Read East Ambae HIBRU 2 Bible Online

HIBRU 2 - East Ambae bible

HIBRU 2

¹Giniehi, igide dain labe siaga huri ve dain wiribibi siagagi na leo hogo ngerehi dau rongora beno, huri igide dain he vano salasala tea dena matahala.

²Igide dau leo beno huri na leohora hi a engsel rau leie himei lawe retubude u garea uliu. A tangaloi rau kalokalo lo leo hi, sige rahe rongo hurie tea, rau lei na leo vevegi hurie beno.

³?Siu u garea tare igide dam dom bulabula gina matahala hi i God u teue huri ve vin vagamwasoi gide, ngehi u garea garagara, siu igide dain toa lai dena leo vevegi hi mwerehilogo? A noda Huqe ingeie hi u veve na matahala ngaha gitomue radu, siu ingere rau rongoe ram veve sere lawe gide huri ve a matahala hi u garea.

⁴Siu vage i God u bulu mweire mo haharagi ve a matahala hi u garea, huri mo vai na vaigivui ko a gineu garigiana u sao siu vage mo bete lawe na tangaloi a hogohogo talo huireana nona Vui Gogona mo betea mo huri na nona tarani.

⁵I God he tau na engsel lo eulu tea huri ve rain huqegi goro na ure garaqa ngehi ve vin vomai. A ure hi igide dam laqaginie.

⁶Huri a leogi lo Reve reve Gogona mo veve vena, “God, igamai a tangaloi, a gineu hatie vohogi lumei huri ve vin veigo goin lado haqe gamai lune.

⁷Gamai ira netui tangaloi, hatie gineu lumei huri ve goin leo huri gamai lune. Siu huri na taro qilodo vohogi huri ve goin leo huri gamai lune. Iniko gu vei gamai, igamai gau eno hivo vuine denire engsel lo eulu. Siu siseri ngaha gom tabe hagagi gamai, gom bete na hea lawua lawe gamai,

⁸gom vai gamai gan huqegi goro na gineu doluegi.” A leo hi mo veve huri ve i God mo vai na tangaloi ram huqegi goro na gineu doluegi a domianagi huri ve vataha na gineu doluegi. Siu igide dahe leo haqea tea huri ve a tangaloi rau huqegi goro na gineu doluegi hi bagataha.

⁹Siu igide dam leo haqea vei Jisas ingeie hi mo huqegi goro na gineu doluegi. Huri na domi tabetabe lawua noi God mo vai Jisas mo eno hivo vuine denire engsel huri na taro hi, huri ve vin mate vin vagamwasoi na tangaloi doluegi. I Jisas mo rongo gagarasi lo tarabesine mo dadari mo mate, giniehi, igide dam leo huri vei God u tabe hageginie mo bete na hea lawua lawea.

¹⁰I God ingeie hi u teu na gineu doluegi, siu a gineu doluegi hi rain voragi nona, ingeie mo tarani ve vin lei renetune doluegi rain bulu meie lo nona gareana lo ute ta eulu. Siu i God u veie u tatarise mo siregi Jisas mo rongo gagarasi lo tarabesine, huri ve i ingeie vin veie vin voragi tangaloi vagamwasoire tangaloi vovohoi. Siu siseri ngaha i Jisas ingeie a gai tomtomegi lawe na tangaloi ngerehi i God vin vagamwasoire.

¹¹Ingeie u veire ram mwasara dena nora galegaleasi ram gogona. Siu ingeie, mweire hi u veire ram mwasara, i tamara gatagale vohogi. Giniehi i Jisas he maemae tea vohogi huri ve vin veve huri ve i retuana ngerehi.

¹²Ingeie mo veve vena, “God, ineu nai veve sere lawe retueku huri na doridorimu doluegi. Ineu nam waregarea ginigo lo nagora tangaloi doluegi.”

¹³Siu u veve vage vena, “Ineu nai teu na domiku vin siaga lui God.” Siu mo veve taligu vena, “Ineu tangaha mweire raranatugi ngerehi i God u betera beno laweau.”

¹⁴A raranatugi hi i Jisas mo laqagi hurire ingere a tangaloi, a tarabesire ko a daire lure. Siu i Jisas u voragi tangaloi, mo mwereire vohogi, mo bulu mena mwasoana gatagale mweire. U veie mwerehi ve turuhi na nona mateana ingeie vin qoragi na huireana nona Tamate hi i Satan, ingeie mo hakovi na huireana goro na mateana.

¹⁵Huri a tangaloi rau matagu gina mateana, i Satan mo vaubibire gesegi lo tamatera mwere ingere a tangaloi toga vau vohogi. Siu i Jisas u mate huri ve vin riqe na tangaloi toga vau ngerehi ve rain meriqe.

¹⁶U matamwasara huri ve i Jisas he bului na engsel ta eulu tea. Ingeie a Reve reve Gogona u veve hurie vena, “Mo hako mweire hi a duvi Ebraham.”

¹⁷A vevenagi hi mo vai mwere ngaha. Gitomuegi mo dori mo tatarise mwerei retuana, siu ingeie mo voragi nora muei tangaloi rugurugu lo nona tabanagi lawe God. Ingeie a nora muei tangaloi rugurugu ngehi u hagavire, ram ladohogo ginie, giniehi, mo vai na matahala huri ve i God vin lado vohogi na nora galegaleasi.

¹⁸Hibagataha ingeie vin hako mei rahine hi a gineu ram vai lehire, huri ingeie vage rau vei lehe tomue, siu ingeie vage u rong-gagarasi lune beno.