Read East Ambae 2 TIMOTI 3 Bible Online

2 TIMOTI 3 - East Ambae bible

2 TIMOTI 3

¹!Goin lado haqe na gineu ngaha! Lo rovonai bongi a gineu sao hi rain vonai,

²a vevenagi a sinobu rain tabera sibora, rain tabe na nora mane, ram laqa sagesage ko ram sagesagera. Rain veve gineu esi vovohoire tangaloi wagineu ko rain he rorongtagi tamara ko iretahire tea sige rahe veve garea tea huri na gineu, sige rain he mwere na tangaloi ngehi tea i God mo tarani.

³Rain he tabera ngerehi tea lalavasigi, rain he ladolado goro na bugui gineu tea, rain veve tangaloi, ko rain he labe goro lai na nora tarani tea sibora. Rain vei gagarasigi na tangaloi, rain qalo mena havagineu hi u garea.

⁴Ingere rain tudori deni retuara, ko rain vei na gineu mwere ve ingere ram lado bulabula ko ram lado ve rau garea dena tangaloi lavasigi. Ingere ram tabe na taratarani ngehi mo eno lolo tarabesire u liu denie hi ram tabe God.

⁵Ko rain vei na doridori huri ve ingere ram tabana lawe God nge rain he lai na nona managi tea. Goin tino vagahao den sinobu ngerehi.

⁶Ingere lavasigi ram ahu lolo valera ko ram koko goro na vavine ngere hi rahe ilo na gineu tea ram horo gina gineu esi.

⁷Lo taro haro a vavine ingere ngaha ram rongo na domiana wagiwegineu, siu ingere ram huri na rongrongora sibora hogosie, nge rahe vai leo ve ran ilo na hogo.

⁸Mwerehi i Janes ko i Jambres rom rahagi Mosis, a sinobu ngerehi ram rahagi na hogo. A nora ladolado mo vai asiesiginire, ko rahe huri na lado hogo tea.

⁹Nge vin he eno tea lo nora tarani gina havagineu hi ram vaie, a vevenagi u mwerei Janes ko i Jambres, ingere doluegi rain lehire ve ingere a daloi tangaloi.

¹⁰Nge iniko gon huri na havagineu hi nau huhui gimiu ginie, a turegi ngehi nam toga lune, a noku gol, a lado hogo siaga, a rongo ribi ko a dom tabetabe. Gu ilo ineu nahe wiriwiri tea.

¹¹Gu iloe ve ineu nau gagarasi lune hi nau toga Antiok, Ikoniam ko Listra. Nge i God u revelueau dena gineu esi doluegi.

¹²Ingere doluegi hi ram tarani ve rain toga mwerehi God mo tarani, lui Jisas Kraes rain rong-gagarasi.

¹³Nge a sinobu ngerehi rau esi ko ram lamagi na tangaloi wagineu rain esi dena asi. Rain vaga lengaginire ngerehi lavasigi, ko rain vaga lengaginire sibora vage.

¹⁴Nge iniko goin huri na leo huhui ngehi gu leie tamwere. Gu ilo huri ve a leo huhui ngerehi a hogo, a vevenagi gu lado hogoginire hi rau huhuigo.

¹⁵Lo taro hi iniko a maresu gu ilo na revereve gogona ngehi mo vaigo gom matai sao, ko ngehi mo tomueginigo sulo mwasoana.

¹⁶A Reve reve Gogona hi God mo betera lawe gide rau garea huri na leo huhui huri dain haharagi lawe na sinobu a havagineu hi rau esi lolo nora mwasoana, huri dain vurugegi na gineu esi, ko huri ve da huhui gide ve dain toga vin garea.

¹⁷A Reve reve Gogona hi God mo betea, ve a tangaloi hi mo tabana lawe God ingeie u vei lei ve vin lei na gineu doluegi hi mo tarani ve vin vei na tabana garea lune.