Read East Ambae HIBRU 11 Bible Online

HIBRU 11 - East Ambae bible

HIBRU 11

¹A noda lado hogo lui God mo haharagi lawe gide huri a gineu doluegi hi a domide mo huire lure, ingere hi a hogo. A ladohogo hi mo haharagi lawe gide huri ve a gineu doluegi hi dahe leo laire tea, ngehi ram eno tahi.

²I retubude tuei rau ladohogo lui God, giniehi i God mo vai gareaginire.

³Igide dam ladohogo lui God, giniehi igide dam ronghogosi na gineu doluegi hi lolo ureure ngaha, hi i God u teure gina leona. Siu a gineu ngerehi dahe leo laire tea, i God u teu na gineuhi ureure doluegi lo gineu ngerehi dam leo laire.

⁴I Ebol u ladohogo lui God, giniehi, mo bete na hogogi gatagale lawe God u garea u liu, u liu na hogogi noi Ken. Huri i Ebol u ladohogo lui God, siu i God mo saluginie mo veve huri ve ingeie a tangaloi vovohoi, i God mo rong garea mo lai na nona hogogi. A tangaloigi u mate beno, nge huri a nona ladohogo mo vai lado taligugi gide mo dadari bagataha.

⁵I Enok u ladohogo lui God, giniehi he mate tea. I God u lei mwasogaginie dena ureure vano lobena. A tangaloi rahe haqea tea, huri i God u leie beno. Nge tomue lune i God he laie te tau mosigei, a Reve reve Gogona u mata-mwasaraginie ve ingeie u vei God mo havuhevu.

⁶Huri ve mwerehi ingeie a tangaloi he ladohogo tea lui God, vin he vai lei tea vena vai God na havuhevu. Huri a tangaloi tea mo tarani ve na vomai lobei God, na ladohogo huri ve i God ingeie tahi, siu ingeie vin vei tabetabeginire hi ram hikesie.

⁷I Noa u ladohogo lui God, siu lo taro hi i God mo warataugi na gineu ngerehi rahe dadari tea mo sigei, ngerehi a tangaloi rahe lehire tea mosigei, siu i Noa u rong hurie. Mo toto na aka ve ingeie mei renetune rain mwaso lune. Siu lo nona ladohogo hi mo haharagi ve a tangaloi doluegi rau esi, giniehi, rain sala. Siu vage lo matahalagi nge ngaha, u lei na vovohoiana ngehi i God u betea lawera hi rau ladohogo ginie.

⁸I Ebraham u ladohogogi God, giniehi, mo ronghuri God mo warea vena vano lo vanue dolue. A vanaue hi, i God u waratauginie tau huri ve vin betea lawea. Giniehi, i Ebraham mo siregi na tanona mo vano, nge ingeie he ilo tea ve vin dadari logo.

⁹Huri u ladohogo lui God mo toga lai lo vanue hi i God u waratauginie tau lawea, huri ingeie a tavanaiana. Ingeie i Aesak, koi Jekob, hi i God u bete na leo waratau lawera vatavatahaginire, ingere rau toga lolo vale teniti hogosie, rahe vutu na vale garea tea.

¹⁰I Ebraham u vei mwerehi, huri u toga tare ve vin vano lo qatui venue hi i God u dumae mo vutue, siu a togagi venue hi vin labe vagi tuei huri a togai bibigi u siaga.

¹¹I Sera u ladohogo lui God, giniehi hate huri u tubui beno huri ve vin bava na maresu, nge u bava na maresu. Siu u bava na maresu hi huri u ladohogo lui God huri u wiribibi na nona waratau.

¹²Huri na gineu hi, i Ebraham ingeie gatagale vohogi, vage u tamaragai beno, u kakarani ve na mate, siu a duvine u sao garagara, a tangaloi vin he valu laire tea. Ingere rau mwerena visiu lo dodo ko rau mwerena onei tehi.

¹³A tangaloi doluegi ngerehi rau ladohogo lui God, nge lo taro rau mate rahe lehi na gineu tea hi i God u waratauginire tau lawera. Ingere ram lehi na gineu ngerehi, nge mwerehi ve ingere rau vagahao tau denire mosigei, nge ingere ram lehire ram havuhevu. Siu siseri ngaha ingere ram matamwasaragi huri ve ingere ram toga lo ure ngaha, siu mwere ingere a tavanaiana vohogi, a ure ngaha hatie tanora vovohoi.

¹⁴A tangaloi ram laqa mwerehi, ram haharagi huri ve ram hikesi na tanora vovohoi.

¹⁵A domire he mule tea taligu huri na vanuara hi rau sireginie beno. Ve mwere ingere rau ladolado mwerehi, nase vai vin tarogi lune lawera huri ve ingere rain mule taligu aiehi.

¹⁶Ingere ram tarani ve a vanuara wagineu vage, ngehi u garea denie hi tatomue, a vanuegi ngehi lo ute ta eulu. Huri na gineu hi i God he maemae tea mweire huri rain wareginie ve a nora God, huri u vei rarai na qatui venue gatagale hurire beno.

¹⁷I Ebraham u ladohogo lui God, giniehi, i God mo vai lehi na domine, siu i Ebraham mo rarai ve na ue vagamate netune Aesak, vena hogoginie lawe God mwerena rugurugu. I Ebraham ingere hi i God u bete na waratau lawea, siu ingeie mo rarai vena ue vagamate netune hi a dule gatagale, vena hogoginie lawe God mwerena rugurugu.

¹⁸I God u mata-mwasaraginie lawea vena, “Lui Aesak hi a duvimu vin qalo vin lawua.”

¹⁹Nge i Ebraham mo ladohogo lune, u iloe huri ve i God vin vei lei na tangaloi ve na mwaso taligu dena mateana. Siu ngehi mwerehi i Ebraham u lei Aesak taligu dena mateana.

²⁰I Aesak u ladohogo lui God, giniehi, mo tau na tangaroa garea lui Jekob tona Iso huri ve a gineu garea rain hivo lure.

²¹I Jekob u ladohogo lui God lune mo kakarani ve na mate, mo vai gareagi netui Josev gairue vatavata haginire. Mo totoqevagi lo nona gaitigo mo tataro lawe God gina tanoi ladomava.

²²I Josev u ladohogo lui God, giniehi lo taro mo kakarani ve na mate mo laqagi huri na taro hi vei ngaraha a duvi Israel rain mule taligu dena vanue Ijib. Ko mo warataugi lawera vage ve rain vei wuraha mena huine.

²³I Mosis, i tamana koi ratahine ru ladohogo lui God, giniehi, lune i Mosis mo vora rum tau vuniginie a vule gaitolu. Rum lehe huri ingeie a maresu garea, siu ingere rohe matagu tea huri rom vai utuhi na tamwata nona ratahigi.

²⁴I Mosis u ladohogo lui God, giniehi lune mo sesea mo hage he tarani tea ve a tangaloi rain warea ve ingeie i netui vavine hi i netui Vero hi a ratahigi lawua.

²⁵Ingeie mo tarani ve na vano na bulu mweire tangaloi noi God, huri na rongogagarasi mwereire vage. He tarani tea vohogi ve vin rong garea lo turegi hi rau esi, hate huri tare ve a mahogi te qilodo, ingeie he tarani tea vohogi.

²⁶Mwerehi nge mo veve huri ve tare ram mavaginie huri vagamwasoi ngehi i God vin horae vomai, ngehi vin he maemae tea huri. Nge vin rong garea vin liu huri na gineu hi, den rong gareana hi huri na gineu gagarea hi lo vanue Ijib. Mo rongoe mwerehi huri mo ladolado huri na gaitawe hi ve i God vin bete lawea.

²⁷Huri i Mosis u ladohogo lui God, giniehi, mo mwalue dena vanue Ijib, he matagu tea gina ratahigi hi huri mo meroginie u liu. Nge he mule tea taligu, nge u vano tuturedu, huri mo lehi God ngehi a tangaloi vihe leo laie tea gina matana.

²⁸Vage huri u ladohogo lui God, giniehi mo tauvuigi na doridori huri na hinagai Halegagaliu. Mo veve lawera duvi Israel huri ve rain besigi na dain sibsib lo beru lo matai valera. Rain vei mwerehi huri i God vin hora na engsel huri ue vagamate tangaloi, vin he ue vagamate reneture tea hi a mwera rau vora gitomuegi redu.

²⁹A duvi Israel hi rau ladohogo lui God, giniehi, ram vano utuhi na tahi hi ram wareginie ve a Tahi Memea, ngehi u mwerena tano mamaha vohogi. Lune i ngaraha ta Ijib ram vai leo ve ran vano lolona mwerehi, a tahi hi mo vomai bubugi, mo luluweginire ram dono.

³⁰Huri ira duvi Israel rau ladohogo lui God, giniehi, lo taro hi ram dige dali na aravatu hi a arai qetui venue Jeriko a rani gaibitu mo rovo, a aravatu hi mo rurungudu.

³¹I Rehab, ingeie a vavine masimesinge u ladohogo lui God, giniehi, he mate tea, mweire tangaloi hi rahe ronghuri God tea. I ngaraha a duvi Israel rahe ue vagamatea tea a vevenagi huri tomue, lune a tangaloi gairue a duvi Israel rau vano Jeriko huri rom mataduru na vanue hi, ingeie u lei tabetabeginire.

³²Ngaha nau vevea u sao beno, a tangaloi u sao tau hi nahe vevera tea hatie tarogi meieu ve nai veve na leo noi Ketion i Barak i Samsin i Jevta i Devet i Samuel ko ira tangaloi veve rarai.

³³Ingere hi rau ladohogo lui God, giniehi ram vailei na gineu u sao. Rau tomuegi na duvi Israel huri ram qalo mena vanue wagineu ram qoraginire. Rau vei na gineu rau vovohoi, giniehi ram haqe na gineu garegarea hi i God u warataugi teu ve vin bete lawera. Lo taro lavasigi ram wirigoro na wuwai laeon huri rahe gani laire tea.

³⁴Lo taro lavasigi ram vagamate na avi hi mo mui u huire lawagi, ko lo taro lavasigi ram toa denire tangaloi hi rave ram uevagamatera gina buei vuro. A nora huireana hatie, nge i God mo bete na huireana lawera rabei huire lo taroi vuro. Siu ram qoragi na tangaloi vuro doluegi lo vanue wagineu.

³⁵A vavine lavasigi rau ladohogo lui God, giniehi, i God mo vagamwasoi rehavara ram mwaso taligu dena mateana. A tangaloi lavasigi hi ram ladohogo lui God, ve mwere rau siregi na nora ladohogo, nase vai a nora tavului vuro rain sireginire rain mwaso. Nge hatie. Ingere ram siregi na tarabesire lawe na nora tavului vuro ram vai gagarasiginire mo dadari lune ram mate huri rahe masinge tea ve rain siregi na nora ladohogo. Rau veie mwerehi huri ram ladolado lune huri ve tare rain he siregi na nora ladohogo tea, huri i God vin ragasire taligu dena mateana sulo mwasoana ngehi u garea garagara.

³⁶A tangaloi lavasigi rau ladohogo lui God, a nora tavului vuro ram managi asiesiginire, ko ram vivihire. Siu a tangaloi lavasigi mwerehi vage ram vauhire gina seni, ram taure lolo valei vauveu.

³⁷A tangaloi lavasigi rau bobo vagamatera gena vatu lalawua, lavasigi a tangaloi rau teve utuhire mudu gairue, lavasigi a tangaloi rau turu vagamatera gina buei vuro. Siu a tangaloi lavasigi vage ram dige vurogi mwerehi hatie luqara ram luqegi na vinui sibsib ko a nani hogosie. Ram mahogi u liu, a tangaloi ram livusire, ko ram vai asiesiginire.

³⁸A tangaloi mwerehi a tangaloi garea, a tangaloi ta lolo ure rahe tatarise tea ve rain bulu mweire, ram dige lategi lolo labute vurogi ko lo vusi, mwerena tangaloi hate nona togagi venue. Gesegi ingere ram maturu lolo malanga vatu ko a malanga tano.

³⁹Huri a tangaloi doluegi ngerehi rau ladohogo lui God, a valu hurire vin he sala tea. Nge rahe lai na gareana hi te tau mosigei ngehi i God u warataugi teu ve vin betea lawera,

⁴⁰huri i God a nona domiana huri gide u garea denie hi u veie hurire tuei. A nona domiana hi huri ve vin lei buluteginire mei gide tomue, siu mobei veire ram vovohoi.