Read East Ambae 2 TIMOTI 4 Bible Online

2 TIMOTI 4 - East Ambae bible

2 TIMOTI 4

¹Ineu nam veve na leo siaga lo nagoi God ko i Jisas Kraes ve ingeie vin veveginire hi ram toga mwaso tau ko rau mate beno, ko gina nona vonaiana ko mena nona tanoi ratahigi.

²Gon toretoregi na Roro Garea. Nen rarai gesegi, ko gon veve lawe na sinobu huri na havagineu hi ve ingere rain veie lune ingere ram vai na gineu rau esi iniko goin veve lawera. Gon vaga mwamwaviginire gina rongo ribi lawua ko a leo huhui garea,

³a vevenagi a tarogi vin vonai lune a sinobu rain he rorongtagi na leo huhui hogo tea nge rain hikesi na huhui sao huri vin veve na gineu hi u tatarise mena domire huri ingere rain tarani ve rain rorongtagi.

⁴Rain siregi, rain he rorongtagi na leo huhui tea, ko rain tevuigi rain huri na leo huhui kalikeli.

⁵Nge iniko goin labe siaga. Iniko goin weli tuturedugi na nomu gagarasi. Goin vei na tabana hi goin waregi sere na Roro Garea, ko goin vei rovonagi na tabana doluegi hi a nona tangaloi tabana noi God.

⁶A taro u vonai beno lune ineu nain rugurugugi na mwasoaku. A taro u vonai beno hurieu ve nain rovo dena mwasoana talo ure ngaha.

⁷Nau qalo gina garea, nau toatoa nau dadari lo qereqerenagi, ko nau wiri bibi na lado hogo siaga.

⁸A gaitawe ngaha ve i God vin betea laweau, a gaitawe huri na tangaloi hi rau veivei garea meie. A Huqe vin vevegi na tangaloi ngerehi, vin veveginire lo turegi u vovohoi, i God vin betei na gaitawe hi laweau lo rani ngehi, hatie ve laweau hogosie nge lawera ngerehi doluegi ram rarai mena nora dom tabetabe lawea ve vin vonai taligu.

⁹Nam tarani ve goin vei leo ve goin vonai lobeku na siseri,

¹⁰a vevenagi i Dimas hi u tabe na ureure ngaha u siregieu mo vano Tesalonaeka. Kresens u vano Kalesia ko i Taetus u vano Dalmesia.

¹¹I Luk ingeie gatagale hogosie hi mo tino meieu. Goin lei Mak nerom vonai bulu lo taro hi ve gom vonai taligu, a vevenagi ingeie vin buluieu lo noku tabana tangaha.

¹²Nau hora Titikas mo vano lo qatui venue Evesas.

¹³Lune nau toga Troas, nau toa dena noku kot aiehi lobei Kabas. Siu lune ve gom vonai, goin leie vonai laweau, mena noku buku, hageliu ngerehi rau ulire lo vinui nani.

¹⁴Aleksanda, ingeie a tangaloi tabana lo kopa mo vai eu nam rongesi vaga sao. A Huqe vin veveginie huri na havagineu hi ingeie u vei.

¹⁵Iniko vage goin leo huri vurugegi vai teu mo vai romasi ginigo vage, a vevenagi ingeie u laqa siaga vovohoi na noda leo huhui.

¹⁶Gitomuegi ineu nau vano nam veve na leo nam laqa huri eu siboku, a tangaloi doluegi rau toa denieu. A noku tataro ve i God vin lado vohogi na bugure.

¹⁷Nge a Huqe mo tino mei eu ko mo betei na huireana laweau siu huri neu nain waregi sere na Roro Garea lawera doluegi hi hatie duvi Israel. I God u revelueau dena gineu esi ingere ngaha mwerehi ve u revelueau dena wuwai laeon.

¹⁸A Huqe vin tugoroau lune ve a hava tangaloi tea mo tarani ve vin vei garasieu, ko vin lei tabetabegi eu vano lo nona tanoi ratahigi ta eulu. A Roroa hi vin he rovo lai tea Amen.

¹⁹Nein veve garea lawe Bresila ko i Aqila ko a duvi Onesipora.

²⁰I Erastas mo toga Korin. I Trovimas u sege siu ineu nau sireginie mo toga Miletas.

²¹Goin vei leo siaga ve goin vonai lobeku siu a taroi rara mo bei vonai. I Ebulas mo veve nona veve garea lawego. I Budens, Linas, Klodia ko i retuara ko i rehaqera lui Kraes doluegi ram veve nora veve garea lawego vage.

²²A Huqe vin toga mena tamatemiu. A hogogi na toga mei gimiu.