Read East Ambae HIBRU 5 Bible Online

HIBRU 5 - East Ambae bible

HIBRU 5

¹Igimiu neu ilo beno ve vataha na muei tangaloi rugurugu, i God u leo wahe denire tangaloi lavasigi, mo rivure ve rain tabana lawea huri na tangaloi doluegi. A muei tangaloi rugurugu mo bete na hogogi nora tangaloi lawe God, ko ram wehi na kakarue ram rugurugu ginie huri mo lai vohogi na bugure.

²Gesegi ingeie mo rongoribi mweire tangaloi hi rahe ilo na gineu tea hi ram vaie, sige ram vai saloi, siu ingeie vage mo vai vagasile, huri a nona huireana hatie.

³A tangaloi rugurugu hi a domine u kekena, ingeie vin vei na rugurugu hate huri na bugure tangaloi hogosie, nge huri na bugune sibona vage.

⁴A tangaloi vin he leo wahea tea sibona vena lai na tanoi lawua hi ve a muei tangaloi rugurugu. Ingeie God hogosie u ware lai na tangaloi ve vin lei na tabana hi a muei tangaloi rugurugu, mwerehi u leo wahe Eron tuei.

⁵Siu lo matahala mwerehi i Kraes he lai na tanoi lawua hi te sibona ve na voragi muei tangaloi rugurugu, ingeie God u leo wahea mo veve lawea vena, “Iniko i Netuku, Hibagataha ineu nam voragi Tamamu vohogi.”

⁶Siu mo veve na leo wagineu vage vena, “Iniko goin voragi tangaloi rugurugu, mwerena tangaloi rugurugu hi i Melkisedek tuei, siu goin tino lo tabanagi hi vagi tuei vin he rovo lai tea.”

⁷I Kraes lo nona mwasoana hi lolo ure ingeie mo tataro lawe God, mo navunevu gineu denie mo tangi gina dilogi u lawua a nona tinengi ram hale dena matana. I God a nona huireana lune ve vin lei vohoginie dena mateana, nge huri Kraes u vei wuwou ginie mo lado mavagi God, i God mo ronghurie.

⁸Huri ba ingeie i netui God, lo nona rong-gagarasi lo tarabesine, inge mo huhui na lengai ronghuri.

⁹Giniehi, God mo vaie mo dori gina tangaloi vovohoi huri ve vin vagamwasoire tangaloi, ingeie vin vagamwasoire tangaloi doluegi hi ram ronghurie, siu ingeie vin wiribibire vagituei.

¹⁰Siu i God mo bete na hea hi lawea, ve ingeie a muei tangaloi rugurugu mwerei Melkisedek tuei.

¹¹A nomai leo u sao huri ve gain vevera lawe gimiu huri na gineu hi, siu u gona mei gamai ve gain veve matamwasaraginire doluegi lawe gimiu, a vevenagi a domimiu mo kea u ribi lawagi, huri nein he vai lei tea ve nen rong hogosire ve na siseri.

¹²I gimiu neu rongo na leoi God tuei beno, siu ngaha u tatarise ve i gimiu nein huhui na tangaloi ginie, nge igimiu nge he ronghogosie tea mosigei. Nge igimiu nem tarani ve a tangaloi na huhui gimiu taligu gina vui leo ngerehi. Ngaha mwerehi ve igimiu nem mule taligu, igimiu nehe gani na hinaga siaga tea, nge igimiu nem gani na meme hogosie.

¹³Siu ingere ram gani na memei ratahire ingere ram maresu mosigei, siu ingere rahe vailei tea ve rain ilo na leo huhui huri na vovohoiana.

¹⁴Siu a hinga siaga, a gara tangaloi hi rau sesea beno, ngehi rau veileo tuei, siu ngaha rau veilei beno ve rain leowahe na gineu hi rau garea dena gineu hi rau esi.