Read East Ambae HIBRU 10 Bible Online

HIBRU 10 - East Ambae bible

HIBRU 10

¹A tamwata noi Mosis a nunugi hogosie huri na gineu hi rau garea, siu he matamwasara tea huri ve na garea huri na gineu gagarea hi ve rain vomai. Gesegi vataha na higao a tangaloi rugurugu ram ue vagamate na rugurugu mo huri na matahala gatagale huri na galegaleasi nora tangaloi. Giniehi, a tamwata noi Mosis vin he vai lei na tangaloi tea ingere hi ram vomai lobei God huri ve rain bagoto.

²A tangaloi ram vai na hudugoro lo matahala mwerehi, rahe mwasara tea vurugegi dena nora galegaleasi. Siu ve mwere rau mwasara vurugegi sevai rain he rongoe tea lo tarabesire huri ve a nora galegaleasi mo eno lure mosigei. Sige ve rau mwasara hogo, a doridorigi hi ram ue vagamate na kakarue huri na rugurugu vin rovo.

³Siu a doridorigi hi ram ue vagamate na kakarue huri na rugurugu mo vaire ram ladohaqe na nora galegaleasi vataha higao,

⁴Huri a dai bulugi hi a boegi mena nani rain he lai vohogi na galegaleasi nora tangaloi tea vohogi.

⁵Huri a gineu hi, tuei lune mo kakarani ve i Kraes vin vomai lo ure, mo veve lawe God vena “Iniko gohe tarani na hogohogo tea mena rugurugu hi a tangaloi ram uevagamatera, siu gu vei rarai na tarabesigi mo eno hurieu.

⁶“Gohe havuhevu tea, mena rugurugu hi a tangaloi ram hure dodolueginire lo tanoi rugurugu, gohe havuhevu tea mena rugurugu hi rau ue vagamatera huri na nora galegaleasi.

⁷Siu ineu nam veve vena, ‘God, ineu ngaha, nam rarai huri ve nain vei doluegi na gineu hi iniko gom taranie, u tatarise mwerena leo ngehi rau ulie hurieu lo buk huri na tamwata.’ ”

⁸Tomue i Kraes u veve mwere ngaha vena, “Iniko gohe tarani na hogohogo tea mena rugurugu ingeie hi ram ue vagamatera, mena rugurugu hi a tangaloi ram hure dodolue ginire lo tanoi rugurugu, mena rugurugu hi rau ue vagamatera huri na nora galegaleasi, siu gohe havuhevu tea mweire.” Siu a doridori hi a tangaloi ram vaire, rau tatarise vohogi mena leo hi a tamwata noi Mosis mo vevera.

⁹Siu lo tagugi mo veve vena, “God, ineu ngaha, nam raraie huri ve nain vei doluegi na gineu hi iniko gom taranie.” A leo hi mo matamwasaragi huri ve i God u lei vohogi doluegi na doridori tatuei hi ram ue vagamate na kakarue huri na rugurugu, mo tau na doridori garaqa lolo ute hi i Kraes sibona ingeie a mo voragi rugurugu, mo mate.

¹⁰Huri i Jisas Kraes u vei doluegi na gineu hi i God u taranie huri ve vin veie i God u vei gide dam mwasara dena noda galegaleasi dam gogona. Mo vai mwerehi mo huri na rugurugu noi Kraes ngehi u rugurugu gena tarabesine sibona mo mate vagatagale hogosie, mo vai vagatagale ginire doluegi.

¹¹Vataha na tangaloi rugurugu nora duvi Israel ram vai na nora tabanagi hi vataha bongi ko ram bete na nora rugurugu hala gatagale vatusaosao, nge a rugurugu ngerehi rain he lai vohogi na galegaleasi tea.

¹²Siu i Kraes mo sireginie sibona vagatagale mo mate huri vena riqe vohogi na galegaleasi nona tangaloi vagi tuei vin he rovo lai tea. Siu mo vano mo toga lo matuei God.

¹³Siu ingeie mo toga rarai tahi vin dadari i God vin teu na nona tavului vuro lo vavai karune.

¹⁴I Kraes u mate vagatagale vena riqe na galegaleasi nora tangaloi. U veire ram mwasara dena nora galegaleasi, ram gogona ram voragi ira nona. Siu gina nona mateana ingeie u vei na tangaloi ngerehi ram vovohoi vurugegi siu ingere rain vovohoi vagi tuei vin he rovo lai tea.

¹⁵A Vui Gogona vage u matamwasaragi na gineu lawe gide. Tomue u veve vena,

¹⁶“A Huqe u veve vena, ‘A leo waratau vena, ineu nain veie mei gimiu lo tarogi vin vomai, Ineu nain huhui gimiu gina noku tamwata ineu nain uli bibire talolo domimiu.’ ”

¹⁷Siu lo tagugi mo veve taligu ve a Huqe u veve vena, “Siserigi hi ineu nain he lado haqe na nora galegaleasi tea mena nora lalakogi rau esi ngehi ram kalo lo noku tamwata.”

¹⁸Lo taro hi i God mo ladolado goro na nora galegaleasi doluegi, siu ingeie he tarani na gineu tea taligu ve rain hogogi lawea huri vin lei vohogi na nora galegaleasi.

¹⁹Retueku, huri a dai Jisas u vei gide dau mwasara beno, dau tatarise huri ve dau vano lolo Ute Gogona Garagara.

²⁰I Jisas u waga na matahala beno, a matahala garaqa hi a mwasoana lune, mo vano turu na galego hi tuei u dule goro na Ute Gogona Garagara. Siu a matahala garaqa hi a mwasoana lune, mo vano turu na tarabesi Jisas.

²¹Siu igide a noda tangaloi rugurugu ngehi u lawua garagara, ingeie hi mo leo huri na sinobu noi God doluegi.

²²Ko siserigi ngaha u garea huri ve igide da vomai kakarani lobei God, huri a domide rau mwasara, a noda ladohogo u siaga, a domide hi rau sokora gina noda galegaleasi rau mwasara gina dai Kraes. Siu a tarabeside vage rau mwasara gina wai mwasara hi dau gagaruginie beno.

²³U garea garagara huri ve igide da wiribibi siagagi na doridori dau vevea beno huri ve a doridoride, ngehi dam tau doluegi na domide mo labe mo siaga lui God. Igide dau veie mwerehi huri a hogo, igide dau ladohogo lui God huri ve ingeie vin vei doluegi na tau leo rain eno lune.

²⁴U garea huri ve vatavatahagi gide ve da ladolado huri gide, ve da vuibului gide huri ve da vuitabetabe gide ko da vaiveigarea mei gide.

²⁵Igide dain mese siregi na lengai bulubulu huri na warelue mwerehi lavasigi dein gide rau veie. Siu gesegi dain hako mei gide ve da ragasi na domide taligu na vagevage huri ve ran huire, huri igimiu nem leohogosie ve a Rani nona Huqe mo kakarani vomai.

²⁶Siu siserigi ngaha igide hi dau lei na leohogo dau ilo vurugeginie, nge sige igide dam domiginie dam maraga dam vano dam vai na gineu esi. Siu giniehi, a matahala vin hatie, a rugurugu vin hatie vage huri ve dain ue vagamatea ve vin riqe vohogi na noda galegaleasi.

²⁷Siu ingeie hi a matahala hogosie mo eno huri gide, ve igide dain matagu garagara gi God lo taro hi igide dam togararaie huri ingeie vin vilegi na doridoride ko ingeie vin vei gagarasigi gide. Igide dain toga tare na avi hi u huire garagara ngehi vin gao vohogi na tavului vuro noi God doluegi.

²⁸Lune a tangaloi mo vaiutu na leohora noi Mosis, a tangaloi gairue sige gaitolu ram veve huri ve a hogo, rain he hagavie tea nge rain buguri vagamatea.

²⁹?Siu wuraha mena tangaloi hi mo lado bulabulagi Netui God? A dai Jisas Kraes ngehi u vei na leo waratau noi God mena nona tangaloi mo labe, ingeie sibona u vei na tangaloi hi mo mwasara dena galegaleasi mo gogona mo voragi tangaloi noi God. ?Siu wuraha huri na tangaloi hi mo lado mamarae gina dai Jisas mwere na gineu vurogi? A Vui Gogona mo hako mena tangaloi gina nona dom tabetabe lawua. ?Siu wuraha huri na tangaloi hi mo laqa bulabulaginie? A tangaloi hi vin weli na gagarasi vin lawua garagara vin liue hi mo vai utuhi na tamwata noi Mosis.

³⁰Huri igide dau iloe hi ve mo veve vena, “Ineu hogosie nau tatarise huri ve nain soso lawera ngerehi rau vei na gineu rahe tatarise tea. Ineu hogosie nain vei garasire huri.” Siu ingeie mo veve vage vena, “Ineu a Huqe i God, ineu nain vilegi na doridorinai noku tangaloi, siu ineu nain veveginire huri.”

³¹Huri God mo mwaso vin wiribibi gide vin vevegi gide, siu a matagutegi u liu.

³²Siu u garea ve igimiu nen lado haqe na gineu doluegi rau vei lawe gimiu tuei. Lo tagugi hi, a leleo noi God mo dadari lobemiu neu romasi lo gineu u sao, nge a gineu ngerehi rahe qoragi gimiu tea.

³³Lo mahogi lavasigi a tangaloi ram veve asiesigi gimiu lo ute lawua, siu ram vai esiesigi gimiu vage. Lo mahogi lavasigi nem tino mwereire hi a tangaloi ram vai esiesiginire.

³⁴Igimiu neu haqe na romasi hi beno ngehi a tangaloi vauveu ram haqea. Siu lune a tangaloi ram lai na nomiu vivilakogi dein gimiu nehe romasi tea lawagi huri na nomiu vivilakogi ingere hi ram sala. Igimiu nen havuhevu huri neu iloe beno hurive a nomiu vivilakogi te wagineu ram eno, ngerehi rau garea u liure hi tomue, siu ingere rain eno vagi tuei.

³⁵Siu u garea, igimiu nein wiribibi na domimiu na labe na siaga, huri igimiu neu lei na gaitawe hurie, u lawua u liu.

³⁶U tatarise huri ve igimiu nein rongoribi, huri ve igimiu nein vei na gineu doluegi hi i God mo taranire, siu igimiu nein leilei na vivilakogi ngerehi u waratauginire lawe gimiu.

³⁷Mwere na Reve reve Gogono mo veve vena, “A taro qilodo mo eno siu ingeie vin vomai vin dadari, vin he vaivei riribi tea.

³⁸A noku tangaloi vovohoi rain ladohogo luku rain mwaso. Sige denire gatagale vin tudori vin mule taligu. Ineu nain he rong garea tea ginie.”

³⁹Siu igide hate tangaloi mwerehi huri ve dain tudori taligu huri ve da sala. Nge igide dau ladohogo gi God, siu ingeie mo vagamwasoi gide.