Read East Ambae HIBRU 6 Bible Online

HIBRU 6 - East Ambae bible

HIBRU 6

¹Huri na gineu hi igide da siregi na vui leo huhui huri Kraes na eno beno, igide da vano tuturedu lo leo ngerehi ve rain vei gide dain voragi tangaloi lalawua lui Kraes. Igide dain he tari na vodai vale tea gesegi. Siu lo matahalagi mwerehi, igide dain he laqagi na doridori tea gesegi huri ve da dori na domide dena doridori tatuei hi a mateana lune, nge ve igide da ladohogo lui God.

²Igide dain he laqagi na garuhigogona tea gesegi ko vage lo matahalagi mwerehi dam tangovi na tangaloi. Siu igide dain he laqagi na leo tea huri na maragaana taligu dena mateana ko huri na leo huhui hi i God vin vilegi na doridori tangaloi siu ingeie vin veve ve ira hine hi rain mwaso vagi tuei ko ira hine hi rain mate vagi tuei.

³A gineu ngerehi rau mwerena vodai vale vohogi. Nge igide da vano tutu redu, tare i God mo siregi lawe gide, dain veie mwerehi.

⁴Siu a matahala hatie lawera hi rau mule taligu huri ingere rau vomai lo leleo noi God beno. Rau lei na hogogi beno hi u himei den eulu. Ingere ko a tangaloi lavasigi vage rau lei na Vui Gogona beno.

⁵Ingere rau leo haqe beno ve a leoi God u garea garagara, siu ingere rau rongo na huireana nona ureure garaqa hi ve vin vomai.

⁶Siu lo tagugi hi ram siregi na nora ladohogo ram vano taligu lo doridorire ta tuei. Siseri ngaha a matahala hatie vohogi huri ve dain leire rain mule taligu huri ve dain veire ve rain dori na domire taligu dena nora galegaleasi. Huri rau veie mwerehi, u tatarise huri ve rau toto vehavehagi Netui God lo gai saroutu taligu, rau vei na maemae lawua lawea lo nagora tangaloi doluegi.

⁷Tare a mavusui tano mo lobu huri mo uhe talune vin vei na rivurivu garea rain meuri, vin bului na tangaloi hi a nona tanogi. Huri i God u vei gareagi na tano hi beno.

⁸Nge tare a mavusui tano hi a garokau mena duvu esi ram tubu lolona, a tano hi he garea tea mena gineu vohogi. Giniehi, u kakarani huri ve a tangaroasi noi God vin hivo lune, siu i God vin hure vohoginie gena avi.

⁹Retueku, igamai gam rong garea gi gimiu u liu. Igamai gam laqa mei gimiu mwerehi nge lolo domimei gau ilo vurugegi huri ve nein he vai tea mwerehi. Igamai gau ilo vurugegi huri ve neu lei na gineu gagareagi hi i God u bete lawe gimiu huri ingeie u vagamwasoi gimiu.

¹⁰Ko gesegi i God mo vai na gineu rau garea tamwere. Ingeie vin he galuvegi na nomiu tabana tea ngehi neu veire, ingeie vin ladobibi na tabetabe hi neu veie hurie ko nem bete na tabetabe hi mo sigei lawe rehavamiu lui Kraes. Siu igimiu nem hako mweire mosigei.

¹¹Siu igamai gam tarani garagara huri ve vatavatahagi gimiu ve a domimiu vin siaga tamwere, siu igimiu nein lei na gineu saosao hi a domimiu u labe siaga lure.

¹²Gahe tarani tea ve nein wiriwiri ko nein tinotino vurogi. Igamai gam tarani huri ve igimiu nein huri lo taikerure hi a nora ladohogo u siaga ko rau rongribi, siu ingere rain haqe lai na gineu sao hi i God mo hogoginire lawera.

¹³Tuei, lune i God u vei na nona waratau mei Ebraham, i God u haharigi huri ve vin wiribibi siagagi na nona waratau hi. Huri a tangaloi hatie ve u lawua liu God, siu ingeie mo haharagi ta lune sibona.

¹⁴U waratau mei Ebraham, mo veve vena, “Ineu nain vei gareaginigo ko nain vei na duvimu vin saosao.”

¹⁵I Ebraham u rongribi, giniehi ingeie mo haqe na gineu doluegi hi i God u waratauginire lawea.

¹⁶Siu lo doridoride tangaloi, lune a tangaloi mo haharigi talo tangaloi mo ware na henai tangaloi u lawua denie sibona. Ko lune a tangaloi mo haharigi mwerehi, siu hate leo vage ve rain veve lo tagugi hi.

¹⁷Siu i God u warataugi na leona beno lawe na tangaloi ngerehi ve rain lei doluegi na gineu hi u waratauginire lawera. Ingeie mo tarani ve na vaire ve ran iloe na vagevage siu ingeie vin he dori na domine tea vohogi. Giniehi, ingeie mo haharagi talune sibona huri ve vin vei na nona waratau hi na labe na siaga na vagevage. Siu siseri ngaha a leo noi God gairue rom eno a nona waratau mena leo hi ve vin vei na nona waratau vin labe.

¹⁸A leo gairue hi roin he dori lai tea, siu vage lo leo gairue hi i God vin he kali lei tea vohogi. Igide hi dau haqe na tantano huri na mwasoana beno, a leo gairue hi rom ragasi na domide mo vagevage. Huri ve igide da tau doluegi na domide sulo waratau hi da wiribibie na siaga.

¹⁹Siu lo doridorigi hi igide dam tau doluegi na domide mo siaga lo waratau hi huri ve dain haqe na gineu doluegi hi u mwerena vatuligo mo wiribibi na mwasoana doluegi. Ngehi a vatuligo u saka u siaga, vin he gilu lei tea. A vatuligo hi u vano turu na galego hi a besebesei Ute Gogona Garagara noi God a eulu.

²⁰I Jisas u vano lolo ute gogona beno lo henada, ingeie mo wagahi na turegi huri gide. Ingeie u voragi muei rugurugu beno, mwerena tangaloi rugurugu hi i Melkisedek tuei. Ingeie vin hakovi na nona tabanagi nona muei rugurugu vagi tuei vin he rovo lai tea.