Read East Ambae HIBRU 3 Bible Online

HIBRU 3 - East Ambae bible

HIBRU 3

¹Retueku, God u ware gimiu beno, siu siseri ngaha igimiu neu gogona, igimiu a nona tangaloi. Nge huri na leo hi nau vevea beno, igimiu nein domdom lui Jisas hi dau mata-mwasaraginie beno huri ve igide dam ladohogo lune. Ingeie mo waregi ve a noda gaihora vage u wareginie ve a noda muei tangaloi rugurugu.

²I Jisas u veie u bagoto goro na nagoi God mo leo wahea huri na tabanagi ngaha, mwere hi tuei, i Mosis u veie u bagoto lo nona tabanagi mo leo huri na sinobu noi God.

³A tangaloi hi mo vutu na vale, a henana u lawua dena vale hi u vutue. Siu lo matahala mwere hi, u tatarise huri ve i God vin tabe hagagi Jisas vin liu den Mosis.

⁴Io a hogo, vataha na vale a tangaloigi lune hi ram vuture, siu i God u teu na gineu ngerehi doluegi.

⁵I Mosis u vei na gineu rau bagoto lo nona tabanagi lawera tangaloi noi God. Ingeie a tangaloi tabanagi noi God, mo veve sere na gineu doluegi gitomue siu i ngerehi lavasigi a tangaloi rain veve serera atagu.

⁶Siu i Kraes u veie u bagoto lo nona tabanagi. Ingeie i Netui God hi mo leo huri renetui Tamana. Siu huri ve a domide mo eno u siaga, dam ladohogo huri ve igide dain lei na gineu hi dau teu na domide lui God gina havuhevu, igide ira netui God.

⁷Giniehi, a Vui Gogona u veve lo Reve reve Gogona vena, “Hibagataha tare igimiu nem rongo na leoi God,

⁸nen mese vai qatu siaga mwerei retubumiu rau vei teu, ram maraga ram vaivei God, siu igimiu nei mese vai na doridori hi mwerei retubumiu rau veie tuei, lo taro tuei ingere rau veiveie lo vanue vurogi.”

⁹I God mo veve vena, “Lo vanue vurogi hi i retubumiu rau lehi na doridoriku a higao ngavulu gaivesi, ingere rau kalokalo lo noku leo ve ran vai lehieu.”

¹⁰Giniehi, ineu nam lolo gagasi garagara ginire. Siu nam veve vena, “Gesegi ingere ram vano rerarera rahe masinge tea ve rain ilo na doridoriku.”

¹¹Ineu nam lolo gagasi ko nam haharigi vena “Ingere rain he ahu lai tea vohogi lolo vanue hi ve nain bete na tanoi mangaana lawera aie.”

¹²Retueku, nein leo huri vin garea vaiteu te den gimiu a taqangine he vovohoi tea ko he ladohogo tea gi God hi mo mwaso ko vin he mate lai tea, siu ingeie vin maraga vin vano denie.

¹³Igimiu nein mese vai mwere hi. Ingeie vataha rani mwere na leo hi mo veve vena, “Hibagataha” mo eno mosigei lude, vin he vagasile tea igimiu nein laqalaqa huri vin vei ragasi na domimiu. Lo doridorigi mwere hi a galegaleasi vin he sine lai gimiu tea ve gatagale a qatune vin siaga.”

¹⁴Tare ve a noda ladohogo lui Kraes hi lo tauvuigi dam wiribibi siagaginie vin dadari lo gologi, siu igide doluegi dain bulu meie lo nona gareana.

¹⁵A leo lo Reve reve Gogona u veve mwere ngaha vena, “Hibagataha tare igimiu nem rongo na leoi God, siu nein mese vai qatu siaga, mwerei retubumiu hi rau veie lune ingere rau veivei God.”

¹⁶?Ira hine hi rau rongo na leoi God, siu ram maraga ram vaiveie? Ingere doluegi hi i Mosis u tomueginire ram mwalue dena vanue Ijib.

¹⁷?Ira hine hi i God u lologagasi garagara ginire huri na higao ngavulu gaivesi? Ingere sinobu hi hogosie rau galegaleasi, siu ingere rau mate ram taqao lo vanue vurogi.

¹⁸?Ira hine hi i God u haharigi gorora vena, Rain he ahu lei tea vohogi lolo vanue hi u vei ineu nain bete na mangaana lawera aie? Ingere tau hi ram maraga ram vaiveie.

¹⁹Siu siseri ngaha igide dam lehe ko dam iloe ve ingere hi, rain he ahu lei tea vohogi lolo vanue hi huri rahe ladohogo tea gi God.