Read East Ambae TAETAS 3 Bible Online

TAETAS 3 - East Ambae bible

TAETAS 3

¹Iniko gon vai lado taliguginire ladohogo ve ran tau hivoginire lo vavara tangaloi lalawua ko a kavman hi ram huqegi gorora. Ingere rain rong hurire, ko rain rarai gesegi ve rain vei gineu rau garea.

²Ingere rain mese veve huri tangaloi, rain mese vui garogi, nge rain bulubulu garea mena tangaloi, ko rain lolo garea gina tangaloi doluegi.

³Tuei igide dau lenglengaga vage. Igide dahe rongrong huri leo tea, dau vagasile, ko igide dau vau lo gineu sao hi a tarabeside ram taranie ko ram rongarea ginie. Lo mwasoada, igide dau vei na gineu esi hogosie, ko a gineu u garagarasi gide. A sinobu rau leo masi gide ko dau vui leo masi gide gagatalegi.

⁴Nge lune a vaivei garea ko tabeana noi God a noda vagamwasoi u sere lue lawe gide,

⁵ingeie mo vagamwasoi gide a vevenagi huri u hakovi gide. Hatie ve huri na noda tabanagi garea ve dau veie tau, ve dain vovohoi lo nagona.

⁶Ingeie u solo mwasaragi gide gina wai ko u vei gide dam vora garaqa taligu lo vui gogona.

⁷I God u lingi na nona vui gogona su lude uliu lui Jisas Kraes a noda huqe. Igide dam vovohoi lo nagoi God a vevenagi huri na nona dom tabetabe lawua ko igide dain ladotare lai huri mwasoana hi vin he rovo lai tea.

⁸A leo huhui ngaha a hogo, ko ineu nam tarani ve nein ilo vurugegi ve a sinobu ram ronghogosie na gineu ingere ngaha. Siu huri ve irahine hi ram ladohogogi God rain leo huri ve rain vei gineu rau garea lo mwasoara. A gineu ingere ngaha rau garea ko vin buluire doluegi.

⁹Iniko goin tino vagahao dena leo asiesi nora tangaloi hi ram vui reve lune ko ram laqagi na valuhuri huri retubure tuei ko ram vui susuni ko ram vui garogi huri na hora noi Mosis. A gineu ngerehi hatie gineu lure ko vin he bului hine tea.

¹⁰Nge tareve a tangaloi tea mo vai na tangaloi ram vile wahe lo leo mwere hi, gitomuegi iniko goin laqalaqa meie ko goin veve leo matagutegi lawea nge vin he vagaruegi tea.

¹¹Iniko goin ilo lai ve sinobu mwerehi rau esi ko rau galegaleasi asi, a nora galegaleasi asi mo haharagi mo gigilegi lawera ve rau vagasile vohogi.

¹²Ineu nain hora Atemas sige i Taekikas vanatu lobemiu, tareve mo dadari, iniko goin veileo ve goin vanai vin siseri lobeku lo qatui venue Nikobolis, a vevenagi ineu nau lado rarai ve nain toga aie lolo rara.

¹³Iniko goin vei leo ve goin bului Abolos ko i Senas a loea. Goin vei leo ve goin buluire lo matahalara ko goin leo huri ve rain mese qilodo lo hava gineu tea.

¹⁴A noda sinobu rain hikehike ve rain ve a nora taro vin vano huri na tabana garea vena bului na tangaloi wagineu, rain mese tinotino vurogi.

¹⁵A tangaloi doluegi ram toga meieu ram hora nora rongarea lawego. Iniko goin bete nomai rongarea lawe rehavada hi ram bului gide lo ladohogo. A hogogi na toga mei gimiu doluegi.