, nge rau veire dena gai ko a tano bubulu. Lalavasigi ram hakovire lo taro ve ram vai na hinaga lawua ko lalavasigi ram hakovire lo taroi hinaga gesegi.

²¹Irahine doluegi hi ram vai mwasaraginire sibora dena galegaleasi, ingere rain lalakogi lo tabana rau garea. I God vin vei gogonaginire, rain gogona lawe na Huqe ko ram rarai huri na hava tabana garea tea.

²²Nge goin toa dena galegaleasi ngehi mwalakelo ram rong garea ram vaire. Goin vei leo ve goin toga vin vovohoi ko goin lei na lado hogo, a dom tabetabe, ko a tamwata, meire ngerehi rau lado hogo gina Huqe gina loloi taqangire hi u mwasara.

²³Iniko goin tino vagaho dena sinobu ngerehi ram vui garogi lo gineu rahe vovohoi tea. Iniko goin ilo ve a nora vui garo hi vin dori sulo qaloana.

²⁴Ko a tangaloi tabana nona Huqe vin mese vai na vuigaro lo matai gineu, nge vin vei garea mena tangaloi doluegi, vin voragi na huhui garea, ko vin rongribi.

²⁵A tangaloi ngerehi ram tabana lawe na Huqe rain garea lawe na tangaloi huri rain huhuire ngerehi rahe rorongtagi na Huqe tea. Nge bataha i God vin vei leo ve na dori na domire siu huri rain lei na hogo.

²⁶Ko ingere rain rada ram toa dena vune nona tamate, ngehi u wiribibire ve rain vei na havagineu hi nge mo tarani.