Read East Ambae VILIMON 1 Bible Online

VILIMON 1 - East Ambae bible

VILIMON 1

¹Dein Bol, a tangaloi toga vau huri Jisas Kraes ko dein Timoti hi, i tuada. Lawego Vilimon i tuemai ngehi mo tabana mei gamaru.

²Lawego Abia, i haqemai, lawego Akibas gom tabana mei gamaru ko lawe na warelue ngerehi ram sone bubugi lolo valemu.

³A hogogi ko a tamwata lawe gimiu dein God i tamada ko a Huqe i Jisas Kraes.

⁴Gesegi nam veve gareagi na noku Huqe lune nam vevego lolo noku tataro,

⁵a vevenagi nam rong huri na nomu tabetabe huri na sinobu gogona noi God doluegi ko huri ra nomu ladohogo siaga lo Huqe Jisas.

⁶Nam tataro huri ve a lado hogo hi gam betera rain veigo goin ilo na vai garea doluegi hi gau leire lui Kraes.

⁷Tueku, Ineu nam havuhevu laweau lolo loloku ko mo vai mesurigieu, a vevenagi a tabetabe ngehi gu haharaginie lawe na sinobu noi God, ko mo vaga mwamwaviginie.

⁸Siu, lui Kraes, ineu nahe matagu tea ve nain veve siaga lawego ve gon vai na havagi hi u vovohoi.

⁹Nge a vevenagi ineu nau tabego siu ineu nain he vaie tea mwerehi. Ineu nam navu siaga denigo. Ineu Bol, ineu a tamaragai siserigi ngaha ko ineu lolo valei veuveu huri Jisas Kraes.

¹⁰Ineu nam navu siaga denigo huri netuku Onesimas. Ingeie u voragi netuku lo taro hi nau toga lolo valei veuveu.

¹¹Lo taro tuei ingeie hatie tangaloi tabana garea lawego, nge siserigi ngaha ingeie u garea meigo ko meieu vage.

¹²Ineu nam horae mo vonatu taligu lobemu, ko nam horae mo vonatu mena loloi taqangiku.

¹³Ineu nam tarani ve nain hakobibie vin buluieu lo taro hi ineu lolo valei veuveu huri na leo gogona.

¹⁴Nge nahe tarani tea ve nain vei na gineu hi nahe navue tea denigo tomue siu huri a hava gineu garea gom vaie, ineu nahe garoginigo tea.

¹⁵Bataha i Onesimas u mawahe denigo huri na taro qilodo siu goin lei taligu vin tino vagituei.

¹⁶Ingeie hatie nomu tangaloi tabana vurogi taligu, nge ingeie u garea taligu dena tangaloi tabana vurogi, ingeie u mwerei tuemu hi gu tabea. Nau tabea u liu, nge iniko goin tabea vin liu taligu. Iniko goin tabea mwere na tangaloi ko goin tabea mwere na tangaloi u lado hogo lo Huqe.

¹⁷Tare ve gom lado ve ineu a buluimu, goin lei vurugegi Onesimas mwere hi gom lai vurugegieu.

¹⁸Tare ve u vei na gineu esi voheigo, sige u lei gineu denigo, goin teu na gineu ngerehi rain voragi buguku.

¹⁹Neu, Bol, nam uli na leo ngaha gina limeku siboku. Ineu nai volire lawego ko ineu nain he veve na gineu tea huri na havagineu hi gu lei denieu huri na nomu mwasoana sibomu.

²⁰Siu tueku, nam navuhigo ve gon vai na gineu ingere ngaha laweau lui Huqe, gon vai garaqagi na lolo loloku lui Kraes.

²¹Nam uli na leta ngaha a iloilogi huri ve goin vei na havagineu hi nam navu denigo ko sige mo liuliu vage.

²²A gineu gatagale vage, goin vaga rarai na mahoi vale huri nain toga aie, a vevenagi nau lado tare vei God vin duvi na nom tataro ko ineu nain vei leo ve nain vei leo ve nain vonatu lobemu.

²³Ebavras, ingeie mo toga vau meieu huri Jisas Kraes mo hora nona veve garea lawego.

²⁴Ko i Mak, Aristakas, Dimas, ko i Luk, ram tabana bubugi meieu ram hora nora veve garea vage.

²⁵A hogogi noi noda Huqe Jisas Kraes na toga mena tamatemu.