Read East Ambae HIBRU 12 Bible Online

HIBRU 12 - East Ambae bible

HIBRU 12

¹A tangaloi ingere hi, a gaiturei leo noi God rau sao garagara ram labe dali gide. Siu u tatarise huri ve dain siregi na gineu doluegi hi ram eno goro na nagoda, ko a galegaleasi hi ram wiribibi siagagi gide, siu igide da vai na domide na siaga, da toa siaga na huri na turegi hi mo eno lo nagoda.

²Siu gesegi igide da leo vano vovohoi Jisas huri a noda ladohogo u vomai denie, u teuvuigi lo vuigi mo dadari vagasigi. Lune mo vano huri ve na mate lo gai saroutu, he siregi na matahalana tea. Ingeie mo leo hogosie sibona huri ve lo taro gatagale inge vin rong garea. Siu ingeie he lado tea huri ve a gai saroutu vin vei na maemae lawua lawea. Ingeie mo vano tuturedu. Siu siseri ngaha ingeie mo toga lo matuei God ingeie a huqe lawua mo toga lo nona tanoi togatoga ratahigi lawua lo ute ta eulu.

³U garea ve igimiu nein ladolado huri na tanoi gagarasi hi ingeie u vano lolona, ngehi a tangaloi galegaleasi hi ram maraga ram vaiveie. Siu siserigi ngaha a domimiu vin labe siaga, siu nein mese siregi na nomiu ladohogo.

⁴Mwerehi lo nomiu togaana nen qalo goro na vuiesi, siu gatagale den gimiu a daine he hale tea, ko vena mate.

⁵?Igimiu neu geluvegi na leo hi lo Reve reve Gogona ngehi i God u laqa mei gimiu lune, huri ve na ragasi na domimiu huri igimiu ira netune vohogi? U veve mwere ngaha vena, “Netuku ineu a nomu Huqe. Lune nain vei garasigo goin mese lado bulabula, ngehi a leo huhui. Lune nain veveginigo, nge goin mese romasi ve a domimu na soi.

⁶Huri ineu a nom Huqe, ineu nain vei garasire ingere hi nau tabera hageliu. Siu ineu nain vivihire hi nau leire gi renetuku.”

⁷Lune nem rong-gagarasi lo tarabesimiu nei mese toa denie, huri God mo vai mwerehi lawe gimiu, ngehi mo haharagi huri ve igimiu ira netune. A maresu he tino tea mwere hi, huri ve i tamana he vai garasie tea.

⁸Tare i God vin he vai garasi gimiu tea mwerehi mo bete lawe renetune doluegi a iloilogi huri ve igimiu hatie renetune vohogi, igimiu a natu lo mahogi.

⁹Lo doridoride tangaloi talo ure, i retamada ram vivihi gide, dam lado mavaginire huri. ?Nge wuraha mei Tamada lo eulu? Dai lado mavaginie hageliu denie hi dam ladomavagi tamada hi talo ure ngaha, igide dain toga lo vavana huri dain mwaso.

¹⁰I retamada talo ure ngaha ram vai garasi gide huri na mahogi qilodo hogosie, u tatarise mena iloilora. Nge i God mo vai garasi gide huri ve na vai gide da voragi tangaloi garea, huri da bulu meie da voragi tangaloi gogona mwereie.

¹¹Siu dau ilo huri ve lune i God vin vei garasi na tangaloi, a gineu hi vin he vaie teve na rong garea, vin veie vin romasi. Siu lo tagugi hi ingere hi i God vin vei garasire mwere hi ve mo haharara ve rain haqe na mwasi gagarasi hi. Rain toga lo tamwata, siu a nora togaana vin tatarise vurugegi lo nagoi God.

¹²Huri na gineu hi mo vai mwerehi a Reve reve Gogona mo veve vena, “Nen gamalagi na limemiu, hi ram wiriwiri. Siu nen wirihi na qaumiu hi ram rurururugi huri ran huire taligu.”

¹³Nen huri na matahala hi rau tavola hogosie huri a karumiu hi rau esi, mwere a qau mo doriesi, huri vin garea taligu.

¹⁴Gesegi nein toga lo tamwata mweire tangaloi ngerehi. Gesegi nein toga lo vovohoiana vei igimiu a tangaloi Gogona noi God, ne tare ve hatie nein he leo lai na noda Huqe tea.

¹⁵Nein leo huri vurugegi vaiteu gatagale den gimiu vin tudori vin vano dena lologarea noi God. Nein leo huri vin garea vaiteu gatagale te den gimiu mo mwerena vui gei ngehi u meuri hage a raugi rau gogona, siu a tangaloi ram ganie ram sege ginie.

¹⁶Nein leo huri vin garea vaiteu gatagale den gimiu mo mwerei Iso hi a nona togaana he vovohoi tea, ko vage he lado haqe God tea. U sogagi na nona gineu doluegi ingere hi u tatarise ve ingeie vin leire huri ingeie a togai tangaloi, nge a gai voli gineu ingere hi a hinaga u geni vagatagale hogosie siu u rovo.

¹⁷Igimiu neu ilo huri ve lo tagugi hi i tamana vin vaigareaginie, nge i tamana he vai lei tea. Huri i Iso he vailei tea huri ve vin tuguhi na nona waratau taligu den tuana, hate huri mo tangi, nge ingeie vin he vailei tea huri u rovo beno.

¹⁸A gineu ingere hi igimiu neu vomai lolona beno, rahe mwerena gineu tea ngerehi ira duvi Israel rau vomai lolona tuei, hate gineuhi ureure ngaha huri ve nein rongo laire lolo tarabesimiu. Huri tuei ira duvi Israel rau vano lo vusi lawua hi Saenae, ngehi a avi lawua mo mui lune, ko a dodo lawua u vomai mo luluwegi na ute ko a langi lawua mo here.

¹⁹Aiehi a tavue lawua mo tatangi, siu ram rongo na diloi God mo laqa mweire. Lune ira duvi Israel ram rongo na leona ram navu garagara ram veve vena, rau rao ve rain rongo na leo hi taligu,

²⁰Huri ingere ram matagu garagara gina leo hi mo veve vena, Tare a kakarue gatagale mo dadari lo vusi lawua ngaha nein buguri vagamatea gina vatu.”

²¹Lune i Mosis mo lehi na gineu ngerehi mo romasi uliu, mo veve vena, “Ineu nam matagu uliu, a huiku mo ruru ginie.”

²²Nge igimiu neu dadari beno lo vusi Saeon ngehi a qatui venue lawua noi God hi mo mwaso, ngehi Jerusalem tuegi hi lo eulu. Aiehi a engsel saosao ram havuhevu gesegi.

²³Siu vage a warelue doluegi noi God ram sone bubugi aie, ingere hi doluegi mei reneture rau vora tomuegi redu, u uli bibi na henara beno lo eulu. Siu igimiu neu vomai lobei God beno, huri ingeie vin vilegi na doridorire tangaloi doluegi nen vomai nen bulu mena tamatera vovohoi doluegi hi rau mate beno, i God u veire rau vovohoi beno.

²⁴Nen vomai lobei Jisas, hi ingeie u teuvuigi na waratau garaqa noi God. Igimiu nen vomai vage lo dain Jisas ngehi u vei gimiu nem mwasara, u veve huri na gineu ingere hi rau garea liu dena gineu ingere hi a dain Ebol u veve hurire.

²⁵Huri na gineu hi nein leo huri vin garea huri vaiteu nem tudori denie hi mo laqa mei gimiu. Tuei a tangaloi doluegi rahe tarani tea ve rain rongo na leoi God hi u vevea hano lo ure huri ve vin vagaradasi na tangaloi doluegi siu ingere rain he toa lai tea den God. ?Siu ngaha igide dam rao rongo na leoi God hi u vomai den eulu huri ve na ragasi gide, dain toa lai wuraha denie?

²⁶Lo taro hi tuei a leona u gilugi na ureure, siu lo taro ngaha u warataugi lawe gide mo veve vena, “Nain gilugi na ureure vagatagale vage. Io lo tarohi nain he gilugi na ureure tea hogosie, nge a eulu vage.”

²⁷A leo hi i God u veve vena, “Vagatagale vage.” Ngehi mo haharagi matamwasaragi vei God mo veve huri na gineu ngerehi u teure lo ure ngaha. Ingeie vin vei na gineu ngerehi rain gilugilu, ko vin lei vohoginire. Nge a gineu ngerehi rain he gilu tea vohogi ngerehi hogosie rain eno.

²⁸Huri na gineu ngerehi, u garea ve dai vevegareagi God huri u lei gide da vanai mo voragi noda ratahigi. Mo voragi ratahigi, a nona huireana vin he sala lai tea, ko vin he soi lei tea. U garea ve da hudu hudugoroe lo doridorigi hi u hevuhevu lune, ngehi dai lado mavaginie, ko dai matagu ginie vage.

²⁹Huri a hogo, a noda God hi u mwerena avi lawua ve vin gao weteragi na gineu doluegi rain salasala.