Read East Ambae HIBRU 13 Bible Online

HIBRU 13 - East Ambae bible

HIBRU 13

¹Nen vui tabetabe gimiu, mwere ve igimiu a rere tehigi gatagale lui Kraes.

²Vage igimiu nein rarai gesegi ve nein lai vurugeginire hala vano talolo valemiu. Nen ilo vage huri a tangaloi lavasigi tuei rau vei na doridori ngehi, nge ram laire engsel ram vanai lolo valera, nge rahe ilo tea ve ingere a engsel.

³Vage nei ladobibi rahine ram toga lolo valei vauveu, mwere ve igimiu vage nem toga vau mwereire vage nei ladobibire tangaloi hi ram gagarasi lo tarabesire, mwere ve igimiu vage nem gagarasi mweire mwerehi.

⁴A lagiana a doridori hi ve igimiu doluegi nein ladomavaginie. A mwera vin toga hogo mei gahorana, a vavine vin toga hogo mei tamai netune. God vin vevegi na mwalakelo mwera ko a mwalakelo vavine hi ram maturu bubugi, ko vin vevegi na mwera hi mo maturu mena vavine ngehi hatie gahorana, ko a vavine mo maturu mena mwera ngehi hatie tamai netune.

⁵He garea tea ve gimiu nein vei na doridorigi hi ve nein leoleogarea mane. Nge nein leogarea gena nomiu gineu ngehi u eno beno, huri i God u veve beno vena, “Ineu nain he sireginigo tea ve gon tino gahego. Nain he sireginigo tea vohogi.”

⁶Giniehi, da vai na domide na siaga da veve vena, “A Huqe vin buluieu, !Ineu nain he matagu tea! ?A tangaloi rain vei na havagineu laweau?”

⁷Nein mese galuvegi na nomiu tangaloi tomtomuegi ta tuei hi rau tomuegi gimiu, ingere hi rau veve sere na leoi God lawe gimiu. U garea ve gimiu nein lado bibi na doridorire, huri ve rau mwasara rau vei mwere hilogo, siu ingere rau mate mwere hilogo. Siu igimiu nein hurire, lo doridorinai nora ladohogo.

⁸Jisas Kraes vin he dori lai tea, a doridorire hala gatagale hogosie, u teuvuigi tuei mo dadari hi bagataha, ko vin he rovo lai tea.

⁹Gimiu nein mese siregi na doridorinai leo wagiwegineu ingere hi ve ran tugoro gimiu dena doridori vovohoi. Nein lehi God hi mo bului gide gina nona lologarea, huri vin vei na noda domiana rain huire. Bataha he garea tea ve igide dain leo vano lo tamwata huri na hinaga, huri ve vin vei gide dain huire. Io a hogo, a tamwata ingere hi rain he bului na tangaloi ngerehi tea hi ram hakobibi na tamwata ngerehi.

¹⁰A tangaloi rugurugu ngerehi rau tabana lolo tanoi hudugoro nora duvi Israel rain he bulu lai tea lo rugurugu vevegarea hi igide dam bete lo tanoi noda hudugoro.

¹¹Lo doridori nora muei rugurugu, lune ram wehi na kakarue morovo, ram lai na daigi ram vano lolo Ute Gogona hi u Gogona Garagara, ram betea lawe God huri mo lai vohogi na galegaleasi nora tangaloi. Siu ram lai na betui kakarue hi, ram mwalue meie varea ram hurae tavala varea dena togagi venue.

¹²Giniehi, i Jisas u mwelue varea dena qatui venue lawua, aie hi mo rongo gagarasi lo tarabesine. Lo doridorigi hi mo mate, a daine hi mo solomwasara ginire tangaloi dena nora galegaleasi, siu huri rain labe lai lo nagoi God.

¹³Igide vage da vai mwerehi, da vano da bulu meie tavala varea dena togagi venue. Siu da rarai huri a tangaloi rai vei gide dai maemae mwere hi rau vei lawea.

¹⁴Siu lo ure ngaha hatie tanoda vovohoi huri ve vin eno vagituei, hatie vohogi, siu igide dam hikesi na qatui venue gatagale nge hi ve vin vomai.

¹⁵Huri na gineu hi da bulu mei Jisas, huri gesegi da waregareagi na henai God. Huri lo doridorigi hi vin waregi ve a noda rugurugu vevegarea lawea. Huri gesegi dam matamwasaragi lo nagora tangaloi huri ve Jisas a noda Huqe, ingeie mwere a noda hilehile hi dam bete lawe God.

¹⁶Gesegi igimiu nein vai na doridori garea, nein vui bului gimiu, huri a doridori ngerehi vage mwerena rugurugu vevegarea nem bete lawe God nge vin havuhevu huri.

¹⁷Nen ladomava ginire nomiu tomtomuegi, nein rongo huri na leora vage. Huri ingere hi rau leo huri na mwasoamiu lui Kraes, rahe siregi tea vohogi, huri ram veve lawe God ve rain vei na nona tabana mwere hilogo, nein veire rain rongo garea lo nora tabana. Tare ve nem vaire rahe rong garea tea lo nora tabana, a doridori hi vin he hako tea meire vohogi.

¹⁸Nein tataro huri gamai gesegi. Gam rongo lolo tarabesimai ve neu vei na gineu garea gesegi, a domimei vin he wiriwiri tea, huri gam tarani ve a doridorigi vin vovohoi gesegi.

¹⁹Giniehi, nam tarani garagara ve nen tataro navunevu den God huri ve ineu nain vomai siseri teligu lobemiu.

²⁰A noku tataro ngaha, God a vui tamwata, ingeie vin bete na gineu garea teri lawe gimiu ngerehi nem mahogi hurire, ingeie vin vei gimiu nein tatarise huri nein vei lei na gineu mwere nge mo tarani. Jisas hi a noda ratahigi hi u mate a daine mo hale huri mo vai siagagi na waratau noi God hi vin he soi lai tea vin tuei. Siu lo tagugi hi i God mo vagamwasoie dena mateana, huri a daine u hale i God mo vaie mo voragi muei tangaloi leogoro sibsib. Siu ineu nam tataro ve i God na vai gide da bulu mei Jisas Kraes, huri ve dai vovohoi mwere inge mo tarani. Huri igide dai tabe hagagi na henai Kraes vin tuei vin he rovo lai tea. Amen.

²²Retueku ko rehaqeku. Nam navu siaga den gimiu ko nam tiehi gimiu ve nen rongribi, ko nen rongo huri vurugegi na leoku. A leo ingere ngaha huri ve ran vai ragasi na domimiu, nge a leogi he qaravu tea.

²³Nam tarani ve nen ilo huri ve i tuada hi i Timoti u mwelue beno dena valei veuveu. Tare ve mo dadari mo siseri, vin bulu meieu, gori vanatu gori siro gimiu.

²⁴Nam tiehi gimiu ve nein veve gareaginire nomiu tomtomuegi, ko ira noi Kraes hi lo vanuemiu. Ira noi Kraes lo vanue Itali ram veve nora rong garea lawe gimiu.

²⁵Noku tataro ngaha huri ve i God vin bului gimiu doluegi gina nona lologarea.