Read East Ambae HIBRU 4 Bible Online

HIBRU 4 - East Ambae bible

HIBRU 4

¹Siu i God u bete na waratau lawe gide beno, ve dain lei na mangaana hi u waratauginie, igide dain leo huri vin garea. He garea tea ve gatagale dein gimiu vin vagasile, ve vin he lai na mangaana tea hi u waratauginie.

²Huri igide dau rongo na Roro Garea beno u tatarise mwereire hi tuei rau rongoe. Ingere tuei rau rongo na leo hi, nge he buluire tea, a vevenagi ingere rau rongoe nge rahe laie tea gina ladohogo.

³Nge igide hi dam ladohogo, dau lei na mangaana hi beno. A mangaana hi i God u waratau ginie tau vena, “Ineu nam lolo gagasi nam haharigi vena ‘Ingere rain he ahu lei tea vohogi lolo vanue hi huri ve nain bete na mangaana lawera aie.’ ” Siu lo taro hi u tau na ure ngaha morovo a nona tabanagi doluegi u rovo.

⁴Huri a leo gatagale lo Reve reve Gogona mo veve vena, “Lo rani gaibitugi i God u manga dena nona tabanagi doluegi.”

⁵Siu siseri ngaha mo veve na leo huri na mangaana hi taligu vena, “Ingere rain he ahu lei tea vohogi lolo vanue hi ve nain bete na mangaana lawera aie.”

⁶Ingere hi rau rongo na Roro Garea ngaha tomue ingere rahe lai na mangaana tea mei God huri ingere rahe ronghurie tea. Siseri ngaha u matamwasara huri ve a tangaloi wagineu tea, ingere rain leilei na mangaana hi mei God.

⁷Giniehi, i God mo tau na rani wagineu vage. Siu a higao u sao rau vano beno, ko mo veve taligu vena, “Hibagataha.” Mwerehi i Devet u veve hurie lo duvi leogi hi nau vevea beno, “Hibagataha tare igimiu nem rongo na leoi God Igimiu nein mese vai qatu siaga.”

⁸Tare ve i Josua u bete na mangaana lawe na sinobu hi God u waratauginie lawera, i God vin he tau na rani wagineu tea vage.

⁹Siu nge ngaha vin he mwere hi tea. Huri a taroi mangaana mo eno mosigei huri na sinobu noi God ngehi u mwerena mangaana noi God ngehi u manga lune lo rani gaibitugi.

¹⁰Huri ihine u lei na mangaana ngehi i God u waratauginie, ve vin manga dena nona tabanagi mwerehi tuei i God u manga dena nona tabanagi doluegi.

¹¹Siu igide dai labe siaga ve da lailei na mangaana hi. He garea tea ve gatagale den gide ve na huri na tai kerure hi tatuei, ngehi rahe ronghuri God tea, siu vin he lailei na mangaana hi tea mei God.

¹²A leo noi God a gineu mwaso, mo gilu, u hogo u liu, u hogo sileti na buei vuro hi a hogogi dalideli. Ko mo ari mo vano lolo domi tangaloi ko a tarabesine mo bulu mena mwasoana, mwere hi a buei vuro hi mo ari mo vano lolo mahogi hi a hui mena nubunubugi ram hari bubugi. A leo noi God vin vevegi na domi tangaloi ko a gineu ngerehi a tangaloi mo taranie lolo lolona sibona.

¹³Siu a gineu he hili tea dena nagoi God. A gineu doluegi i God u teure ram tino vovohoi goro na nagona. Siu igide doluegi dam veve matamwasaragi na noda togaana lo nagona.

¹⁴A ladohogo ngehi dau veve sere huri ve dam ladohogo lune, siu igide dain wiribibie vin siaga. Siu a hogo, a noda Muei tangaloi Rugurugu lawua aie, ingeie hi Jisas, i netui God nge hi u ehu beno lo eulu, mo labe goro na nagoi God.

¹⁵A noda muei tangaloi rugurugu hi, he mwerena rugurugu tea lavasigi lune igide dam wiriwiri, ko dam galegaleasi, nge rahe hagavi gide tea, a noda muei tangaloi rugurugu hi, ingeie u hahagavi, huri a gineu ngerehi ram vai lehi gide rau vei lehe beno, nge ingeie u wegineu dei gide lune hi vohogi, huri he vai na gineu esi tea.

¹⁶Giniehi, igide dain mese matagu, a domide na huire huri ve da vomai goro na nagoi God, ngehi mo hako mei gide gina nona lolo garea u lawea. Ingeie vin hagavi gide, siu lo tarogi hi a noda romasi aie, ingeie vin hako mei gide gena nona lolo garea.